ປະຊາຊົນບ້ານຫ້ວຍດໍາໃໝ່ ຮຽນຮູ້ເຕັກນິກເຮັດຝຸ່ນບົ່ມ

 ພະແນກກະສິກຳ ແລະປ່າໄມ້ ແຂວງເຊກອງ ຮ່ວມກັບເຂື່ອນໄຟຟ້າຫ້ວຍລໍາພັນໃຫຍ່ໄດ້ຈັດຝຶກອົບຮົມເຕັກນິກການເຮັດຝຸ່ນບົ່ມຊີວະພາບໃຫ້ປະຊາຊົນບ້ານຫ້ວຍດໍາໃໝ່ ເມືອງທ່າແຕງໃນທ້າຍອາທິດຜ່ານມາທີ່ສະໂມສອນຂອງບ້ານດັ່ງກ່າວ,ໂດຍການເປັນປະທານຂອງທ່ານ ເສີມສີ ສຸລິຕະຮອງຫົວ ໜ້າພະແນກກະສິກຳ ແລະປ່າໄມ້ ແຂວງເຊກອງ,ໃຫ້ກຽດເຂົ້າຮ່ວມຂອງ ທ່ານ ຄໍາມະນີ ອິນທະລັງສີ ຜູ້ອໍານວຍການເຂື່ອນໄຟຟ້າຫ້ວຍລໍາພັນໃຫຍ່, ມີບັນດາຮອງຫົວໜ້າຂະແໜງປູກຝັງ, ພ້ອມດ້ວຍພະນັກ ງານວິຊາການທັງສອງຝ່າຍ ແລະ ພໍ່ແມ່ປະຊາຊົນພາຍໃນບ້ານ 30 ກວ່າຄົນເຂົ້າຮ່ວມ.

  ທ່ານ ເສີມສີ ສຸລິຕະຮອງຫົວໜ້າພະແນກກະສິກຳ ແລະປ່າໄມ້ ແຂວງເຊກອງຊີ້ແຈງວ່າ: ຝຸ່ນຊີວະພາບແມ່ນຝຸ່ນອິນຊີ ຫຼື ຝຸ່ນທໍາມະຊາດຊະນິດໜຶ່ງທີ່ມີປະໂຫຍດໃນ ການປັບປຸງບຳລຸງດິນ, ສາມາດຜະລິດໄດ້ງ່າຍໃຊ້ເວລາໜ້ອຍ ໂດຍ ການນຳເສດວັດຖຸເຫຼືອໃຊ້ປະສົມໝັກລວມກັບຂີ້ສັດ, ແກບດຳ, ຮຳ ອ່ອນ ປົກດ້ວຍກະເປົ໋າປ່ານໝັກໄວ້ 3 ມື້, ສາມາດນຳໃຊ້ໄດ້, ສຳລັບ ສ່ວນປະສົມໃນການເຮັດຝຸ່ນໝັກຊີວະພາບປະກອບມີ: ຂີ້ສັດແຫ້ງ 1 ຄຸ, ຂີ້ແກບ 1 ຄຸ, ຮຳອ່ອນ 1 ກິໂລ ຖ້າໄດ້ 1 ຄຸນຳກັນ ຍິ່ງເປັນການດີ, ນ້ຳສະກັດຊີວະພາບ, ກາກນ້ຳຕານ ແລະວັດຖຸທີ່ຫາໄດ້ໃນທ້ອງຖິ່ນ ເຊັ່ນ: ແກບ, ຂີ້ອ້ອຍ, ຂີ້ເລື່ອຍ, ເປືອກຖົ່ວດິນ, ຖົ່ວຂຽວ, ໄຍໝາກພ້າວ ແລະ

ອື່ນໆຈຳນວນ 1 ຄຸ, ຜົນປະໂຫຍດທີ່ຈະໄດ້ໃນການໃສ່ຝຸ່ນ ບົ່ມນີ້ ແມ່ນການເພີ່ມປະລິມານອິນ ຊີວັດຖຸໃນດິນ ແລະສາມາດຮັກສາຄວາມອຸດົມສົມບູນຂອງດິນ, ພ້ອມນັ້ນ ຍັງຊ່ວຍຮັກສາຄວາມຊຸ່ມຂອງດິນ ແລະຊ່ວຍການຖ່າຍເທອາກາດໄດ້ດີຂຶ້ນພ້ອມທັງເພີ່ມທາດໂຕເຈນໃຫ້ກັບດິນ, ບໍ່ເປັນອັນຕະລາຍຕໍ່ດິນ ແລະພືດຊະນິດອື່ນໆ, ເຖິງວ່າຈະໃຊ້ໃນປະລິມານທີ່ຫຼາຍ ແລະຍາວນານ ຊຶ່ງມັນຍັງຈະປັບສະພາບແວດລ້ອມໃຫ້ດີຂຶ້ນ ແລະ ປະຢັດຕົ້ນທຶນ, ຜະລິດງ່າຍໃຊ້ເວລາໜ້ອຍ, ສະເພາະການເກັບຮັກສາຝຸ່ນ ເພື່ອໃຫ້ໃຊ້ໄດ້ຍາວນານນັ້ນຄວນໃສ່ເປົ໋າແລ້ວເກັບໄວ້ໃນບ່ອນທີ່ແຫ້ງ ແລະຮົ່ມມັນຈະຊ່ວຍເກັບໄດ້ດົນເຖິງ 1 ປີ. ທັງນີ້ ກໍເພື່ອຊ່ວຍບຳລຸງ,ປ້ອງກັນພະຍາດພືດຜັກ ແລະຕົ້ນໄມ້ໃຫ້ໝາກ.

 ຮອງຫົວໜ້າພະແນກກະສິກຳ ແລະປ່າໄມ້ ແຂວງເຊກອງ ຍັງໄດ້ກ່າວເນັ້ນໝັກໃຫ້ປະຊາຊົນກໍຄືນັກສຳມະກອນພາຍໃນບ້ານຫ້ວຍດໍາໃໝ່ໃຫ້ມີສະຕິ ແລະ ຫຼີກລ້ຽງ ການນຳໃຊ້ປຸ໋ຍເຄມີ, ຢາປາບສັດຕູພືດຊຶ່ງມີຜົນກະທົບຕໍ່ຜູ້ບໍລິໂພກ. ຫຼັງຈາກນັ້ນກໍໄດ້ສາທິດເຮັດທົດລອງຕົວຈິງກ່ຽວກັບການເຮັດຝຸ່ນບົ່ມຊີວະພາບຮ່ວມກັບປະຊາຊົນພາຍໃນບ້ານດັ່ງກ່າວເພື່ອເຮັດໃຫ້ປະຊາຊົນນໍາເອົາບົດຮຽນຝຶກອົບຮົມຄັ້ງນີ້ນໍາໄປໃຊ້ເຂົ້າໃນການປູກພືດກະສິກໍາໃນເຮືອນຄົວຂອງຕົນເອງດ້ວຍຄວາມຮັບຜິດຊອບສູງ.

___________

ຂຽນໂດຍ: ພອນ ບຸນອຸທິດ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์