ຫັນການເງິນເຖື່ອນເຂົ້າສູ່ລະບົບລັດຄຸ້ມຄອງ

  ທ່ານ ອາລຸນ ບຸນຍົງ ຫົວໜ້າກົມຄຸ້ມຄອງສະຖາບັນການເງິນທະນາຄານ ແຫ່ງ ສປປ ລາວ (ທຫລ) ໄດ້ຊີ້ບອກວ່າ: ການສ້າງຄວາມເຂັ້ມແຂງໃຫ້ແກ່ການຄຸ້ມຄອງສະຖາບັນການເງິນຈຸລະພາກນັ້ນເປັນບັນຫາສຳຄັນ ແລະເປັນ ແກນກາງຊຶ່ງໃນຜ່ານມາພວກເຮົາໄດ້ສ້າງທຸກເງື່ອນໄຂ,ທັງອຳນວຍຄວາມສະດວກ ແລະລະດົມຂົນຂວາຍໃຫ້ສະຖາບັນການເງິນນອກລະບົບທີ່ບໍ່ທັນຖືກຕ້ອງຫັນເຂົ້າສູ່ລະບົບ ແລະໄດ້ອອກໃບອະນຸຍາດສ້າງຕັ້ງສະຖາບັນການເງິນໃໝ່ເພີ່ມຂຶ້ນທາງດ້ານປະລິມານ ແລະ ຄຸນນະ ພາບຈຳນວນ 60 ແຫ່ງ ທຽບໃສ່ແຜນປີ 2014 ຢ່າງໜ້ອຍປີລະ 10 ແຫ່ງ ສາມາດປະຕິບັດ 100%; ປະຈຸບັນສະຖາບັນທີ່ຢູ່ພາຍໃຕ້ການຄຸ້ມຄອງຂອງ ທຫລ ມີ 177 ແຫ່ງ.

  ໃນຂະນະດຽວກັນກໍ່ເຜີຍແຜ່ຄວາມຮູ້ພື້ນຖານທາງດ້ານການເງິນ, ລະຄອນເລື່ອງສັ້ນຮອບຮູ້ເລື່ອງເງິນແກ່ສັງຄົມແລະສະຖາບັນການສຶກສາຕ່າງໆ 54 ຄັ້ງ ມີຜູ້ເຂົ້າຮ່ວມຫຼາຍກວ່າ 16.200 ເທື່ອຄົນ; ສຳເລັດ ການຈັດຝຶກອົບຮົມ-ສຳມະນາໃນຫົວຂໍ້ຕ່າງໆ 80 ກວ່າຄັ້ງ ມີຜູ້ເຂົ້າຮ່ວມ 9.106 ເທື່ອຄົນທຽບໃສ່ແຜນປີ 2014 ໄດ້ຢ່າງໜ້ອຍ 10 ຄັ້ງຕໍ່ປີສາມາດປະຕິບັດ 100%; ຕິດຕາມກວດກາ,ແກ້ໄຂສະພາບປາກົດການຫຍໍ້ທໍ້ໃນທົ່ວລະບົບສະຖາບັນການເງິນທີ່ໄດ້ຮັບອະນຸຍາດຈາກ ທຫລ ຢ່າງເຂັ້ມງວດໃນ 115 ແຫ່ງ, ກວດກາສຸກເສີນສະຖາບັນການເງິນທີ່ມີຄວາມສ່ຽງໃນການດຳເນີນງານ 12 ແຫ່ງ;ແກ້ໄຂສະຖາບັນການເງິນຈຸລະພາກທີ່ຮັບເງິນຝາກ 2 ແຫ່ງທີ່ມີບັນຫາໂດຍສະເໜີຂັ້ນເທິງແຕ່ງຕັ້ງຄະນະສະເພາະກິດລົງຕິດຕາມຢ່າງໃກ້ຊິດປະສານສົມທົບກັບພາກສ່ວນທີ່ກ່ຽວຂ້ອງເພື່ອດໍາເນີນການແກ້ໄຂຊຳລະສະ ສາງໄປຕາມລະບຽບຫຼັກການ ແລະລາຍງານຂໍທິດຊີ້ນຳຈາກຂັ້ນເທິງ.

