ປ່ອຍແລ້ວເອັມວີເພງ “ເພື່ອຄົນທາງນັ້ນ” ຂອງໜຸ່ມແພງຜູ້ໄທເມືອງວັງ

 ໜຸ່ມແພງ ຜູ້ໄທເມືອງວັງສິລະປິນນັກຮ້ອງໜ້າໃໝ່ຄ້າຍເພງ Toeng Studio ຊຶ່ງໄດ້ແຈ້ງເກີດກັບຜົນງານເພງ “ເພື່ອຄົນທາງນັ້ນ” ທີ່ໄດ້ປ່ອຍອອກທາງຄື້ນວິທະຍຸ ຊ່ອງຢູທູບ Toeng Studio ເມື່ອບໍ່ດົນມານີ້, ປະຈຸບັນແມ່ນໄດ້ປ່ອຍລົງຢູທູບແລ້ວທີ່ປະກອບດ້ວຍການສະແດງລະຄອນເອັມວີເຕັມເລື່ອງ.

ທ້າວ ແພງຕາ ວົງສະໄໝ ຫຼື ແພງ ຜູ້ໄທເມືອງວັງ ເປັນຄົນບ້ານ ໄຊຍະລາດ ເມືອງວິລະບູລີ ແຂວງ ສະຫວັນນະເຂດ ພູມຖານລຳເນົາ ເກີດຈາກເຊື້ອສາຍຊົນເຜົ່າຜູ້ໄທ ກ່ອນຈະມາໄດ້ຜົນງານເພງນີ້ພາຍ ຫຼັງໄດ້ຮຽນຈົບຈາກສະຖາບັນຍຸຕິທຳພາກກາງແຂວງສະຫວັນນະເຂດ ໄດ້ຕັດສິນໃຈດິ້ນຮົນສູ້ຊົນເຂົ້າມາເຮັດວຽກຢູ່ໃນນະຄອນຫຼວງວຽງຈັນ ຊຶ່ງກໍ່ເປັນອີກຊ່ອງ ໜຶ່ງໃນການກ້າວສູ່ໃນວົງການບັນເທີງຈົນໄດ້ມາຮູ້ຈັກຄ້າຍເພງ Toeng Studio ເຈົ້າຂອງຄ້າຍເພງດັ່ງກ່າວເຫັນວ່າມີພອນສະຫວັນເລີຍ ໄດ້ເປີດໂອກາດແຕ່ງເພງແຈ້ງເກີດໃຫ້ທີ່ມີຊື່ວ່າ: ເພື່ອຄົນທາງນັ້ນ.

  ສຳລັບເພງ “ເພື່ອຄົນທາງນັ້ນ” ແຕ່ງໂດຍໜຸ່ມໂຊນ່ານ ແຈັກເກັດເຈົ້າຂອງຄ້າຍເພງ Toeng Studio ທັງເປັນນັກແຕ່ງເພງ, ສິລະປິນນັກຮ້ອງ ແລະຜູ້ກຳກັບນັກສະແດງເອັມວີຫຼາຍໆເພງທີ່ມີຊື່ສຽງໃນສັງຄົມ, ເພງດັ່ງກ່າວເປັນຈັງຫວະຊ້າຟັງແລ້ວມ່ວນຈັບໃຈໂດຍມີເນື້ອຫາທີ່ກຳລັງໃຈໃຫ້ຄົນທີ່ຢູ່ຕ່າງແຂວງທີ່ເຂົ້າມາສູ້ຊົນຊອກຫາວຽກເຮັດງານທຳຢູ່ໃນເມືອງເພື່ອຫາເງິນສົ່ງໃຫ້ຄອບຄົວ ແລະຍາດຕິພີ່ນ້ອງຢູ່ທາງບ້ານ.

ໜຸ່ມແພງ ຜູ້ໄທເມືອງວັງ ໃຫ້ຮູ້ວ່າ: ເພງນີ້ເປັນຜົນງານຄັ້ງທຳອິດໃນຊີວິດລວມທັງເປັນການແຈ້ງເກີດທີ່ກ້າວມາເປັນສິລະປິນນັກຮ້ອງໃນວົງການບັນເທີງເພງລາວກ່ອນໜ້ານີ້ແມ່ນເຄີຍປ່ອຍລົງຢູທູບໄປແລ້ວແຕ່ຍັງບໍ່ທັນມີປະກອບເອັມວີສະນັ້ນເພື່ອຕອບສະໜອງຕາມຄວາມຮຽກຮ້ອງຂອງແຟນເພງຫຼາຍຄົນຈຶ່ງໄດ້ມີການສະແດງປະກອບເອັມວີເຕັມເລື່ອງທີ່ມາພ້ອມຄວາມມ່ວນຊື່ນທີ່ສະແດງເຖິງຊີວິດໃນສັງຄົມປະຈຸບັນ, ຊຶ່ງເອັມວີເພງດັ່ງກ່າວໄດ້ປ່ອຍອອກໄປແລ້ວ ເມື່ອວັນທີ 17 ກຸມພາຜ່ານມາ, ທ່ານສາມາດຕິດຕາມໄດ້ຊ່ອງຢູທູບ:Toeng Studio ຫຼື ເຟສ໌ບຸກ ສ່ວນໂຕ: ແພງຜູ້ໄທເມືອງວັງ.

_______________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์