ອ່າງນໍ້າຕຽນ ອີກໜຶ່ງແຫຼ່ງທ່ອງທ່ຽວເມືອງໄຊຍະບູລີ

 ເມືອງໄຊຍະບູລີ ຫຼາຍໆ ຄົນກໍຄົງເຄີຍໄດ້ຍິນເພາະເມືອງໄຊຍະບູລີ ເປັນເມືອງທີ່ຂຶ້ນຊື່ດ້ານການ ທ່ອງທ່ຽວທາງປະຫວັດສາດ ແລະ ວັດທະນະທໍາອັນຫຼາກຫຼາຍປະກອບ ດ້ວຍຫຼາຍຊົນເຜົ່ານອກຈາກນີ້ຍັງ ມີແຫຼ່ງທ່ອງທ່ຽວທາງທໍາມະຊາດ ເປັນຕົ້ນແມ່ນອ່າງນໍ້າຕຽນອ້ອມ ຮອບອ່າງປະກອບດ້ວຍຕົ້ນໄມ້ນ້ອຍ-ໃຫຍ່ ແລະສັດສາວາສິ່ງຫຼາກຫຼາຍ ຊະນິດເຊັ່ນ: ປາ, ແລນ, ເຕົ່າ ແລະ ອື່ນໆ ທີ່ລືຊື່ ແລະມີປະຫວັດຄວາມ ເປັນມາອັນຍາວນານ ແລະໜ້າສົນໃຈ, ອ່າງແຫ່ງນີ້ປະຊາຊົນມັກມາ ທ່ຽວຫຼິ້ນ ແລະຊົມບັນຍາກາດທີ່ສົດ ຊື່ນ.

ອ່າງນໍ້າຕຽນ ເປັນອ່າງທີ່ອຸດົມ ສົມບູນເຕັມໄປດ້ວຍປ່າໄມ້ອັນດົກໜາ ແລະພືດພັນຫຼາຍສິ່ງຫຼາຍຢ່າງ ນອກຈາກຄວາມສວຍງາມເຫຼົ່ານັ້ນ ແລ້ວ, ອາກາດກໍຍັງເປັນມິດກັບຜູ້ຄົນທີ່ໄປຍ່າງຫຼິ້ນ ແລະນັກທ່ອງ ທ່ຽວ, ອ່າງດັ່ງກ່າວຕັ້ງຢູ່ບ້ານໂນນສະຫວັນ ຫ່າງຈາກຕົວເມືອງໄຊຍະບູລີ ໄປທາງທິດໃຕ້ປະມານ 6 ກິໂລແມັດ, ການເຂົ້າເຖິງແມ່ນມີເສັ້ນ ທາງລົດໄປຫາອ່າງນໍ້າຕຽນ ມີ ຄວາມສະດວກສະບາຍ, ໃຊ້ເວລາ ປະມານ 15 ນາທີ.

  ອ່າງນໍ້າຕຽນ ໄດ້ຖືກກໍ່ສ້າງໃນ ປີ 1999 ແລະເປີດນຳໃຊ້ປີ 2002, ລັກສະນະຂອງອ່າງເປັນອ່າງເກັບນໍ້າເພື່ອສະໜອງນໍ້າໃຫ້ແກ່ການຜະລິດກະສິກຳຢູ່ບໍລິເວນອ່າງນໍ້າຕຽນ ຍັງມີຮອຍພະບາດ ແລະທິວທັດທຳມະຊາດທີ່ງົດງາມເໝາະແກ່ການ ພັກຜ່ອນຢ່ອນໃຈ, ສະນັ້ນມັນຈຶ່ງ ຖືກພັດທະນາໃຫ້ເປັນສະຖານທີ່ ທ່ອງທ່ຽວ ຊຶ່ງມີສິ່ງຮອງຮັບສຳລັບນັກທ່ອງທ່ຽວເຊັ່ນ: ຮ້ານອາຫານ, ເຮືອບໍລິການນຳທ່ຽວ, ນອກຈາກ ນີ້ແລ້ວ, ຢູ່ບໍລິເວນດັ່ງກ່າວຍັງມີ ສູນອະນຸລັກຊ້າງສຳລັບນັກທ່ອງ ທ່ຽວທີ່ສົນໃຈໃນການຂີ່ຊ້າງ ຫຼື ສຶກສາຂໍ້ມູນກ່ຽວກັບຊ້າງອີກດ້ວຍ.

---

ໂດຍ: ວົງມະນີ

แชร์