ສະຫະພັນນັກຮົບເກົ່າຫົວພັນ-ແທັງຮວ່າແລກປ່ຽນບົດຮຽນສອງຝ່າຍ

 ວັນທີ 19 ກຸມພາ 2020 ນີ້, ສະຫະພັນນັກຮົບເກົ່າແຂວງຫົວພັນແຫ່ງ ສປປ ລາວ ສົມທົບກັບສະຫະພັນນັກຮົບເກົ່າແຂວງແທັງຮວ່າແຫ່ງ ສສ ຫວຽດນາມ ໄດ້ຈັດກອງປະຊຸມພົບປະແລກປ່ຽນບົດຮຽນຢູ່ທີ່ຫ້ອງປະຊຸມສະຫະພັນນັກຮົບເກົ່າແຂວງຫົວພັນ, ຊຶ່ງຝ່າຍແຂວງຫົວພັນນໍາໂດຍສະຫາຍ ພັທ ສົມແຢດ ສົມສະບານ ຄະນະບໍ ລິຫານງານສະຫະພັນນັກຮົບເກົ່າແຫ່ງຊາດລາວ, ປະທານສະຫະພັນນັກຮົບເກົ່າແຂວງ, ຝ່າຍແຂວງແທັງຮວ່າ ນໍາໂດຍສະຫາຍ ພັອພິເສດ ດິງຕຽນ ຟອງ ຄະນະບໍລິ ຫານງານສະມາຄົມນັກຮົບເກົ່າສູນກາງ, ປະທານສະມາຄົມນັກຮົບເກົ່າແຂວງ, ພ້ອມດ້ວຍຄະນະຜູ້ແທນທີ່ກ່ຽວຂ້ອງທັງສອງຝ່າຍເຂົ້າຮ່ວມນໍາ.

 ໃນການພົບປະແລກປ່ຽນບົດຮຽນໃນຄັ້ງນີ້ທັງສອງຝ່າຍໄດ້ພັດປ່ຽນກັນລາຍງານສະພາບລວມຂອງແຂວງ,ສະພາບລວມຂອງອົງການສະຫະພັນນັກຮົບເກົ່າໃຫ້ກັນ ແລະກັນໄດ້ຮັບຊາບ, ຊຶ່ງໄດ້ຍົກໃຫ້ເຫັນໃນໄລຍະ 2 ປີຜ່ານມາ ທັງສອງແຂວງໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ສະມາຊິກນັກຮົບເກົ່າ,ປະຊາຊົນບັນດາເຜົ່າໄດ້ຮັບຮູ້ເຊື່ອມຊຶມມູນເຊື້ອສາມັກຄີແບບພິເສດລາວ-ຫວຽດນາມ, ສ້າງເງື່ອນໄຂອຳນວຍຄວາມສະດວກໃຫ້ແກ່ສະມາຊິກນັກຮົບເກົ່າໄດ້ໄປທ່ອງທ່ຽວຢ້ຽມຢາມເພື່ອນຮ່ວມສະ ໜາມຮົບເກົ່າ, ອຳນວຍຄວາມສະດວກນັກຮົບເກົ່າຂັ້ນເມືອງທີ່ຢູ່ລຽບຕາມຊາຍແດນໄດ້ໄປມາຫາສູ່ເພື່ອພົບປະແລກປ່ຽນຮ່ວມມືເຊິ່ງກັນ ແລະກັນໃນການພັດທະນາວຽກ ງານນັກຮົບເກົ່າ, ຊຸກຍູ້ສົ່ງເສີມການລົງ ທຶນ, ແລກປ່ຽນສິນຄ້າຕາມນະໂຍ ບາຍຂອງສອງແຂວງ, ຮ່ວມມືໃນ ການເກັບກຳຂໍ້ມູນທະຫານອາສາສະໝັກ ແລະ ຊ່ຽວຊານຫວຽດ ນາມທີ່ເສຍສະຫຼະຊີວິດໃນສະໄໝສົງຄາມຢູ່ ແຂວງຫົວພັນຄຽງຄູ່ກັບດ້ານດີຜົນງານທີ່ຍາດມາໄດ້ນັ້ນຍັງມີບາງດ້ານທີ່ຄົງຄ້າງເຊັ່ນວ່າ: ວຽກງານພົວພັນໃຫ້ນັກທຸລະ ກິດນັກຮົບເກົ່າສອງແຂວງແລກ ປ່ຽນສິນຄ້າ, ລົງທຶນຮ່ວມກັນຍັງ ຈໍາກັດບໍ່ຂະຫຍາຍເຂົ້າສູ່ລ່ວງເລິກ, ບັນດາເມືອງທີ່ມີຊາຍແດນຕິດຈອດກັນການພົວພັນຮ່ວມມືແລກປ່ຽນບົດຮຽນດ້ານວິຊາການຍັງບໍ່ທັນ ໄດ້ດີເທົ່າທີ່ຄວນ, ໃນຕໍ່ໜ້າທັງສອງ ແຂວງຫົວພັນ-ແທັງຮວ່າເວົ້າລວມເວົ້າສະເພາະແມ່ນນັກຮົບເກົ່າຂອງສອງແຂວງຈະສືບຕໍ່ສຶກສາອົບຮົມດ້ານການເມືອງແນວຄິດໃຫ້ສະມາຊິກນັກຮົບເກົ່າ, ມີສະຕິລະວັງຕົວຕໍ່ກົນອຸບາຍຂອງກຳລັງປໍລະປັກທີ່ຫວັງທຳລາຍມ້າງເພຄວາມສາມັກຄີລະຫວ່າງສອງພັກ-ສອງລັດ, ລາວ-ຫວຽດນາມອ້າຍນ້ອງ, ໂຄສະນາປຸກລະດົມຖັນແຖວນັກຮົບເກົ່າ ແລະປະຊາຊົນບັນດາເຜົ່າເຂົ້າຮ່ວມຂະບວນການປົກປັກຮັກສາຄວາມສະຫງົບຊາຍ ແດນແຫ່ງຊາດ, ສ້າງເງື່ອນໄຂອຳນວຍຄວາມສະດວກໃຫ້ສະມາຊິກນັກຮົບເກົ່າໄດ້ໄປມາຫາສູ່ກັນຕາມເງື່ອນໄຂເໝາະສົມ, ຈັດຕັ້ງຄະນະຜູ້ແທນພັດປ່ຽນໄປຢ້ຽມຢາມ ແລະແລກ ປ່ຽນບົດຮຽນທີ່ໄດ້ກຳນົດ 2 ປີ ຕໍ່ຄັ້ງພັດປ່ຽນກັນເປັນເຈົ້າພາບ, ໂອກາດນີ້ສະຫະພັນນັກຮົບເກົ່າແຂວງແທັງຮວ່າຍັງໄດ້ມອບຄອມພີວເຕີຕັ້ງໂຕະນວນ 2 ຊຸດ ແລະ ໜ້າຈໍໂທລະພາບລວມມູນຄ່າ 52 ລ້ານດົງໃຫ້ສະຫະພັນນັກຮົບເກົ່າແຂວງຫົວພັນເພື່ອຮັບໃຊ້ວຽກງານວິຊາສະເພາະໃຫ້ມີຄວາມສະດວກດີຂຶ້ນ.

_____________

ຂຽນໂດຍ: ນິດຖະໜອມ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์