ສະຫຼຸບວຽກຄຸ້ມຄອງອຸທິຍານແຫ່ງຊາດ ນໍ້າແອດ-ພູເລີຍ

ວຽກງານຄຸ້ມຄອງປ່າສະຫງວນແຫ່ງຊາດແມ່ນວຽກງານບູລິມະລິມະສິດອັນສໍາຄັນທີ່ນອນຢູ່ໃນແຜນຍຸດທະສາດການພັດທະນາຊັບພະຍາກອນປ່າໄມ້ແບບຍືນຍົງໂດຍສະເພາະແມ່ນອຸທິຍານແຫ່ງຊາດນໍ້າແອດ-ພູເລີຍ ຖືກສ້າງຕັ້ງຂຶ້ນຕາມດໍາລັດຂອງນາຍົກລັດຖະມົນຕີສະບັບເລກທີ 35/ນຍ, ລົງວັນທີ 15 ກຸມພາ 2019, ສະນັ້ນເພື່ອເປັນບ່ອນອີງໃນການຈັດຕັ້ງ, ຄຸ້ມຄອງ, ປົກປັກຮັກສາສິ່ງແວດລ້ອມ, ປ່າໄມ້, ຊັບພະຍາກອນປ່າໄມ້, ພັນສັດນໍ້າ-ສັດປ່າ ແລະ ແຫຼ່ງກໍາເນີດຂອງຕົ້ນນໍ້າລໍາທານ, ອະນຸ ລັກໄວ້ເພື່ອຄວາມສວຍສົດງົດງາມຂອງທິວທັດທໍາມະຊາດ, ຮ່ອງຮອຍປະຫວັດສາດ, ວັດທະນະທໍາ, ເປັນບ່ອນພັກຜ່ອນ, ທ່ອງທ່ຽວ ແລະສຶກສາຄົ້ນຄວ້າທາງດ້ານວິທະ ຍາສາດ, ປະກອບສ່ວນເຂົ້າໃນການປັບປຸງຊີວິດການເປັນຢູ່ຂອງ ປະຊາຊົນ ແລະພັດທະນາເສດຖະກິດ-ສັງຄົມຕາມທິດສີຂຽວ ແລະຍືນຍົງ.

   ໃນວັນທີ 19 ກຸມພາຜ່ານມາທີ່ຫ້ອງການປົກຄອງເມືອງຮ້ຽມ ແຂວງຫົວພັນ, ກົມປ່າໄມ້, ກະຊວງກະສິກຳ ແລະ ປ່າໄມ້ໄດ້ຈັດກອງປະຊູມສະຫຼຸບຜົນງານປະຈຳປີ 2019 ແລະວາງແຜນການຈັດຕັ້ງປະຕິບັດວຽກງານຄຸ້ມຄອງອຸທິຍານແຫ່ງຊາດນໍ້າແອດ-ພູເລີຍປີ 2020 ໂດຍການເປັນປະທານ ຂອງທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະປ່າໄມ້, ທ່ານ ພັນທອງ ເພັດໄຊ ສົມພັນ ຮອງເຈົ້າແຂວງຫົວພັນ, ທັງເປັນຜູ້ຊີ້ນຳຂົງເຂດວຽກງານ ເສດຖະກິດ-ສັງຄົມ, ທ່ານ ບຸນເພັງ ພູມສະຫວາດ ຫົວໜ້າກອງຄຸ້ມຄອງອຸທິຍານແຫ່ງຊາດນໍ້າແອດ-ພູເລີຍ,ທ່ານ ສີວິໄລ ດວງດາລາ ທີ່ປຶກສາອົງການອະນຸລັກສັດປ່າ,ມີຕາງໜ້າ 3ແຂວງ ແລະ10 ເມືອງຄື: ແຂວງຊຽງຂວາງ (ເມືອງພູກູດ), ແຂວງຫົວພັນ (ເມືອງຫົວເມືອງ, ຊຳເໜືອ, ຊ່ອນ, ຮ້ຽມ ແລະເມືອງແອດ) ແລະແຂວງຫຼວງພະບາງ (ເມືອງປາກແຊງ , ໂພນທອງ ແລະເມືອງໂພນໄຊ)ເຂົ້າຮ່ວມ.

  ການຈັດກອງປະຊຸມໃນຄັ້ງນີ້ ເພື່ອເປັນການສະຫຼຸບຕີລາຄາຜົນ ການຈັດຕັ້ງປະຕິບັດວຽກງານຄຸ້ມ ຄອງອຸທິຍານແຫ່ງຊາດນໍ້າແອດ-ພູເລີຍ ໂດຍສະເພາະແມ່ນການທົບທວນການດໍາເນີນກິດຈະກໍາຕ່າງໆ ເຊັນ: ວຽກງານບັງຄັບໃຊ້ກົດໝາຍ, ການທ່ອງທ່ຽວ, ການປັບປຸງຊີວິດ ການເປັນຢູ່ ແລະວຽກງານອື່ນໆ ເຫັນວ່າຍັງມີບັນຫາອັນໃດທີ່ຍັງບໍ່ສອດຄ່ອງ ແລະບັນຫາດັ່ງກ່າວ ນັ້ນຄວນແກ້ໄຂດ້ວຍວີທີໃດ, ນອກຈາກນີ້ໃນກອງປະຊຸມບັນດາທ່ານຜູ້ແທນກອງປະຊຸມໄດ້ພ້ອມກັນປະກອບຄໍາຄິດຄໍາເຫັນ ແລະສະເໜີ ໃສ່ແຜນດໍາເນີນງານການຄຸ້ມຄອງປົກປັກຮັກສາຊັບພະຍາກອນປ່າໄມ້, ສັດນໍ້າ-ສັດປ່າ ແລະຊີວະ ນາໆພັນໃນເຂດອຸທິຍານແຫ່ງຊາດນໍ້າແອດ-ພູເລີຍ ຢ່າງກົງໄປ-ກົງມາ, ພ້ອມທັງຮຽກຮ້ອງໃຫ້ຜູ້ແທນກອງປະຊຸມທັງໝົດຕ້ອງຮ່ວມກັນ ແກ້ໄຂບັນຫາຕ່າງໆທີ່ເກີດຂຶ້ນທັງໝົດໃຫ້ລຸດໜ້ອຍຖອຍລົງເທື່ອລະກ້າວໂດຍສະເພາະການລັກລອບ ຕັດໄມ້, ການຖາງປ່າເຮັດໄຮ່, ການລ່າສັດນໍ້າ-ສັດປ່າ, ການຕັ້ງສະນໍາ (ເຂດລ້ຽງສັດ)ໃນເຂດຫວງຫ້າມທີ່ມີຜົນກະທົບຕໍ່ການສູນເສຍດ້ານຊີວະນາໆພັນໃນເຂດອຸທິຍານ, ການຈັດຕັ້ງປະຕິບັດກົດໝາຍຢ່າງເຂັ້ມງວດ, ພາຍໃຕ້ການຈັດຕັ້ງປະຕິບັດໂຄງການເລັນ 2 ໃນປີ 2019-2020 ແລະໃນແຜນ 5 ປີ ຕໍ່ໜ້າເຂົ້າໃນການຈັດຕັ້ງປະຕິບັດບັນດາວຽກງານທີ່ເປັນບູລິມະສິດອັນຮີບດ່ວນໃນການຄຸ້ມຄອງປົກປັກຮັກສາຊີວະນາໆພັນ ແລະສັດປ່າໃຫ້ຍືນຍົງ.

____________

ຂຽນໂດຍ: ວົງມະນີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

 

แชร์