ທ່ານເຈົ້າເມືອງຊຽງຮ່ອນເນັ້ນໜັກ 3 ບັນຫາເພື່ອເຮັດການຈັດເກັບລາຍຮັບໄດ້ຕາມແຜນ

  ທ່ານ ບຸນລ້ວນ ຊົມສີຫາ ປັນຍາ ກຳມະການພັກແຂວງ ເລຂາພັກເມືອງເຈົ້າເມືອງໆຊຽງຮ່ອນ ໄດ້ເນັ້ນໜັກ 3 ບັນຫາເພື່ອເຮັດໃຫ້ການຈັດຕັ້ງປະຕິບັດແຜນງົບປະ ມານຂອງລັດປະຈຳປີ 2020 ຂອງເມືອງຊຽງຮ່ອນບັນລຸຕາມລະດັບຄາດໝາຍ.

 ໃນໄລຍະຜ່ານມາການຈັດຕັ້ງປະຕິບັດແຜນງົບປະມານປະຈຳປີ 2019 ຜ່ານມາເຫັນວ່າຍັງມີຄວາມຍຸ້ງຍາກເນື່ອງຈາກງົບປະມານ ລວມຂອງເມືອງຍັງມີແຜນຂາດດຸ່ນທີ່ສູງລາຍຮັບບໍ່ກຸ້ມລາຍ ຈ່າຍຕ້ອງໄດ້ເພີ່ງພາການດຸ່ນດ່ຽງຈາກຂັ້ນແຂວງເຖິງ 70% ຂອງແຜນລາຍຈ່າຍທັງໝົດຂອງເມືອງໃນຂະນະທີ່ການຈັດເກັບລາຍຮັບພາຍໃນເມືອງໄດ້ພຽງ 82% ຂອງແຜນການປີ ແລະ ເປັນຕົວເລກທີ່ຕໍ່າຖ້າທຽບໃສ່ຂໍ້ມູນຕົວຈິງ, ດ້ານແຜນລາຍຮັບທັງໝົດ 3,95 ຕື້ກີບ ປະຕິບັດຕົວຈິງໄດ້ 3,25 ຕື້ກີບ ເທົ່າກັບ 82%, ລາຍຮັບຈາກສ່ວຍສາອາກອນແຜນການຈັດເກັບແມ່ນ 3,77 ຕື້ກີບ ການປະຕິບັດຕົວຈິງປະຕິບັດໄດ້ໄດ້ພຽງແຕ່ 3 ຕື້ກວ່າກີບ,ແຜນການຈັດເກັບຈາກການຄຸ້ມຄອງສັບສີນ 180 ລ້ານກີບ ຜ່ານການຈັດເກັບປະຕິບັດໄດ້ 180 ລ້ານກີບ ເທົ່າກັບ 100%.

 ຜ່ານການຈັດຕັ້ງປະຕິບັດແຜນການເກັບລາຍຮັບຕາມຂັ້ນຄຸ້ມຄອງຄື: ຂະແໜງການເງິນເກັບໄດ້ 2,33 ຕື້ກີບ, ບັນດາຂະແໜງການທີ່ມີລາຍຮັບເກັບໄດ້ 842,94 ລ້ານກີບ ແລະບ້ານຮັບຜິດຊອບ ເກັບລາຍຮັບໄດ້ທັງໝົດ 769,67 ລ້ານກີບ, ດ້ານລາຍຈ່າຍແຜນລາຍຈ່າຍຂອງເມືອງທັງໝົດ 10,8 ຕື້ກີບ ປະຕິບັດໄດ້ 10,81 ຕື້ກີບ ເທົ່າກັບ 100,13% ຂອງແຜນການປີໃນນັ້ນຈ່າຍເງິນເດືອນພະນັກງານ 5,61 ຕື້ກີບ, ຈ່າຍເງິນອຸດໜູນນະໂຍບາຍ 2,78 ຕື້ກີບ, ຈ່າຍເງິນບໍລິຫານປົກກະຕິ 1,82 ຕື້ກີບ ແລະຈ່າຍດັດສົມສົ່ງເສີມ 596,14 ລ້ານກີບ.

