ຊ່ຽວຊານໂຄງການພັດທະນາຊົນນະບົດ ເຢຍລະມັນ ເຄື່ອນໄຫວເຮັດວຽກຢູ່ຜົ້ງສາລີ

 ເພື່ອກະກຽມໂຄງການເບື້ອງຕົ້ນຢູ່ບັນດາແຂວງທີ່ສະເໜີຂໍງົບປະມານຈາກລັດຖະບານເຢຍລະມັນເພື່ອກໍ່ສ້າງເສັ້ນທາງຊົນນະບົດຢູ່ແຂວງຫົວພັນ, ຊຽງຂວາງ, ຫຼວງພະບາງ ແລະແຂວງ ຜົ້ງສາລີ ເພື່ອກະກຽມໂຄງການ, ເບິ່ງສະພາບທາງໃນປະຈຸບັນ, ບຸລິມະລິດຂອງແຂວງວ່າມີຄວາມຈໍາເປັນຕ່າງໆນັ້ນ, ວັນທີ 17 ກຸມພາ 2020 ນີ້ຊ່ຽວຊານໂຄງການພັດທະນາຊົນນະບົດ (KfW) ສສ ເຢຍລະມັນນຳໂດຍທ່ານ ນາງ ອາເລັກ ຊັນດາ ຊ່ຽວຊານໂຄງການພັດທະນາຊົນນະບົດ (KfW) ສສ ເຢຍລະ ມັນພ້ອມດ້ວຍຜູ້ຕາງ ໜ້າຈາກກະຊວງໂຍທາທິການ ແລະຂົນສົ່ງໄດ້ເຄື່ອນໄຫວເກັບກຳຂໍ້ມູນເພື່ອກຽມໂຄງການຢູ່ແຂວງຜົ້ງສາລີ.

   ທ່ານ ບົວທອງ ອູແສງຄຳ ປະທານສະພາປະຊາຊົນແຂວງຜົ້ງສາລີໄດ້ລາຍງານສະພາບການພັດທະນາເສດຖະກິດ-ສັງຄົມ ແລະການກໍ່ສ້າງພື້ນຖານໂຄງລ່າງຂອງ ແຂວງຜົ້ງສາລີໃຫ້ຄະນະໄດ້ຮັບຊາບ, ຊຶ່ງແຂວງຜົ້ງສາລີເປັນ ແຂວງພູດອຍ ພ້ອມທັງເຫວເລິກພູສູງກວມ 90% ສະນັ້ນ, ຈຶ່ງເຮັດໃຫ້ການກໍ່ສ້າງພື້ນຖານໂຄງລ່າງ, ການພັດທະນາເສດຖະກິດ-ສັງຄົມ ມີຄວາມຫຍຸ້ງຍາກ, ການດຶງດູດນັກລົງທຶນເຂົ້າມາລົງທຶນຍັງຈຳກັດ, ການລົງທຶນຍັງມີຄວາມສ່ຽງ, ເຮັດໃຫ້ຊິວິດການເປັນຢູ່ຂອງປະຊາຊົນພົບຄວາມຫຍຸ້ງຍາກ.

  ຈາກນັ້ນ ທ່ານນາງ ອາເລັກ ຊັນດາ ຊ່ຽວຊານໂຄງການພັດທະນາຊົນນະບົດ (KfW) ສສ ເຢຍລະມັນ ໄດ້ລາຍງານຈຸດປະສົງຂອງການມາຢ້ຽມຢາມ ແລະເຮັດວຽກໃນຄັ້ງນີ້ ກໍເພື່ອລົງເກັບກໍາຂໍ້ມູນ ກ່ຽວກັບການກໍ່ສ້າງພື້ນຖານໂຄງ ລ່າງພັດທະນາຊົນນະບົດຢູ່ແຂວງ ຜົ້ງສາລີເປັນຕົ້ນແມ່ນຂົງເຂດວຽກງານໂຍທາທິການ ແລະຂົນສົ່ງ, ວຽກງານສຶກສາທິການ ແລະ ກີລາ, ວຽກງານສາທາລະນາສຸກ, ວຽກງານກະສິກໍາເພື່ອນໍາສະເໜີໃຫ້ລັດຖະບານເຢຍລະມັນໃຫ້ທຶນຊ່ວຍເຫຼືອໃນການພັດທະນະພື້ນ ຖານໂຄງລ່າງເຂດຊົນນະບົດ ແລະເພື່ອແກ້ໄຂຄວາມທຸກຍາກຂອງແຂວງຜົ້ງສາລີໃຫ້ດີຂຶ້ນເທື່ອລະກ້າວ.

  ທ່ານ ນາງ ອາເລັກຊັນດາ ຍັງເປັນປະທານຮ່ວມກັບ ທ່ານ ບຸນທະວີ ສໍສຸກັນ ຫົວໜ້າພະແນກໂຍທາທິການ ແລະຂົນສົ່ງແຂວງຜົ້ງສາລີ ຮ່ວມເປີດກອງປະຊຸມປຶກສາຫາລືລະຫວ່າງຊ່ຽວຊານໂຄງການພັດທະນາຊົນນະບົດ (KfW) ສສ ເຢຍລະມັນ ກັບພະແນກການທີ່ກ່ຽວຂ້ອງໂດຍມີພະແນກໂຍທາທິການ ແລະ ຂົນສົ່ງ, ພະແນກສຶກສາທິການ ແລະກີລາ, ພະແນກສາທາສາທາລະນາສຸກ, ພະແນກກະສິ ກໍາ-ປ່າໄມ້ ເພື່ອກຽມຂໍ້ມູນສະເໜີຂໍທຶນຈາກໂຄງການດັ່ງກ່າວ,ພ້ອມນັ້ນຄະນະຍັງໄດ້ລົງເບິ່ງຕະຫຼາດ, ສຸກສາລາກຸ່ມບ້ານຕ້າງ, ສຳຫຼວດ ເບິ່ງເສັ້ນທາງແຕ່ແຍກສຸກສາລາບ້ານຕ່າລິຊຸ ຫາບ້ານລາວແມ້ວ ແລະບ້ານຊຽວລີຊູ, ແຕ່ແຍກສຸກສາລາບ້ານຕ່າລິຊຸຫາບ້ານສີນຈ້າຍ ແລະຈົນຮອດເຂດ ບ້ານມາລີເທົາ ເມືອງຍອດອູ ແລະທາງທີມງານຍັງໄດ້ເຄື່ອນໄຫວຢູ່ເມືອງຜົ້ງສາລີ ແລະເມືອງສຳພັນຕື່ມອີກ.

______________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์