ນາຣີກະເປົ໋າລາວປະຍຸກຜູ້ຄົ້ນຄິດຫຍີ່ຫໍ້ກະເປົ໋າລາວທີ່ໄດ້ຮັບຫຼາຍລາງວັນ

 ຮ້ານນາຣີກະເປົາລາວປະຍຸກ ຫຼື ເອີ້ນວ່າ ຍີ່ຫໍ້ ນາຣີ (NAREE), ເປັນຍີ່ຫໍ້ກະເປົາທຳອິດ ຂອງ ສປປ ລາວ ທີ່ ຜະລິດກະເປົາທຸກປະເພດໂດຍນຳໃຊ້ຜ້າແພລາວເປັນຫຼັກໃນການຜະລິດ ແລະວັດຖຸດິບນໍາເຂົ້າອື່ນໆ ເຊິ່ງເນັ້ນທີ່ຄຸນນະພາບ ແລະ ການອອກແບບໃຫ້ສວຍງາມທັນສະໄໝພ້ອມກ້າວສູ່ຕະຫຼາດສາກົນໃນໄວໆນີ້.

   ທ່ານນາງ ມະໂນທິບ ສີຣິປະພັນ ເຈົ້າຂອງຮ້ານນາຣີກະເປົ໋າລາວປະຍຸກໃຫ້ສຳພາດວ່າ: ຮ້ານນາຣີກະເປົ໋າເຮົາສ້າງຕັ້ງຂຶ້ນປີ 2013 ຈຸດເລີ່ມຕົ້ນຂອງທຸລະກິດຕົນເອງເຄີຍເຮັດວຽກຢູ່ທະນາຄານຊຶ່ງເປັນຄົນມັກໃຊ້ກະເປົ໋າຢູ່ແລ້ວຈາກນັ້ນໄດ້ຮັບລາງວັນແຜນທຸລະກິດດີເດັ່ນໄວໜຸ່ມໂຄງການທະນາຄານໂລກຮ່ວມກັບສະມາຄົມນັກທຸລະກິດໜຸ່ມໃນນັ້ນແມ່ນໄດ້ຮັບທຶນສະໜັບສະໜູນການເລີ່ມຕົ້ນທຸລະກິດເລີຍໄດ້ຕັດສິນໃຈຄົ້ນຄິດນະວັດຕະກຳແບນກະເປົ໋ານາຣີນີ້ຂຶ້ນມາເພື່ອໃຫ້ຕອບສະໜອງໃຫ້ສັງຄົມໄດ້ໃຊ້ສິນຄ້າຂອງລາວ.

 ຈຸດເດັ່ນກະເປົ໋ານາຣີເປັນຜະລິດຕະພັນຂອງລາວແບບປະຍຸກທີ່ໄດ້ອອກແບບປະສົມປະສານສີສັນສວຍງາມທັນສະໄໝຫຼາຍຊະນິດເຊັ່ນ: ກະເປົ໋າເງິນ, ກະເປົ໋າໃຊ້ເຄື່ອງ, ກະເປົ໋າໃຊ້ສອຍ ແລະອື່ນໆມີທັງປະເພດຜ້າໄໝມອນ ແລະປະເພດໜັງນອກຈາກມີກະເປົ໋າສຳເລັດຮູບແລ້ວຍັງສາມາດເຮັດຮູບແບບຕາມທີ່ລູກຄ້າຕ້ອງການຈົນມາຮອດປະຈຸບັນຖືວ່າໄດ້ຜະລິດອອກແບບສ້າງຊື່ສຽງໂດງດັງສົມຄວນຊຶ່ງມີລູກຄ້າທີ່ເປັນສະມາຊິກຊື້ສິນຄ້າມູນຄ່າ 1 ລ້ານກີບຂຶ້ນໄປແມ່ນມີບັດເມັມເບີ້ 100 ກວ່າບັດ ນອກນັ້ນເຮົາຍັງມີຜ້າໄໝລາວເປັນຊຸດຜ້າໄໝທີ່ໄດ້ການອອກແບບໃຫ້ຄ່ຽງຄູ່ກັບກະເປົ໋າແຟຊັນເປັນເອກະລັກວັດທະນະທຳລາວ.

