ຍີ່ປຸ່ນ ຊ່ວຍປັບປຸງຊີວິດການເປັນຢູ່ແກ່ຄົນພິການທາງປັນຍາ

    ພິທີເຊັນສັນຍາໂຄງການຊ່ວຍເຫຼືອລ້າໃຫ້ແກ່ອົງການຈັດຕັ້ງທີ່ບໍ່ຂຶ້ນກັບລັດຖະບານໃຫ້ໂຄງການປັບປຸງຊີວິດການເປັນຢູ່ ແລະ ຝຶກວິຊາອາຊີບໃຫ້ແກ່ຄົນພິການ ທາງສະຕິປັນຍາຂອງລັດຖະບານຢີ່ປຸ່ນມູນຄ່າ 217,908 ໂດລາສະຫະລັດ ໄດ້ຈັດຂຶ້ນໃນວັນທີ 31 ມັງກອນ 2019 ລະຫວ່າງ ທ່ານ ຄຸໂນະ ຄາຊູຮິໂລະ ປະທູດຍີ່ປຸ່ນປະຈຳລາວ ແລະທ່ານ ນາງ ຢູກິ ນາກະມຣະ ເລຂາທິການອົງການພັດທະນາອາຊີບ, (ADDP)  ຊຶ່ງ ເປັນອົງການຈັດຕັ້ງທີ່ບໍ່ຂຶ້ນກັບລັດ ຖະບານຍີ່ປຸ່ນ ໂດຍມີທ່ານ ສົມມາດ ທອງສິດທະວົງ, ປະທານປະທານສະມາຄົມຄົນພິການລາວ, ທ່ານ ແສງອາລຸນ ຫຼວງລາດ ຮອງຫົວໜ້າກົມນະໂຍບາຍຜູ້ພິການ, ຜູ້ອາວຸໂສ ແລະພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

  ໂຄງການ “ການພັດທະນາຊີວິດການເປັນຢູ່ໃຫ້ແກ່ຜູ້ພິການທາງສະຕິປັນຍາຢູ່ ສປປ ລາວ” ແມ່ນເປັນປີທີ 3 ຂອງໂຄງການ ແລະ ມີເປົ້າໝາຍທີ່ຈະຊ່ວຍ ເຫຼືອຄົນທີ່ມີປັນຫາໃນການພັດທະນາທາງສະຕິປັນຍາເພື່ອປັບປຸງການດຳລົງຊີວິດໃນປະຈຳວັນ, ຝຶກອົບຮົມວິຊາຊີບສ້າງແບບຢ່າງໃນການເຮັດວຽກທີ່ດີໃຫ້ແກ່ເຂົາເຈົ້າ ແລະເສີມສ້າງຄວາມຮັບຮູ້ໃຫ້ແກ່ສັງຄົມໃຫ້ເຂົ້າໃຈເຖິງຄວາມເປັນໄປໄດ້ໃນການເພິ່ງພາຕົນເອງການດຳລົງຊີວິດໃນສັງຄົມຂອງຜູ້ພິການທາງ ສະຕິປັນຍາ.

   ADDP  ໄດ້ຮ່ວມມືກັບສະມາຄົມຜູ້ພິການທາງສະຕິປັນຍາ (IDU) ໃນການວາງລະບົບແຜນການຊ່ວຍເຫຼືອໃຫ້ແກ່ຜູ້ຕ້ອງການການຊ່ວຍເຫຼືອຮ່ວມກັບ 3 ຝ່າຍຊຶ່ງກໍຄືພໍ່ແມ່, ລາຍລະອຽດສ່ວນໂຕຂອງຜູ້ຕ້ອງການການຊ່ວຍເຫຼືອ ແລະທາງສະມາຄົມຜູ້ພິການທາງສະຕິປັນຍາສຳລັບນັກຮຽນ ADDP ໄດ້ໃຫ້ການຊ່ວຍເຫຼືອຜູ້ພິການທາງສະຕິປັນຍາທັງເດັກນ້ອຍ ແລະຜູ້ໃຫຍ່ໂດຍການໃຫ້ເຂົ້າເຖິງການສຶກສາ, ການຈ້າງງານ ແລະ ບໍລິການປະຈຳວັນສ້າງແບບຢ່າງການເພິ່ງພາຕົນເອງດຳລົົງຊີວິດໃນສັງຄົມຂອງຜູ້ພິການທາງສະຕິປັນຍາໃນນະຄອນຫຼວງວຽງຈັນ.

  ສຳລັບອົງການ ADDP ນີ້ໄດ້ເຄື່ອນໄຫວກິດຈະກໍາການຊ່ວຍເຫຼືອຜູ້ພິການໃນ ສປປ ລາວ ນັບຕັ້ງແຕ່ປີ 1995 ເປັນຕົ້ນມາພາຍໃຕ້ການສະໜັບສະໜູນທຶນຈາກລັດຖະບານຍີ່ປຸ່ນຕັ້ງແຕ່ປີ 2011 ທາງອົງການໄດ້ຈັດຕັ້ງປະຕິບັດໂຄງການຕ່າງໆເພື່ອເສີມສ້າງຄວາມອາດສາມາດຂອງຜູ້ພິການທາງກາຍະພາບໃນນະຄອນຫຼວງວຽງຈັນ ແລະແຂວງຫົວພັນ.

แชร์