ເຊໂປນ ຮັບເງິນ 250 ລ້ານກີບ ຈາກກອງທຶນຮ່ວມໃຈ ເພື່ອສ້າງໂຮງຮຽນບ້ານສາງ

  ໃນວັນທີ 7 ກຸມພາ 2020 ທີ່ໂຮງແຮມແລນມາກ ນະຄອນຫຼວງວຽງຈັນ ທະນາຄານຮ່ວມພັດທະນາໄດ້ມອບເງິນຈໍານວນ 250 ລ້ານກີບ ເພື່ອຊ່ວຍເຫຼືອການປຸກສ້າງໂຮງຮຽນບ້ານສາງ, ຊຶ່ງຫ່າງຈາກເທດສະບານເມືອງເຊໂປນ ແຂວງສະຫວັນນະເຂດ 35 ກິໂລແມັດ.

 ເມືອງເຊໂປນ ມີທັງໝົດ 88 ບ້ານ ບ້ານສາງແມ່ນບ້ານໜຶ່ງທີ່ຍັງບໍ່ມີການພັດທະນາມີຈໍານວນຫຼັງຄາເຮືອນ 45 ຫຼັງ, ຈໍານວນຄອບຄົວ 59 ຄອບຄົວ, ມີປະຊາກອນທັງໝົດ 291 ຄົນ ຍິງ 145 ຄົນ ອາຊີບຫຼັກແມ່ນເຮັດໄຮ່ ເຮັດສວນ ແລະລ້ຽງສັດເປັນສໍາຮອງ, ໂຮງຮຽນບ້ານສາງມີນັກຮຽນທັງໝົດ 41 ຄົນ ຍິງ 18 ຄົນ ແລະມີຄູ 1 ຄົນ ສະພາບໂຮງຮຽນປະຖົມ ແມ່ນມີສະພາບບໍ່ສົມບູນເຊີ່ງໄດ້ສ້າງຄວາມຫຍຸ້ງຍາກໃນການສິດສອນຮໍ່າຮຽນ.

  ເນື່ອງໃນໂອກາດວັນສະເຫຼີມສະຫຼອງຄົບຮອບ 30 ປີ ວັນສ້າງຕັ້ງທະນາຄານຮ່ວມພັດທະນາ, ມອບໂດຍທ່ານ ເອກະພັນ ພະພິທັກ ປະທານສະພາບໍລິຫານທະນາ ຄານຮ່ວມພັດທະນາ ແລະຮັບໂດຍທ່ານ ຄໍາຫຼ້າ ພົມມີໄຊ ຮອງເຈົ້າເມືອງເຊໂປນ.

  ສຳລັບກອງທຶນຮ່ວມໃຈຂອງທະນາຄານຮ່ວມພັດທະນາໄດ້ສ້າງຕັ້ງຂຶ້ນໂດຍ ທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາເພື່ອຊ່ວຍ ເຫຼືອສັງຄົມກໍ່ຄືນໍາໄປຊ່ວຍເຫຼືອການປຸກສ້າງໂຮງຮຽນໃນເຂດຊົນນະບົດຫ່າງໄກສອກຫຼິກທີ່ມີຄວາມທຸກຍາກຂາດເຂີນອາຄານຮຽນ, ອຸປະກອນການສຶກສາ, ໄພພິບັດ, ໂລກລະບາດ ແລະເຫດການອື່ນໆ.

  ທະນາຄານຮ່ວມພັດທະນາໄດ້ຊວ່ຍເຫຼືອວຽກງານການພັດທະນາຊັບພະຍາກອນມະນຸດ ແລະການຊ່ວຍເຫຼືອດ້ານມະນຸດສະທໍາເປັນວຽກງານທີ່ສໍາຄັນເພື່ອເປັນການປະກອບສ່ວນທີ່ສໍາຄັນໃນການສ້າງສາພັດທະນາປະເທດຊາດໃຫ້ມີຄວາມຮຸ່ງເຮືອງສີວິໄລ.

  ທະນາຄານຮ່ວມພັດທະນາເປັນທະນາຄານບໍລິການດ້ວຍມາດຕະຖານສາກົນ ISO 9001:2015 ບໍລິການທາງດ້ານການເງີນແບບຄົບວົງຈອນໃຫ້ແກ່ປະຊາຊົນໃນທົ່ວປະເທດໄດ້ມີຄວາມສະດວກສະບາຍໃນການເຂົ້າຫາແຫຼ່ງທຶນທີ່ໝັ້ນຄົງ ແລະການບໍລິການທີ່ມີຄວາມໝັ້ນຄົງ, ໂປ່ງໃສ, ທະນາຄານຮ່ວມພັດທະນມີແຫຼ່ງທຶນພຽງພໍທີ່ຈະຕອບສະໜອງໃຫ້ແກ່ລູກຄ້າເພື່ອສະໜັບສະໜູນທຸລະກິດລູກຄ້າຂອງຕົນໃຫ້ມີຄວາມເຕີບໃຫ່ຍຂະຫຍາຍຕົວຂຶ້ນໄປເລື້ອຍໆ, ສົມກັບຄຳຂວັນທີ່ວ່າ “ເຕີບໃຫ່ຍໄປພ້ອມກັນ”.

______________

ຂຽນໂດຍ: ຄໍາຕົ້ນ ວໍລະຈັກ    
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์