 ໃນຜ່ານມາຍັງມີຫຼາຍບໍລິສັດທີ່ເຄື່ອນໄຫວທາງການເງິນທີ່ບໍ່ສອດຄ່ອງກັບລະບຽບກົດໝາຍກໍ່ຄືບໍ່ໄດ້ຮັບອະນຸຍາດຈາກ ທຫລ; ກົມຄຸ້ມຄອງສະຖາບັນການເງິນໄດ້ເອົາໃຈໃສ່ຕິດຕາມເກັບກໍາຂໍ້ມູນ ແລະປະສານສົມທົບກັບພາກສ່ວນທີ່ກ່ຽວຂ້ອງເພື່ອຈັດຕັ້ງປະຕິບັດມາດຕະການແກ້ໄຂຕາມລະບຽບກົດໝາຍ, ພ້ອມນັ້ນ, ກໍ່ອອກແຈ້ງເຕືອນ, ໂຄສະນາທາງສື່ມວນຊົນ ແລະປະສານສົມທົບກັບອໍານາດການປົກຄອງທ້ອງຖິ່ນເພື່ອເຜີຍແຜ່ໃຫ້ຂໍ້ມູນແກ່ປະຊາຊົນໃຫ້ມີສະຕິລະວັງຕົວ ແລະບໍ່ຫຼົງເຊື່ອຕໍ່ກົນອຸບາຍຂອງບັນດາບໍລິສັດດັ່ງກ່າວເປັນຕົ້ນແມ່ນບໍລິສັດ ພີເອັດສ໌ ສົ່ງເສີມກະສິ ກຳຄົບວົງຈອນຂາເຂົ້າ-ຂາອອກ ຈຳກັດ, ບໍລິສັດ ເອຊຽນເຟສ ຈຳກັດ, ບໍລິສັດ ລາວຄຳ ຈຳກັດ ແລະບໍລິສັດຟາຍແນນໂຊໂອກນອກນີ້ໄດ້ເປັນເຈົ້າການຄົ້ນຄວ້າສະເໜີຂັ້ນເທິງໂຈະຊົ່ວຄາວໃນການອອກອະນຸຍາດສ້າງຕັ້ງສະຖາບັນການເງິນເພື່ອປະເມີນຜົນການເຄື່ອນໄຫວ.

 ກົມຄຸ້ມຄອງສະຖາບັນການເງິນໄດ້ເອົາໃຈໃສ່ພັດທະນາລະບົບບໍລິຫານສະຖາບັນການເງິນຫັນໄປສູ່ທັນສະໄໝໂດຍໄດ້ພັດທະນາໂປຣແກຣມຖານຂໍ້ມູນສະຖິຕິຂອງສະຖາ ບັນການເງິນຈຸລະພາກ 5 ຮູບແບບ ຕາມຜັງບັນຊີໃໝ່ໃຫ້ມີຄວາມຖືກຕ້ອງແລະສອດຄ່ອງກັບມາດຕະຖານສາກົນສາມາດຕິດຕາມການລາຍງານຖານະການເງິນຂອງສະຖາບັນການເງິນໄດ້ແຕ່ລະເດືອນ; ຮ່ວມມືກັບກົມເຕັກໂນໂລຊີ-ຂໍ້ມູນຂ່າວສານ ແລະກົມບັນຊີ-ການເງິນພັດທະນາໂປຼແກມບັນຊີສະຖາບັນການເງິນສຳເລັດ ແລະ ໄດ້ຕິດຕັ້ງໃຫ້ກັບສະຖາບັນການເງິນຈຸລະພາກທີ່ບໍ່ຮັບເງິນຝາກນຳໃຊ້ແລ້ວ 50 ແຫ່ງ; ຮ່ວມກັບພາກສ່ວນກ່ຽວຂ້ອງສ້າງ ແລະປັບປຸງນິຕິກຳໄດ້ 26 ສະບັບ ແລະໃນໄລຍະໂຈະການຂໍສ້າງຕັ້ງສະຖາບັນການເງິນໃນປີ 2017 ໄດ້ສຳເລັດສ້າງ,ປັບປຸງນິຕິກຳ 2 ສະບັບ ແລະນິຕິກຳລຸ່ມກົດໝາຍ 10 ສະບັບກຳລັງຢູ່ໃນຂັ້ນຕອນການປັບປຸງ, ປັບ ປຸງເງື່ອນໄຂການຂໍສ້າງຕັ້ງຂອງສະຖາບັນການເງິນຈຸລະພາກ 9 ສະບັບ.

