ໄຊສົມບູນສຳເລັດກອງປະຊຸມຄົບຄະນະບໍລິຫານງານພັກແຂວງ

  ກອງປະຊຸມຄົບຄະນະບໍລິຫານງານພັກ ແຂວງໄຊສົມບູນ ເປີດກວ້າງປະຈຳປີ 2019 ແລະທິດທາງແຜນການ ປີ 2020 ໄດ້ສໍາເລັດລົງ ໃນວັນທີ 18 ກຸມພາ ພາຍຫຼັງດໍາເນີນມາເປັນເວລາ 2 ວັນ ທີ່ສະໂມສອນ ເມືອງອະນຸວົງ ໂດຍການເປັນປະທານຂອງສະຫາຍ ພົຕ ຄໍາລຽງ ອຸທະໄກສອນ ເລຂາຄະນະບໍລິຫານງານພັກແຂວງ, ເຈົ້າແຂວງໄຊສົມບູນ, ມີຄະນະປະຈຳພັກແຂວງ, ກຳມະການພັກແຂວງ, ເຈົ້າເມືອງ 5 ເມືອງ, ເລຂາຄະນະພັກຮາກຖານ, ເລຂາໜ່ວຍພັກບັນດາພະແນກການ, ອົງ ການ, ກົມກອງອ້ອມຂ້າງແຂວງເຂົ້າຮ່ວມ.

  ຕະຫຼອດໄລຍະດຳເນີນກອງປະຊຸມຄະນະບໍລິຫານງານພັກແຂວງໄດ້ພ້ອມກັນຕີລາຄາຕໍ່ການເຄື່ອນໄຫວວຽກງານຮອບດ້ານໃນໄລຍະ 1 ປີຜ່ານມາພ້ອມທັງກໍານົດທິດ ທາງວຽກງານຈຸດສຸມ ປີ 2020, ໄດ້ຮັບຟັງແຜນດຳເນີນກອງປະຊຸມໃຫຍ່ອົງຄະນະພັກເມືອງທີ່ຍັງເຫຼືອ, ພ້ອມນີ້ກອງປະຊຸມຍັງໄດ້ດຳເນີນຊີວິດການເມືອງ, ສຳຫຼວດກວດກາພາຍໃນຄະນະພັກ, ນອກຈາກນັ້ນຜູ້ແທນກອງປະຊຸມໄດ້ພ້ອມກັນປະກອບຄຳຄິດຄຳເຫັນດ້ວຍຄວາມຮັບຜິດຊອບສູງບົນພື້ນຖານຄວາມເປັນເອກະພາບທັງຮັບ ຮອງເອົາບັນດາວຽກງານທີ່ສຳຄັນ ໂດຍສະເພາະ ແມ່ນວຽກງານປ້ອງກັນຊາດ-ປ້ອງກັນຄວາມ ສະຫງົບ ໂດຍສຸມໃສ່ແກ້ໄຂປະກົດການຫຍໍ້ທໍ້ ໃນສັງຄົມເຮັດໃຫ້ແຂວງມີສະຖຽນລະພາບການເມືອງຢ່າງໜັກແໜ້ນ, ສຳລັບທິດທາງແຜນການໃນປີ 2020 ນີ້ຕ້ອງສືບຕໍ່ພັດທະນາເສດຖະກິດ ແລະແກ້ໄຂຄວາມທຸກຍາກຂອງປະຊາຊົນໂດຍຊຸກຍູ້ສົ່ງເສີມໃຫ້ປະຊາຊົນຜະລິດເປັນສິນຄ້າພ້ອມທັງຮັກສາສະຖຽນລະພາບທາງດ້ານການເມືອງ, ເສດຖະກິດມະຫາພາກໃຫ້ໝັ້ນທ່ຽງ ແລະ ຂະຫຍາຍຕົວຢ່າງຕໍ່ ເນື່ອງໃຫ້ໄດ້ອັດຕາຂະຫຍາຍຕົວຢູ່ລະດັບ 7%, ລວມຍອດຜະລິດຕະພັນພາຍໃນ (GDP) ໃຫ້ບັນລຸ 1.122 ຕື້ກີບ, ສະເລ່ຍໃສ່ຫົວຄົນໃຫ້ໄດ້ 11,638 ລ້ານກີບຕໍ່ຄົນຕໍ່ປີ ຫຼື ເທົ່າກັບ 1.377 ໂດລາຕໍ່ຄົນຕໍ່ປີ ແລະ ວຽກງານອື່ນໆ ກໍຕ້ອງຈັດຕັ້ງປະຕິບັດໃຫ້ສຳເລັດຕາມແຜນການທີ່ວາງໄວ້.

  ສະຫາຍ ພົຕ ຄຳລຽງ ອຸທະໄກສອນ ໄດ້ມີຄຳເຫັນໂອ້ລົມໂດຍເນັ້ນໜັກໃຫ້ຜູ້ເຂົ້າຮ່ວມຈົ່ງນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ໄປຈັດຕັ້ງເຜີຍແຜ່ເຊື່ອມຊຶມຢູ່ຂະ ແໜງການ, ກົມກອງ, ທ້ອງຖິ່ນຂອງຕົນໃຫ້ປາກົດຜົນເປັນຈິງ ພ້ອມທັງດຳເນີນຊີວິດການເມືອງສຳຫຼວດກວດກາປັບປຸງປົວແປງພັກໃຫ້ປອດໃສ,ເຂັ້ມແຂງ ແລະ ໜັກແໜ້ນສືບຕໍ່ຊີ້ນຳໆພາແຜນພັດທະນາເສດຖະກິດສັງຄົມກໍ່ຄືແຜນພັດທະນາຮອບດ້ານທີ່ວາງອອກໃຫ້ບັນລຸຕາມຄາດໝາຍທີ່ວາງໄວ້ພ້ອມກັນສຸມໃສ່ການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກໃຫ້ສໍາເລັດຕາມແຜນການທີ່ວາງໄວ້.

______________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์