  ທ່ານໄດ້ເນັ້ນໜັກໃຫ້ບັນດາຂະແໜງການ ແລະ ພາກສ່ວນທີ່ກ່ຽວຂອງຈົ່ງພ້ອມກັນເອົາໃຈໃສ່ຄື: ເພີ່ມທະວິວຽກງານສຶກສາອົບຮົມແນວຄິດການເມືອງໃຫ້ແກ່ພະນັກ ງານ, ລັດຖະກອນພາຍໃນຂະແໜງການເງິນໃຫ້ມີການຫັນປ່ຽນ ແນວຄິດ, ຈີນຕະນາການ, ຍົກສູງຄວາມຮັບຜິດຊອບຕໍ່ໜ້າທີ່ວຽກງານມີທັດສະນະຮັບໃຊ້ບໍລິຫານທີ່ດີຕ້ານແນວຄິດ ແລະ ການກະທຳທີ່ເປັນການກົດໜ່ວງທ່ວງດຶງອຶດອາດຊັກຊ້າສ້າງຄວາມລຳຄານໃຫ້ແກ່ຜູ້ມາພົວພັນວຽກງານໂດຍສະເພາະແມ່ນຜູ້ປະກອບການຫົວ ໜ່ວຍທຸລະກິດມາຕິຕໍ່ພົວພັນວຽກ.

  ບັນດາຂະແໜງການການເງິນອ້ອມຂ້າງເມືອງ ແລະການເງິນຂັ້ນບ້ານຕ້ອງໄດ້ເອົາໃຈໃສ່ໃນການຄຸ້ມຄອງຕົວເລກແຜນງົບປະມານຂອງຕົນເປັນເຈົ້າການໃນການຂຸດຄົ້ນແຫຼ່ງລາຍຮັບທີ່ບົ່ມຊ້ອນໃນຂອບເຂດຄວາມຮັບຜິດຊອບຂອງຕົນກຳນົດມາດຕະການທີ່ຮັດກຸມເຂັ້ມງວດໃນການຂຸດຄົ້ນເກັບ ແລະມອບລາຍຮັບເຂົ້າງົບປະມານໃຫ້ຄົບຖ້ວນ ລວມສູນ ແລະທັນກຳນົດເວລາເອົາໃຈໃສ່ປະຕິບັດວິໃນການເງິນຢູ່ໃນຂະແໜງການເງິນ ແລະຜູ້ຮັບຜິດຊອບວຽກງານຄຸ້ມຄອງການເງິນຕ້ອງມີວິໃນທີ່ເຂັ້ມງວດ.

 ດ້ານລາຍຈ່າຍຖືເປັນສຳຄັນເອົາໃຈໃສ່ປະຕິບັດກົດໝາຍວ່າດ້ວຍງົບປະມານຢ່າງເຂັ້ມງວດປະຢັດມັດທະຍັດປະຕິບັດຕາມກົດໝາຍລາຍຈ່າຍບໍລິຫານຢ່າງຖືກຕ້ອງຄະນະນຳຂອງຂະແໜງການຕ່າງໆຂອງເມືອງຕ້ອງເປັນເຈົ້າການຊີ້ນຳການຈັດຕັ້ງປະຕິບັດຄຸ້ມຄອງແຜນລາຍຈ່າຍງົບປະມານໃຫ້ໄປຕາມລະບຽບຫຼັກການ ແລະຢູ່ໃນກອບລາຍ ຈ່າຍທີ່ສະພາແຫ່ງຊາດ ແລະສະພາປະຊາຊົນຂັ້ນ ແຂວງໄດ້ຮັບຮ້ອງແລ້ວນັ້ນບໍ່ອະນຸຍາດໃຫ້ຈ່າຍນອກແຜນ ຫຼືຈ່າຍນອກຢ່າງເດັດຂາດ.

   ເພື່ອເຮັດໃຫ້ການຈັດຕັ້ງປະຕິບັດແຜນງົບປະມານແຫ່ງລັດຂອງເມືອງບັດລຸຕາມແຜນການ ແລະເຮັດໃຫ້ການອັດຕາການຂາດດຸນທາງດ້ານງົບປະມານນັບມື້ນັບຫຼຸດ ລົງ ແລະກ້າວໄປເປັນເມືອງທີ່ມີລາຍຮັບກຸ້ມຕົນເອງໃນຕໍ່ໜ້າ.

_____________

ຂຽນໂດຍ: ດອນ ຂຽວພະນາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

 

แชร์