 ນອກນີ້ຍັງສຳເລັດການສ້າງແຜນດຳເນີນງານໃນການເຂົ້າເຖິງການບໍລິການທາງການເງິນຂອງ ສປປ ລາວ ໃນໄລຍະ 8 ປີ(2018-2025); ສົມທົບກັບສະຖາບັນການທະນາຄານ ແລະ ຄູ່ຮ່ວມພັດທະນາຂອງສາກົນໃນການສ້າງຫຼັກສູດການເງິນຈຸລະພາກຈັດພິມປຶ້ມຕໍາລາຮຽນ 9 ວິຊາ ມີ 1.680 ເຫຼັ້ມ ແລະ ສ້າງຄວາມເຂັ້ມແຂງດ້ານວິຊາການແກ່ຄູອາຈານຂະແໜງການເງິນຈຸລະພາກຊຸກຍູ້ສະມາຄົມການເງິນຈຸລະພາກສ້າງຫຼັກສູດໄລຍະສັ້ນການບໍລິຫານການເງິນຈຸລະພາກໂດຍສຳເລັດ ການສ້າງຄູຝຶກ 24 ຄົນ, ຝຶກອົບຮົມໃຫ້ພະນັກງານ ທຫລ ສາຂາ ແລະສະຖາບັນການເງິນສຳເລັດ 16 ຮຸ່ນມີ 560 ຄົນ.

  ທ່ານຫົວໜ້າກົມດັ່ງກ່າວຍັງກ່າວເຖິງການຈັດຕັ້ງປະຕິບັດໂຄງການຮ່ວມມືກັບອົງການສາກົນຊຶ່ງຜ່ານມາໄດ້ປະກອບສ່ວນໃນການລະດົມທຶນຊ່ວຍເຫຼືອລ້າຈາກສາກົນ ໂຄງການ MRA-AFP ຈຳນວນ 8,59 ລ້ານກ່ວາເອີໂຣແຕ່ປີ 2015-2018 ແລະສືບຕໍ່ໂຄງການໄລຍະ 5 ແຕ່ປີ 2019-2021 ຈໍານວນ 4 ລ້ານ ເອີໂຣ; ສ້າງເງື່ອນໄຂ ແລະ ຊວ່ຍເຫຼືອທາງດ້ານວິຊາການໃນການຫັນກອງທຶນຈຳນວນໜຶ່ງມາເປັນສະຫະກອນສິນເຊື່ອ ແລະ ເງິນຝາກປະຢັດຢ່າງເຕັມຮູບແບບທຽບໃສ່ແຜນປີ 2014 ປະຕິບັດໄດ້ 100%; ມາຮອດເດືອນກັນຍາ 2019 ມີທະນາຄານບ້ານທີ່ຢູ່ພາຍໃຕ້ການສະໜັບສະໜູນຂອງໂຄງການ 712 ກອງທຶນບ້ານ, ມີສະມາຊິກທັງ ໝົດ 106.885 ບັນຊີ, ຍອດເງິນຝາກ 315 ຕື້ກວ່າກີບ, ຍອດເງິນກູ້ 288 ຕື້ກວ່າກີບ ສາມາດຮັກສາໜີ້ບໍ່ເກີດດອກອອກຜົນສະເລ່ຍຂອງທະນາຄານບ້ານຢູ່ໃນລະ ດັບ 3,43% ຂອງຍອດສິນເຊື່ອທັງໝົດ.

