ທຄຕລ ຍົກ 4 ຜະລິດຕະພັນສູ່ລະດັບສູງ

 ໃນວັນທີ 13 ກຸມພາ 2020 ທີ່ທະນາຄານການຄ້າຕ່າງປະເທດລາວມະຫາຊົນ (ທຄຕລ) ສຳນັກງານໃຫຍ່ໄດ້ຈັດຕັ້ງການເປີດຕົວການຍົກລະດັບຜະລິດຕະພັນ ແລະການບໍລິການສູ່ລະດັບສູງໂດຍມີການອັບເດດພັດທະນາລະບົບເພື່ອໃຫ້ລູກຄ້າໄດ້ນໍາໃຊ້ການບໍລິການທີ່ທັນສະໄໝຢ່າງຕໍ່ເນື່ອງ ແລະ ມີຄວາມຫຼາກຫຼາຍຢ່າງບໍ່ຢຸດຢັ້ງຮັບໃຊ້ສັງຄົມໃນຍຸກດີຈີຕອລຢ່າງເປັນທາງການໂດຍການໃຫ້ກຽດເຂົ້າຮ່ວມຂອງທ່ານ ພູຂົງ ຈັນທະຈັກ ຜູ້ອຳນວຍການໃຫຍ່ ທຄຕລ ພ້ອມຄະນະ, ຜູ້ຕາງໜ້າຈາກກົມທີ່ກ່ຽວ ຂ້ອງຂອງທະນາຄານແຫ່ງ ສປປ ລາວ, ຕາງໜ້າຈາກທະນາຄານທຸລະກິດລັດ, ບໍລິສັດໃນເຄືອ, ຄະນະພະແນກ, ຄະນະສູນ,ສາຂາຂອງ ທຄຕລ ພາຍໃນນະຄອນຫຼວງ ວຽງຈັນເຂົ້າຮ່ວມ.

  ໃນໂອກາດດັ່ງກ່າວ; ທ່ານ ພູຂົງ ຈັນທະຈັກ ຜູ້ອຳນວຍການໃຫຍ່ ທຄຕລ ແລະທ່ານ ນັນທະລາດ ແກ້ວປະເສີດ ຮອງຜູ້ອຳນວຍການໃຫຍ່ ທຄຕລ ໄດ້ພັດປ່ຽນກັນນໍາສະເໜີເນື້ອໃນ ສໍາຄັນຂອງການພັດທະນາລະບົບໃນຍຸກ ທີ່ເທັກໂນໂລຢີມີຄວາມກ້າວໜ້າສູງໂລກເຮົາມີການເຊື່ອມໂຍງໃນທຸກດ້ານ, ທຄຕລ ກໍ່ໄດ້ປັບປຸງການບໍລິການໃຫ້ມີຄວາມສະດວກ, ວ່ອງໄວ, ທັນສະໄໝເນັ້ນໃສ່ພັດທະນາຜະລິດຕະພັນ ແລະການບໍລິການຜ່ານລະບົບເອເລັກໂທນິກບົນພື້ນຖານຄວາມປອດໄພ ແລະໄດ້ມາດຕະຖານສາກົນຊຶ່ງມີຫຼາຍຜະລິດຕະພັນຂອງ ທຄຕລ ໄດ້ຮັບການຍອມຮັບນໍາໃຊ້ຢ່າງແຜ່ຫຼາຍຈາກສັງຄົມບໍ່ວ່າຈະເປັນຜະລິດຕະພັນບັດ BCEL One, OnePay, SMS Banking, i-Bank ແລະອື່ນໆ.