--------------   

  ຮ້ານນາຣີກະເປົ໋າລາວປະຍຸກເປັນຜູ້ທຳອິດທີ່ໄດ້ຄົ້ນຄິດແບນກະເປົາຊັ້ນນຳຂອງຜະລິດຕະພັນລາວຜ່ານມາຮ້ານນາຣີກະເປົ໋າລາວປະຍຸກໄດ້ຮັບຫຼາຍລາງວັນເຊັ່ນ: ປີ 2013 ໄດ້ລາງວັນຊະນະເລີດ ການປະກວດໂຄງການໄວໜຸ່ມດີ ເດັ່ນຈາກການຄັດເລືອກ 97 ໂຄງການທົ່ວປະເທດຈັດໂດຍ World Bank, ປີ 2014 ໄດ້ ລາງວັນຫຼຽນເງິນ ແລະຫຼຽນທອງແດງພ້ອມລາງວັນຍ້ອງຍໍພິເສດໃນການປະກວດສິນຄ້າ “ກະເປົ໋າຊອງຈົດໝາຍ” ແລະ ການອອກແບບລວດລາຍ “ພະຍານາກຄູ່” ໃນງານ Korea International Women Invention Exhibition (KIWIE) ທີ່ປະເທດ ເກົາຫຼີໃຕ້, ປີ 2015 ໄດ້ລາງວັນ ASEAN-China Start Up Awar,ປີ 2016 ໄດ້ຮ່ວມເດີນແບບງານ LAO NOW ທີ່ເມືອງ New York, USA ເປັນໂຄງການລະດົມທຶນຊ່ວຍເຫຼືອການເກັບກູ້ລະເບີດຢູ່ລາວ (Legacies of War) ປີ 2017 ໄດ້ລາງວັນ TAYO Award, ໃນການສຳມນາProliferating Youth Entrepreneurship in ASE AN Community ທີ່ Jakarta, Indo nesia,ປີ 2018 ໄດ້ຮັລາງວັນ ASEANWomanEntrepre neur Award ແລະ ໄດ້ຮັບລາງວັນ Young Entrepreneur of the Summit Award, ໃນງານ SELANGOR International Business Summit ທີ່ KL, Malaysia.

 

 ທ່ານນາງ ມະໂນທິບ ສີຣິປະພັນ ໃຫ້ຮູ້ຕື່ມອີກວ່າ: ໃນໄວໆນີ້ເຮົາຈະຂະຫຍາຍເປີດແບນຊຸດຜ້າໄໝລາວຢ່າງເປັນທາງການຊຶ່ງເປັນຜະລິດຕະພັນແພໄໝທີ່ໄດ້ການອອກແບບໃຫ້ຄ່ຽງຄູ່ກັບກະເປົ໋າແຟຊັນເປັນເອກະລັກວັດທະນະທຳລາວ ພ້ອມເນັ້ນການຈຳໜ່າຍສິນຄ້າທີ່ດີໃຫ້ແກ່ລູກຄ້າໂດຍສະເພາະບໍລິການຂາຍວ່ອງໄວພ້ອມສົ່ງໃຫ້ທັນໃຈລູກຄ້າເພື່ອຮັກສາສຳພັນທະມິດທີ່ດີຕໍ່ຜູ້ບໍລິໂພກ, ມີຄວາມຮັບຜິດຊອບຕໍ່ສັງຄົມ ແລະເປັນສ່ວນໜຶ່ງໃນການສະໜັບສະໜູນສ້າງທີ່ເປັນຜະລິດຕະພັນຂອງຄົນລາວສຳລັບຮ້ານນາຣີກະເປົ໋າລາວປະຍຸກຕັ້ງຢູ່ບ້ານໜອງບອນ ເມືອງໄຊເສດຖາ,ສາຂາສອງຕັ້ງຢູ່ສູນການຄ້າວຽງຈັນເຊັນເຕີນະຄອນຫຼວງວຽງຈັນ ເຟສ໌ບຸກ: NAREE Handbags ໂທລະສັບ: 02023071333, 020 58 444472.

_____________

ຂຽນໂດຍ: ແພງຕາ 
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

 

แชร์