  ແຜນການໃນຕໍ່ໜ້າຍັງສືບຕໍ່ຄຸ້ມຄອງສະຖາບັນການເງິນໃຫ້ມີຄວາມໜັກແໜ້ນ-ເຂັ້ມແຂງ, ໝັ້ນຄົງ ແລະຕິດຕາມກວດກາການເຄື່ອນໄຫວຂອງສະຖາບັນການເງິນຢ່າງເຂັ້ມງວດ; ຄົ້ນຄວ້າປັບປຸງສ້າງແຜນຍຸດທະສາດການພັດທະນາ ແລະຄຸ້ມຂອງສະຖາບັນການເງິນໃຫ້ເປັນລະບົບຄົບຊຸດສາມາດຕອບສະໜອງຕາມການຂະຫຍາຍຕົວຂອງສະຖາບັນການເງິນ; ປັບປຸງດຳລັດວ່າດ້ວຍການເຊົ່າສິນເຊື່ອ ແລະ ດຳລັດວ່າດ້ວຍສະຖາບັນການເງິນຈຸລະພາກຜ່ານຂັ້ນເທິງເພື່ອພິຈາລະນາຮັບຮອງ ແລະ ປະ ກາດ ໃຊ້; ສ້າງ ແລະປັບປຸງຂັ້ນຕອນ, ຄູ່ມືການຄົ້ນຄວ້າອອກອະນຸຍາດດຳເນີນທຸລະກິດຂອງສະຖາບັນການເງິນທີ່ຍັງທັນຄົບຖ້ວນໃຫ້ສຳເລັດ, ກະທັດຮັດ ແລະ ປັບປຸງຄູ່ມືການວິເຄາະ, ກວດກາໃຫ້ສອດຄ່ອງກັບເງື່ອນໄຂຄວາມເປັນຈິງ ແລະຫຼັກການສາກົນໃນແຕ່ລະໄລຍະ.

  ສືບຕໍ່ຊຸກຍູ້ສະມາຄົມການເງິນຈຸລະພາກຈັດຝຶກອົບຮົມຫຼັກສູດໄລຍະສັ້ນການບໍລິຫານການເງິນຈຸລະພາກໃຫ້ພະນັກງານ ທຫລ ແລະສະຖາບັນການເງິນຢ່າງໜ້ອຍ 2 ຮຸ່ນຕໍ່ປີ; ສືບຕໍ່ຮ່ວມມືກັບກົມບັນຊີ-ການເງິນຕິດຕາມການຫັນມາໃຊ້ຜັງບັນຊີສະຖາບັນການເງິນຂອງບໍລິສັດເຊົ່າສິນເຊື່ອ ແລະ ໂຮງຊວດຈໍາໃຫ້ສອດຄ່ອງກັບການເຄື່ອນໄຫວຕົວຈິງ; ສືບຕໍ່ຮ່ວມມື 3 ຝ່າຍລະຫວ່າງກົມຄຸ້ມຄອງສະຖາບັນການເງິນ, ໂຄງການ DGRV ແລະສະຫະພັນສະຫະກອນສິນເຊື່ອອາຊີ, ສ້າງຫຼັກສູດການບໍລິຫານສະຫະ ກອນສິນເຊື່ອໄລຍະສັ້ນ ແລະຈັດຝຶກ ອົບຮົບ ໃຫ້ທົ່ວເຖິງສະຫະກອນສິນເຊື່ອ ແລະເງິນຝາກປະຢັດ; ຮ່ວມມືກັບອົງການ GIZ, ໂຄງການ AFP ເພື່ອຊຸກຍຸ້ສົ່ງເສີມການພັດທະນາທະນາຄານບ້ານ, ອົງການເຄືອຂ່າຍໃຫ້ເຕີບໃຫຍ່ຂະຫຍາຍຕົວ ແລະ ເຄື່ອນໄຫວຢ່າງຍືນຍົງ; ເອົາໃຈໃສ່ຍາດແຍ່ງການຊ່ວຍເຫຼືອດ້ານວິຊາ ການຈາກອົງການຈັດຕັ້ງການເງິນສາກົນຕ່າງໆ ເພື່ອພັດທະນາສະຖາບັນການເງິນໃຫ້ເຕີບໃຫຍ່ເຂັ້ມແຂງສືບຕໍ່ສ້າງຄວາມເຂັ້ມແຂງໃຫ້ພະນັກງານ ທຫລ ແລະ ສະ ຖາບັນການເງິນຈຸລະພາກດ້ວຍການຈັດຝຶກອົບຮົມ ແລະສຳມະນາໃນຫົວຂໍ້ຕ່າງໆບໍ່ໃຫ້ຫຼຸດ 20 ຄັ້ງ.

_______________

ຂຽນໂດຍຣັດສະໝີ ດວງສັດຈະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