ນາຍົກສະເໜີອົງການ FAO ຈົ່ງສືບຕໍ່ຊ່ວຍເຫຼືອລາວ

 ໃນຕອນເຊົ້າຂອງວັນທີ 19 ກຸມພາ 2020 ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງທ່ານ Dr. QuD ongyu, ຜູ້ອຳນວຍການໃຫຍ່ອົງການອາຫານ ແລະ ການກະເສດ (FAO) ຊຶ່ງມີສຳນັກງານໃຫຍ່ຕັ້ງຢູ່ນະຄອນຫຼວງໂຣມ, ປະເທດອີຕາລີ, ພ້ອມດ້ວຍຄະນະໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການໃນລະຫວ່າງວັນທີ 18-20 ກຸມພາ 2020.

  ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະຊົມເຊີຍຕໍ່ທ່ານ Dr. QuDongyu ທີ່ໄດ້ດຳລົງຕຳແໜ່ງເປັນຜູ້ອຳນວຍການໃຫຍ່ຄົນໃໝ່ຂອງອົງການ FAO ເມື່ອບໍ່ດົນມານີ້, ພ້ອມທັງໄດ້ຕີລາຄາສູງຕໍ່ການຢ້ຽມຢາມ ສປປ ລາວ ໃນຄັ້ງນີ້, ຊຶ່ງເປັນການຮັດແໜ້ນສາຍພົວພັນການຮ່ວມມືລະຫວ່າງ ສປປລາວ ແລະອົງການ FAO ໃຫ້ແໜ້ນແຟ້ນຂຶ້ນກວ່າເກົ່າ, ທັງເປັນການປຶກສາຫາລືແລກປ່ຽນກ່ຽວກັບບັນດາໂຄງການຮ່ວມມືໃນໄລຍະຜ່ານມາ ແລະ ແນວທາງການຮ່ວມມືໃນຕໍ່ໜ້າໂດຍສະເພາະແມ່ນຂໍ້ລິເລີ່ມຈາກມືສູ່ມື (Hand-in-Hand Initiative) ຂອງຜູ້ອຳນວຍການໃຫຍ່, ໂດຍຈຸດປະສົງເພື່ອນຳເອົາການຊ່ວຍເຫຼືອຈາກບັນດາຄູ່ຮ່ວມພັດທະນາມາສູ່ບັນດາປະເທດທີ່ມີຄວາມຈຳເປັນ.

