ອາຊີບຫັດຖະກໍາຜະລິດໂອ-ຂັນ ສ້າງລາຍຮັບໃຫ້ຄອບຄົວດີຂຶ້ນ

 ປະຈຸບັນປະຊາຊົນລາວບັນດາເຜົ່າຢູ່ແຕ່ລະທ້ອງຖິ່ນກໍຍັງນິຍົມຊົມຊອບໃນການປະກອບອາຊີບດ້ານຫັດຖະກໍາຕ່າງໆເຊັ່ນ: ຫັດຖະກໍາຈັກສານ, ຫັດຖະກໍາຕໍ່າຫູກ-ທໍໄໝ, ຫັດຖະກໍາໃນການອອກແບບແກະສະຫຼັກ, ຕີໂອ-ຕີຂັນ ຄວັດລິງລາຍ ແລະອື່ນໆ, ຊຶ່ງທັງໝົດເຫຼົ່ານີ້ລ້ວນແລ້ວແຕ່ແມ່ນສິລະປະລວດລາຍ ແລະເປັນມໍລະດົກກົກ ເຄົ້າ ທີ່ສືບທອດມາຈາກບັນພະບູລຸດຫຼາຍຮ້ອຍປີມາແລ້ວ ແລະ ມາຮອດຍຸກປະຈຸບັນມັນໄດ້ກາຍເປັນທຸລະກິດທີ່ດີສາມາດສ້າງລາຍຮັບມາໃຫ້ຄອບຄົວຢ່າງໜ້າເພິ່ງພໍໃຈ.

  ຄອບຄົວ ນາງ ໄພວັນ ກິນນະວົງ ກໍແມ່ນອີກຄອບຄົວໜຶ່ງທີ່ມີອາຊີບຫັດຖະກໍາຕີໂອ-ຕີຂັນຄວັດລິງ ຄວັດລາຍ,ປະຈຸບັນຢູ່ບ້ານວຽງສະຫວັນ ເມືອງສີໂຄດຕະບອງ, ນະຄອນຫຼວງວຽງຈັນ, ໂດຍຜູ້ ກ່ຽວໄດ້ໃຫ້ຮູ້ວ່າ, ເບື້ອງຕົ້ນແມ່ນ ມີອາຊີບຕີເງິນ-ຕີຄໍາ ເຮັດສາຍ ແຂນ-ສາຍຄໍ ແລະເຄື່ອງປະດັບ ທົ່ວໄປ, ແຕ່ພໍມາຮອດໄລຍະໜຶ່ງ ເຫັນວ່າການເຮັດອາຊີບນີ້ບໍ່ໄດ້ດີ ພໍປານໃດເກີດມີສະພາບຝືດເຄືອງ ຫຼາຍດ້ານການຕະຫຼາດຈຶ່ງໄດ້ຢຸດຕິ ແລະຫັນມາປະກອບອາຊີບຕີ ໂອ-ຕີຂັນແທນ, ໂດຍເຮັດຢູ່ໃນວົງ ແຄບແບບຄອບຄົວມີແຕ່ຜົວ-ເມຍ ຊ່ວຍກັນເຮັດ ໄດ້ມື້ລະເລັກລະໜ້ອຍ ແລ້ວກໍເອົາໄປສົ່ງຂາຍທີ່ຕະຫຼາດເຊົ້າ, ອາຊີບດັ່ງກ່າວກໍໄດ້ດໍາເນີນ ໄປເລື້ອຍໆແບບໜັກເອົາເບົາສູ້ ແລະບໍ່ຍອມທໍ້ຖອຍ ເຫັນວ່າທຸລະກິດນີ້ດໍາເນີນໄປໄດ້ດີ ແລະມັນ ເປັນອາຊີບທີ່ເໝາະສໍາລັບຄອບຄົວຂອງຕົນເອງ, ຈາກນັ້ນ ຈຶ່ງໄດ້ ເລີ່ມຂະຫຍາຍທຸລະກິດນີ້ອອກສູ່ວົງກວ້າງ ດ້ວຍການລົງທຶນເພີ່ມ ໃນການຊື້ວັດຖຸດິບມາຜະລິດ ແລະ ເພີ່ມແຮງງານຕື່ມອີກ, ຊຶ່ງມາຮອດປະຈຸບັນມີຊ່າງຈອດ-ຊ່າງ ຍ້ອມຢູ່ກິນນໍາປະຈໍາ 4 ຄົນ ແລະ ມີຊ່າງຕີລິງຕີລາຍເກືອບ 20 ຄອບ ຄົວ ແລ້ວບໍ່ມີເງິນເດືອນແຕ່ກິນຕາມຜະລິດຕະພັນ.

