ມສ ນໍ້າງອນ ຍາດໄດ້ຜົນສຳເລັດຫຼາຍດ້ານ

ທ່ານ ວັນທະລາ ໄຊຍະແສງ ເລຂາໜ່ວຍພັກໂຮງຮຽນອໍານວຍການໂຮງຮຽນ ມສ ນໍ້າງອນໄດ້ ລາຍງານຕໍ່ກອງປະຊຸມໃຫຍ່ຄັ້ງທີ XIII ຂອງອົງຄະນະພັກເມືອງຊານໄຊ ໃນອາທິດຜ່ານມາວ່າ: ໂຮງຮຽນນໍ້າງອນເປັນໂຮງຮຽນແຫ່ງໜຶ່ງໃນໂຮງຮຽນສອງແຫ່ງຂອງເມືອງຊານໄຊ ທີ່ຂຶ້ນກັບຫ້ອງການສຶກສາທິການ ແລະ ກີລາເມືອງຊານໄຊ ແລະພະແນກສຶກສາທິການ ແລະກີລາແຂວງອັດຕະປື,ເປັນໂຮງຮຽນທີ່ຕັ້ງຢູ່ເຂດພູດອຍ, ໂຮງຮຽນມີທີ່ຕັ້ງຢູ່ຈຸດໃຈກາງຂອງເຂດພັດທະນາຈຸດສຸມກຸ່ມບ້ານນໍ້າງອນ ແລະຕັ້ງຢູ່ໃນເຂດພື້ນທີ່ການຄຸ້ມ ຄອງຂອງບ້ານນໍ້າງອນເໜືອຫ່າງຈາກເທສະບານເມືອງຊານໄຊ 45 ກິໂລແມັດ.

  ໂຮງຮຽນນໍ້າງອນໄດ້ຖືກປັບປຸງຍົກລະດັບການສຶກສາໄດ້ປະກາດເປັນໂຮງຮຽນມັດຖະຍົມຕອນຕົ້ນ ແລະເປີດດຳເນີນການຮຽນ-ການສອນເລີ່ມແຕ່ 2011-2012, ມາຮອດ 2018 ໄດ້ຮັບຮອງເປັນໂຮງຮຽນ ມສ ນໍ້າງອນ ມີ 7 ຊັ້ນຮຽນ , ມີອາຈານສອນທັງໝົດ 16 ຄົນ , ຍິງ 6 ຄົນ, ມີນັກຮຽນ 348 ຄົນ, ຍິງ 159 ຄົນ.

    ໂຮງຮຽນ ມສ ນໍ້າງອນສາມາດຍາດໄດ້ຜົນງານອັນພົ້ນເດັ່ນບາງດ້ານໃນໄລຍະ 5 ປີຜ່ານມາ ເປັນຕົ້ນໃນສົກປີ  2017-2018 ໄດ້ຮັບຂັນລາງວັນໂຮງຮຽນດີເດັ່ນປະເພດ 1 ດ້ານກິດຈະກຳການສ້າງ ລາຍຮັບເຂົ້າໂຮງຮຽນແບບຍືນຍົງ (ການປູກຜັກທຽມ) ຈາກໂຄງ ການ SESDP (ຢູ່ທ່າລາດເມືອງ ແກ້ວອຸດົມ ແຂວງວຽງຈັນ) ໃນບັນດາໂຮງຮຽນ 60 ແຫ່ງ ຂອງ 6 ແຂວງທີ່ໄດ້ຮັບທຶນການສະໜັບສະໜູນຈາກໂຄງການຄື: ແຂວງຄໍາມ່ວນ, ສະຫວັນນະເຂດ, ຈໍາປາສັກ, ສາລະວັນ, ເຊກອງ ແລະ ອັດຕະປື.

  ຜົນການສອບເສັງຂອງນັກຮຽນໃນໄລຍະຜ່ານມາແມ່ນເສັງໄດ້ 100% ໃນແຕ່ລະສົກຮຽນ, ໂຮງຮຽນສາມາດສອບເສັງນັກຮຽນເກັ່ງໃດ້ອັນດັບທີ 1-2 ຂອງ ເມືອງ ແລະອັນພົ້ນເດັ່ນໃນສົກ 2017-2018 ມີນັກຮຽນເກັ່ງຂອງ ໂຮງຮຽນຈໍານວນ 6 ຄົນ, ຍິງ 2 ຄົນໄດ້ເປັນຕົວແທນຂອງເມືອງເຂົ້າຮ່ວມການສອບເສັງຄັດເລືອກນັກ ຮຽນເກັ່ງຂັ້ນແຂວງຜົນການສອບເສັງສາມາດຍາດມາໄດ້ອັນດັບ 1-2 ແລະ3 ຂອງແຂວງໄດ້ທັງໝົດ 6 ຄົນເທົ່າກັບ 100% ຂອງຈໍານວນນັກຮຽນທີ່ສົ່ງເຂົ້າການສອບເສັງໃນນັ້ນໄດ້ສົ່ງຕົວແທນເຂົ້າຮ່ວມການສອບເສງນັກຮຽນເກັ່ງລະດັບຊາດ 1 ຄົນ , ຜົນການສອບເສັງສາມາດຍາດມາໄດ້ອັນດັບທີ 4 ຂອງຊາດສາຍວິຊາພາສາລາວ-ວັນນະຄະດີ ຊັ້ນ ມ4 ປະຈຸບັນໄດ້ຮັບທຶນນະໂຍບາຍຈາກກະຊວງສຶກສາທິການ ແລະກີລາໄປຮຽນຕໍ່ຊັ້ນມໍປາຍທີ່ໂຮງຮຽນ ມສ ວຽງຈັນ ນະຄອນຫຼວງວຽງຈັນ.

____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์