 ໃນໂອກາດນີ້, ທ່ານນາຍົກລັດຖະມົນຕີກໍ່ໄດ້ສະແດງຄວາມຂອບໃຈມາຍັງອົງການ FAO ທີ່ໄດ້ປະກອບສ່ວນໃນການລະດົມຂົນຂວາຍທຶນເຂົ້າໃນການປັບປຸງ ແລະພັດທະ ນາວຽກງານໃນຂົງເຂດກ່ຽວຂ້ອງໂດຍຜ່ານບັນດາໂຄງການຕ່າງໆທີ່ໄດ້ຈັດຕັ້ງປະຕິບັດຮ່ວມກັບຂະແໜງການພາກລັດຂອງລາວລວມເຖິງບັນດາໂຄງການຊ່ວຍເຫຼືອທີ່ຈະ ເກີດມີໃນອະນາຄົດ,ນອກຈາກນີ້ທ່ານນາຍົກລັດຖະມົນຕີຍັງໄດ້ແຈ້ງໃຫ້ທ່ານຜູ້ອຳນວຍການໃຫຍ່ອົງການ FAO ຊາບກ່ຽວກັບສະພາບການພັດທະນາກໍ່ຄືຈຸດພິເສດທາງດ້ານທ່າແຮງ, ຂໍ້ຈຳກັດ ແລະ ການດຳລົງຊີວິດຂອງປະຊາຊົນລາວໂດຍສະເພາະຢູ່ເຂດຊົນນະບົດຫ່າງໄກສອກຫຼີກ, ລວມທັງຄວາມພະຍາຍາມ ແລະ ເອົາໃຈໃສ່ຂອງທຸກພາກສ່ວນທີ່ກ່ຽວຂ້ອງໃນການພັດທະນາຊົນນະບົດ, ປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນເພື່ອບັນລຸຄາດໝາຍຕ່າງໆ ທີ່ວາງໄວ້ໂດຍສະເພາະການສຸມໃສ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016- 2020) ກໍ່ຄືການກະກຽມໃຫ້ແກ່ການສ້າງແຜນພັດທະນາເສດຖະກິດ-ສັງຄົມ  5 ປີ ຄັ້ງທີ IX (2021-2025), ລວມທັງການຈັດຕັ້ງປະຕິບັດວິໄສທັດຮອດປີ 2030 ເພື່ອການພັດທະນາແບບຍືນຍົງ, ຄວາມພະຍາຍາມເຮັດໃຫ້ ສປປ ລາວ ຫຼຸດພົ້ນອອກຈາກສະຖານະພາບປະເທດດ້ອຍພັດທະນາໂດຍສະເພາະການລຶບລ້າງຄວາມທຸກຍາກ ແລະ ການລຶບລ້າງໄພອຶດຫິວກໍ່ຄືການປັບປຸງຊີວິດການເປັນຢູ່ຂອງປະຊາ ຊົນໃຫ້ດີຂຶ້ນ, ຊຶ່ງວຽກງານເຫຼົ່ານັ້ນລ້ວນແຕ່ເປັນວຽກທີ່ຕິດພັນໂດຍກົງກັບວຽກບູລິມະສິິດ ແລະເປົ້າໝາຍຂອງອົງການ FAO ໃນຕອນທ້າຍ, ທ່ານນາຍົກລັດຖະມົນຕີຍັງໄດ້ສະເໜີໃຫ້ທ່ານຜູ້ອຳນວຍການໃຫຍ່ອົງການ FAO ຈົ່ງສືບຕໍ່ໃຫ້ການສະໜັບສະໜູນ ແລະຊ່ວຍເຫຼືອແກ່ ສປປ ລາວ ໃນການຈັດຕັ້ງປະຕິບັດແຜນການ,ໂຄງການທີ່ຕິດພັນກັບການພັດທະນາພັດທະນາຊົນນະບົດ, ລຶບລ້າງຄວາມທຸກຍາກ ແລະໄພອຶດຫົວໃຫ້ບັນລຸຜົນສຳເລັດຕາມຄາດໝາຍທີ່ວາງໄວ້.

  ໃນໂອກາດດຽວກັນ, ທ່ານຜູ້ອຳນວຍການໃຫຍ່ອົງການ FAO ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະການເດີນທາງມາຢ້ຽມຢາມໃນຄັ້ງນີ້ສະແດງໃຫ້ເຫັນເຖິງການຮ່ວມມືທີ່ດີລະຫວ່າງ ສປປ ລາວ ແລະອົງການ FAO ໃນໄລຍະຜ່ານມາ ແລະການເອົາໃຈໃສ່ເປັນພິເສດໃນການຮ່ວມມືໃນວຽກງານການຄໍ້າປະກັນສະ ບຽງອາຫານ ແລະປັບປຸງໂພຊະນາການ, ອົງການ FAO ໄດ້ມີການຮ່ວມມືກັບ ສປປ ລາວຕັ້ງແຕ່ປີ 1975 ເປັນຕົ້ນມາ ແລະ ໄດ້ສ້າງຕັ້ງຫ້ອງການຜູ້ຕາງໜ້າຂອງຕົນປະຈຳ ສປປ ລາວ ໃນປີ 1980 ປະຈຸບັນ, ສປປ ລາວ ແລະອົງການ FAO ກຳລັງຈັດຕັ້ງປະຕິບັດແຜນງານຊ່ວຍເຫຼືອ ສປປ ລາວ ຊຶ່ງມີມູນຄ່າ 37 ລ້ານໂດລາສະຫະ ລັດ ສຳລັບໄລຍະປີ 2016-2021.

_____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์