ທ່ຽວຊົມທໍາມະຊາດອ່າງນໍ້າງື່ມໃຫ້ຊື່ນໃຈ

  ເຂື່ອນນໍ້າງື່ມ, ນອກຈາກຈະເປັນບ່ອນຜະລິດກະແສໄຟຟ້າມາຮັບໃຊ້ສັງຄົມທັງພາຍໃນ ແລະ ຕ່າງປະເທດແລ້ວຍັງເປັນສະຖານທີ່ທ່ອງທ່ຽວທີ່ໂດດເດັ່ນ ແລະ ມີຊື່ສຽງໂດ່ງດັງໄປທຸກສາລະທິດອີກດ້ວຍ,ຊຶ່ງຕັ້ງຢູ່ເຂດບ້ານແສງສະຫວ່າງເມືອງແກ້ວອຸດົມ ແຂວງວຽງຈັນ ຫ່າງຈາກຕົວເມືອງໄປທາງທິດເໜືອປະມານ 8 ກິໂລແມັດ ແລະປະ ກອບໄປດ້ວຍເກາະດອນນ້ອຍ-ໃຫຍ່ ຢັງຢາຍກັນໄປ 2 ພັນກວ່າດອນ,ອ່າງນໍ້າງື່ມໄດ້ກາຍເປັນສະຖານທີ່ທ້ອງທ່ຽວໄປພ້ອມໆກັບການສ້າງເຂື່ອນນໍ້າງື່ມຂຶ້ນໃນປີ 1962, ຊຶ່ງມີຄວາມກວ້າງໃຫຍ່ສຸດຂົ່ວສາຍຕາເປັນຮູບລັກສະນະຄ້າຍຄືກັບອ່າງຈຶ່ງເອີ້ນກັນວ່າ: ອ່າງນໍ້າງຶ່ມທີ່ເປັນນໍ້າສີຂຽວມໍລະກົດແສນສວຍສົດງົດງາມຈຶ່ງໄດ້ຂະໜານນາມວ່າ : ທະເລສາບແຫ່ງເມືອງລາວ.

  ອ່າງນໍ້າງື່ມຍັງອຸດົມສົມບູນໄປດ້ວຍປູ, ປາ, ກຸ້ງ, ຫອຍເໝາະແກ່ການມາພັກຜ່ອນຢ່ອນໃຈໃນທ້າຍອາທິດພາຄອບຄົວ, ໝູ່ເພື່ອນ ແລະຄົນຮັກມາກິນປາສົດໆ ຂີ່ເຮືອຊົມວີວໄປພ້ອມໆກັບບັນຍາກາດສຽງເພງບ້ານນາພາໃຫ້ຈິດໃຈສົດຊື່ນດີຂຶ້ນ,ອ່າງນໍ້າງື່ມຍັງມີຈຸດແວ່ຊົມວີວອີກ, ຊຶ່ງເປັນຕຶກສີຂາວໂລ່ງທີ່ມີຂັ້ນໄດບໍລິການຂຶ້ນ-ລົງຢ່າງສະ ດວກສະບາຍ, ນອກຈາກນີ້ຍັງສາມາດທ່ຽວຊົມທີວທັດທໍາມະຊາດ ແລະຮູ້ຈັກກັບດອນທ້າວ-ດອນນາງ ອັນເປັນສະຖານທີ່ດັດສ້າງນັກ ໂທດຊາຍ-ຍິງໃຫ້ກັບກາຍມາເປັນຄົນດີໃນສັງຄົມດ້ວຍການຮໍ່າຮຽນທິດສະດີການເມືອງ,ຮໍ່າຮຽນການປະກອບອາຊີບທີ່ຖືກຕ້ອງຕາມລະບຽບກົດໝາຍ, ຊຶ່ງໃນນັ້ນມີ: ມີອາຊີບຈັກສານທຸກປະເພດ, ອາຊີບປູກຝັງ-ລ້ຽງສັດ, ຈະໄດ້ເຫັນເຖິງສີໄມ້ລາຍມື ແລະຄວາມອົດທົນພາກພຽນຂອງນັກໂທດເຫຼົ່ານັ້ນໄດ້ປັບປຸງ ແລະປ່ຽນແປງຕົນເອງມາເປັນຄົນດີໃນສັງຄົມ, ຊຶ່ງນັກທອງທ່ຽວທຸກຄົນສາມາດຊື້ຜະລິດຕະພັນຕ່າງໆທີ່ເປັນຜົນງານຂອງນັກໂທດມາຮັບໃຊ້ສ່ວນຕົວໄດ້, ຊື້ເປັນປະເພດອາຫານການກິນຜັກ-ໝາກໄມ້, ເປັດ-ໄກ່ມາຮັບໃຊ້ຄອບຄົວ ໄດ້.

_______________

ຂຽນໂດຍ: ຊາຍພະເນຈອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์