ຍີ່ປຸ່ນ ສະໜອງທຶນໃຫ້ວິທະຍາໄລວິຊາຊີບສະຫວັນນະເຂດ

 ລັດຖະບານຍີ່ປຸນສະໜອງທຶນຊ່ວຍເຫຼືອລ້າຈຳນວນ 147,657 ໂດລາ ເພື່ອສະໜັບສະໜູນໂຄງການເສີມຂະຫຍາຍການຝຶກອົບຮົມທັກສະການຕັດຫຍິບເສື້ອຜ້າຢູ່ ແຂວງສະຫວັນນະເຂດ ສປປ ລາວ.

  ໃນວັນທີ 14 ກຸມພາຜ່ານມາໄດ້ມີການເຊັນສັນຍາມອບຮັບທຶນຂອງໂຄງການດັ່ງກ່າວທີ່ສະຖານທູດຍີ່ປຸ່ນໃນ ສປປ ລາວ ລະຫວ່າງທ່ານ ທາເກວະກະ ເຄໂຊ ເອກອັກ ຄະຣາຊະທູດຍີ່ປຸ່ນປະຈຳ ສປປ ລາວ, ແລະທ່ານ ນາງ ໂຄດາມະມາຊາໂຢະ, ປະທານອົງການ Re born Kyoto, ອົງການທີ່ບໍ່ສະແຫວງຜົນກຳໄລຜູ້ທີ່ຈະມາລິເລີ່ມ ແລະບໍລິຫານໂຄງການດັ່ງກ່າວ.

 ທຶນຊ່ວຍເຫຼືອລ້າດັ່ງກ່າວຈະນຳໃຊ້ເຂົ້າໃນການເຄື່ອນໄຫວວຽກ ງານຕ່າງໆຂອງໂຄງການໄລຍະໜຶ່ງປີທີ່ມີຊື່ວ່າ “ໂຄງການເສີມຂະຫຍາຍການຝຶກອົບຮົມທັກສະການຕັດຫຍິບເສື້ອຜ້າຢູ່ວິທະຍາໄລວິຊາຊີບສະຫວັນນະເຂດ ສາຂາເຊໂປນ.”

 ໂຄງການດັ່ງກ່າວແນໃສ່ປະກອບສ່ວນສ້າງໂອກາດໃຫ້ແມ່ຍິງ ແລະໄວໜຸ່ມໃນເຂດພູດອຍຂອງລາວໄດ້ສ້າງລາຍຮັບໃຫ້ຕົນເອງເພີ່ມຕື່ມໂດຍຜ່ານການນຳໃຊ້ເຕັກນິກການຕັດຫຍິບເສື້ອຜ້າທີ່ສອນຢູ່ວິທະຍາໄລດັ່ງກ່າວ.

   ອົງການ Reborn Kyoto ຈະສະໜອງການຊ່ວຍເຫຼືອທາງວິຊາການດ້ານການຕັດຫຍິບເສື້ອຜ້າ ແລະການບຳລຸງຮັກສາຈັກຫຍິບເຄື່ອງລວມໄປເຖິງການສົ່ງຜູ້ຊ່ຽວຊານຍີ່ປຸ່ນມາໃຫ້ການຊ່ວຍເຫຼືອນຳອີກ.

  ສິນຄ້າທີ່ຜະລິດໄດ້ຈະຖືກນຳມາຂາຍໃນລາຄາທີ່ເປັນເອກະພາບທັງໃນລາວ ແລະຍີ່ປຸ່ນ, ທຶນຊ່ວຍເຫຼືອລ້າດັ່ງກ່າວຍັງຈະສະໜອງໂອກາດໃນການເສີມຂະຫຍາຍທັກສະໃຫ້ແກ່ປະຊາຊົນໃນຂົງເຂດເມືອງເຊໂປນ ໂດຍຜ່ານການຝຶກອົບຮົມຕ່າງໆ.

 ນັບຕັ້ງແຕ່ຖືກສ້າງຕັ້ງຂຶ້ນໃນປີ 1979 ເປັນຕົ້ນມາ, ອົງການ Reborn Kyoto ໄດ້ໃຫ້ການສະໜັບສະໜູນຄວາມເປັນເອກະລາດທາງດ້ານເສດຖະກິດ ແລະແນວຄິດໃຫ້ແກ່ແມ່ຍິງ ແລະໄວໜຸ່ມໃນ 8 ປະເທດລວມທັງໃນຍີ່ປຸ່ນໂດຍຜ່ານການຝຶກສອນເຕັກນິກການຕັດຫຍິບເສື້ອຜ້າໂດຍນຳໃຊ້ຊຸດກິໂມໂນແບບດັ້ງເດີມຂອງຍີ່ປຸ່ນທີ່ໄດ້ຮັບບໍລິຈາກມາ.

_______________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์