ລັດຖະມົນຕີຕ່າງປະເທດອາຊຽນ-ຈີນ ຫາເລື່ອງ COVID-19 ສະໄໝພິເສດ

  ສປປ ລາວ ໄດ້ເປັນເຈົ້າພາບຈັດກອງປະຊຸມລັດຖະມົນຕີຕ່າງປະເທດອາຊຽນ-ຈີນ ສະໄໝພິເສດກ່ຽວກັບການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່, ກອງປະຊຸມໄດ້ຮັບຮອງເອົາຖະແຫຼງການກອງປະຊຸມໃນການຕ້ານ ແລະຮັບມືກັບການແຜ່ລະບາດຂອງພະຍາດ (COVID-19) ແລະໄດ້ມອບໝາຍໃຫ້ຂະແໜງການກ່ຽວຂ້ອງນຳໄປຜັນຂະຫຍາຍໃນລາຍລະອຽດຕໍ່ໄປ.

   ກອງປະຊຸມດັ່ງກ່າວໄດ້ຈັດຂຶ້ນໃນເຊົ້າວັນທີ 20 ກຸມພາ 2020 ທີ່ໂຮງແຮມດອນຈັນພາເລດ, ນະຄອນຫຼວງວຽງຈັນ, ພາຍໃຕ້ການເປັນປະທານຮ່ວມຂອງທ່ານ  Teodoro L. Locsin., Jr, ລັດຖະມົນຕີຕ່າງປະເທດແຫ່ງສາທາລະນະລັດຟີລິບປິນ ແລະທ່ານ Wang Yi, ທີ່ປຶກສາແຫ່ງລັດທັງເປັນລັດຖະມົນຕີຕ່າງປະເທດແຫ່ງ ສປ ຈີນ ສຳລັບຄະນະຜູ້ແທນ ສປປ ລາວເຂົ້າຮ່ວມກອງປະຊຸມຄັ້ງນີ້ນຳໂດຍ ທ່ານ ສະເຫຼີມໄຊ ກົມມະສິດ ລັດຖະມົນຕີຕ່າງປະເທດ ແລະຍັງມີບັນດາລັດຖະມົນຕີຕ່າງປະເທດອາຊຽນ ແລະເລຂາທິການໃຫຍ່ອາຊຽນພ້ອມດ້ວຍພະນັກງານວິຊາການກ່ຽວຂ້ອງເຂົ້າຮ່ວມ 150 ກວ່າທ່ານ.

  ບັນດາລັດຖະມົນຕີຕ່າງປະເທດອາຊຽນໄດ້ສະແດງຄວາມເຫັນອົກເຫັນໃຈແລະຕີລາຄາສູງຕໍ່ມາດຕະການກໍຄືຄວາມພະຍາຍາມຂອງລັດຖະບານ ສປ ຈີນ ໃນການຕ້ານແລະຮັບມືກັບເຊື້ອພະຍາດດັ່ງກ່າວ ແລະເຊື່ອໝັ້ນວ່າລັດຖະບານກໍຄືປະຊາຊົນຈີນຈະສາມາດຜ່ານຜ່າຄວາມຫຍຸ້ງຍາກໃນຄັ້ງນີ້ໄດ້ຢ່າງແນ່ນອນ.

  ກອງປະຊຸມຄັ້ງນີ້ໄດ້ປຶກສາຫາລື ແລະແລກປ່ຽນຄຳຄິດຄຳເຫັນລວມທັງຖອດຖອນບົດຮຽນທີ່ດີຮ່ວມກັນໃນການຊອກຫາຊ່ອງທາງ, ກຳນົດມາດຕະການ ແລະ ຮ່ວມມືກັນເພື່ອປ້ອງກັນ, ຮັບມື ແລະສະກັດກັ້ນການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ນີ້.

  ພິເສດກອງປະຊຸມໄດ້ຮັບຮອງເອົາຖະແຫຼງການກອງປະຊຸມໃນການຕ້ານ ແລະຮັບມືກັບການແຜ່ລະບາດຂອງພະຍາດດັ່ງກ່າວ (Statement of the Special ASEAN-China Foreign Minsters’ Meeting on Corona virus Disease (COVID-19) ແລະໄດ້ມອບໝາຍໃຫ້ຂະແໜງການກ່ຽວຂ້ອງນຳໄປຜັນຂະຫຍາຍໃນລາຍລະອຽດຕໍ່ໄປ.

 ກ່ອນກອງປະຊຸມລັດຖະມົນຕີຕ່າງປະເທດອາຊຽນ-ຈີນສະໄໝພິເສດນີ້, ພາຍໃນອາຊຽນເອງກໍໄດ້ຈັດກອງປະຊຸມສະພາປະສານງານອາຊຽນສະໄໝພິເສດ (Specia l Meeting of the ASEAN Coordinating Council (ACC)) ກ່ຽວກັບການແຜ່ລະບາດຂອງCOVID-19 ພາຍໃຕ້ການເປັນປະທານຂອງຫວຽດ ນາມໃນຖານະປະທານໝູນວຽນອາຊຽນປີ 2020 ໂດຍມີການເຂົ້າຮ່ວມຂອງບັນດາລັດຖະມົນຕີຕ່າງປະເທດອາຊຽນ ແລະເລຂາທິການໃຫຍ່ອາຊຽນ. ກອງປະຊຸມໄດ້ທົບທວນຄືນຄວາມພະຍາຍາມຂອງອາຊຽນໃນການປ້ອງກັນ, ແກ້ໄຂ ແລະຮັບມືກັບພະຍາດ COVID- 19 ແລະໄດ້ກໍານົດທິດທາງໃນຕໍ່ໜ້າ.

 ໃນໄລຍະທັງສອງກອງປະຊຸມນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໃນຖານະເປັນເຈົ້າພາບກອງປະຊຸມກໍໄດ້ປະກອບຄຳຄິດຄຳເຫັນ ແລະແລກປ່ຽນບົດຮຽນທີ່ດີໃນຄວາມພະຍາຍາມຂອງ ສປປ ລາວ ໃນການປ້ອງກັນ, ສະກັດກັ້ນ ແລະ ຮັບມືກັບການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ດັ່ງກ່າວຕໍ່ທີ່ປະຊຸມໄດ້ຮັບຊາບ,  ກອງປະຊຸມສະພາປະສານງານອາຊຽນສະໄໝພິເສດ ແລະກອງປະຊຸມລັດຖະມົນຕີຕ່າງປະເທດອາຊຽນ-ຈີນສະໄໝພິເສດຄັ້ງນີ້ໄດ້ສິ້ນສຸດລົງດ້ວຍຜົນສຳເລັດອັນຈົບງາມ, ຊຶ່ງສະແດງອອກໃນການມີບົດບາດ ແລະປະກອບສ່ວນຢ່າງຫ້າວຫັນຂອງ ສປປ ລາວ.

______________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์