  ນາງ ໄພວັນ ກິນນະວົງ ເຈົ້າ ຂອງ ກິດຈະການດັ່ງກ່າວຍັງໃຫ້ ຮູ້ອີກວ່າ: ສໍາລັບຊ່າງຍ້ອມ-ຊ່າງ ຈອດທີ່ຢູ່ກິນນໍາປະຈໍານັ້ນ ແມ່ນ ຕັ້ງເງິນເດືອນໃຫ້ຜູ້ລະລ້ານປາຍ, ສ່ວນສິບປາຍຄອບຄົວທີ່ເປັນຊ່າງ ຕີລິງຕີລາຍໂອ-ຂັນ ນັ້ນແມ່ນເອົາ ເມືອເຮັດເຮືອນໃຜເຮືອນລາວ, ໂດຍເຮັດແບບກິດຈະກໍາປະຈໍາວັນ ຢູ່ເຮືອນຕົນເອງ, ຄອບຄົວໃດເຮັດ ແລ້ວໆເອົາມາສົ່ງ ໂດຍຄິດໄລ່ເງິນ ແຮງງານໃຫ້ໜ່ວຍລະ 50 ພັນກີບ, ມື້ໜຶ່ງສາມາດຜະລິດໄດ້ຄອບຄົວ ລະປະມານ 2-3 ໜ່ວຍ, ສ່ວນຊ່າງ ຈອດ ນອກຈາກຢູ່ກິນນໍາແລ້ວຍັງ ໄດ້ຄິດໄລ່ຄ່າແຮງງານໃຫ້ໜ່ວຍ ລະ 8 ພັນກີບ, ມື້ໜຶ່ງເຮັດໄດ້ປະມານ 10 ຫາ 20 ໜ່ວຍ ແລະຊ່າງ ຍ້ອມແມ່ນຄິດໄລ່ຄ່າແຮງງານໃຫ້ໜ່ວຍລະ 10 ພັນກີບ, ອາຊີບຜະລິດໂອ-ຂັນຂາຍເປັນທຸລະກິດແບບຄອບຄົວສາມາດສ້າງລາຍຮັບມາໃຫ້ເດືອນລະປະມານ 35-40 ລ້ານກີບ ໃນນັ້ນແມ່ນໄດ້ຈ່າຍຄ່າແຮງງານໃຫ້ບັນ ດານາຍຊ່າງ, ສົ່ງເສີມການສຶກສາລູກ, ເສຍຄ່ານໍ້າ-ໄຟ, ຄ່າຢູ່ຄ່າກິນປະຈໍາວັນ ແລະຝາກປະຢັດໄວ້ເປັນເງິນເກັບໃຫ້ຄອບຄົວ.

ອາຊີບຜະລິດໂອ-ຂັນຂາຍ ຂອງ ນາງ ໄພວັນ ກິນນະວົງ ນອກຈາກມີລາຍຮັບມາໃຫ້ຄອບຄົວ ຂອງຕົນແລ້ວ ຍັງໄດ້ຊຸກຍູ້ສົ່ງເສີມ ໃຫ້ປະຊາຊົນພາຍໃນບ້ານວຽງສະຫວັນ ໄດ້ມີວຽກເຮັດງານທໍາມີ ລາຍຮັບມາໃຫ້ຄອບຄົວມີຢູ່ມີກິນ ເພື່ອສ້າງຖານະຄອບຄົວໃຫ້ຫຼຸດພົ້ນອອກຈາກຄວາມທຸກຍາກເທື່ອ ລະກ້າວ ແລະຄອບຄົວ ນາງ ໄພ ວັນ ກິນນະວົງ ຈຶ່ງກາຍເປັນຄອບຄົວຕົວແບບປະຈໍາບ້ານວຽງສະຫວັນຈົນມາຮອດປະຈຸບັນ.

-----

ໂດຍ: ຊາຍພະເນຈອນ

แชร์