  ທັງ 2 ທ່ານການນໍາ ແລະພະນັກງານຂອງ ທຄຕລ ໄດ້ແນະນໍາບັນດາຜະລິດຕະພັນ ແລະການບໍລິການທີ່ໄດ້ຍົກລະດັບການນໍາໃຊ້ໃໝ່ນີ້ລ້ວນແຕ່ມີຄຸນລັກສະນະໂດດເດັ່ນທີ່ຕອບໂຈດຄວາມຕ້ອງການຂອງການບໍລິການທາງການເງິນໃນຍຸກດິຈິຕອລປະກອບມີ 4 ຜະລິດຕະພັນໃນນີ້ BCEL OneCash ປຽບສະເໝືອນກະເປົາເງິນເອເລັກໂທນິກຊຶ່ງເປັນຜະລິດຕະພັນບັດແບບຕື່ມເງິນ (Virtual Prepaid) ໜຶ່ງຂອງ ທຄຕລ ໂດຍຜູ້ທີ່ຕ້ອງການນໍາໃຊ້ບໍ່ຈໍາເປັນຕ້ອງມີບັນຊີກັບ ທຄຕລ ມີຄຸນລັກສະ ນະເດັ່ນສາມາດສ້າງ ແລະສົ່ງບົງເງິນ (Cash Voucher) ເພື່ອເປັນຂອງຂວັນໃຫ້ແກ່ບຸກຄົນອື່ນທີ່ມີບັນຊີ ຫຼືບໍ່ມີບັນຊີກັບ ທຄຕລ ໃນເທສະການຕ່າງໆ ແລະງານສໍາຄັນອື່ນໆເປັນມິຕິໃໝ່ຂອງການໃຫ້ຂອງຂວັນທີ່ເປັນເງິນໃນວັນສໍາຄັນ; ນອກນີ້ຍັງສາມາດໃຊ້ຈ່າຍຄ່າສາທາລະນຸປະໂພກ ແລະ ຄ່າບໍລິການອື່ນໆໄດ້ຜ່ານແອັບ BCEL One ແລະ ໃນມໍ່ໆນີ້ສາມາດໃຊ້ບໍລິການຜ່ານຕູ້ ATM ແລະ Counter ຂອງ ທຄຕລ ໄດ້.

  ສໍາລັບ BCEL OneCare ເປັນທີ່ປຶກສາສ່ວນໂຕຂອງທ່ານທີ່ເຂົ້າເຖິງງ່າຍ ແລະຕິດຕໍ່ເພື່ອສອບຖາມຂໍ້ມູນຜະລິດຕະພັນແລະການບໍລິການຂອງ ທຄຕລ ເຖິງວ່າລູກ ຄ້າຈະຢູ່ແຫ່ງໃດໃນໂລກກໍ່ສາມາດຕິດຕໍ່ ແລະ ສອບຖາມຜ່ານ OneCare ໄດ້ດ້ວຍການໂທ, ແຊັດ ຫຼືຝາກ ຂໍ້ຄວາມສຽງໂດຍໃຊ້ Data/Wifi, ບໍ່ເສຍຄ່າໂທ, ບໍ່ຕ້ອງເປີດ Roaming ເມື່ອໄປຕ່າງປະເທດ, ຮັບປະກັນຄວາມປອດໄພໃນການເຮັດທຸລະກໍາຂອງລູກຄ້າເນື່ອງຈາກ OneCare ແມ່ນເປັນການໂທແບບ Video Call ເພື່ອຢັ້ງຢືນຕົວຕົນຂອງລູກຄ້າ ແລະກວດເອກະສານເຊິ່ງເປັນການບໍລິການຫຼັງການຂາຍທີ່ສາມາດຕິດຕໍ່ Call Center ຜ່ານແອັບພລີເຄຊັນໄດ້ເຊິ່ງໃນອະນາຄົດຈະສາມາດອອກບັດໃໝ່, ເປີດບັນຊີໃໝ່, ສາມາດໂອນໄດ້ ແລະຈະສາມາດຕິດຕໍ່ໄດ້ຕະຫຼອດ24 ຊົວໂມງໃນມໍ່ໆນີ້.

 QR Withdrawal (ການຖອນເງິນສົດໂດຍການ Scan QR Code ທີ່ບໍ່ໃຊ້ບັດ), ມິຕິໃໝ່ຂອງການຖອນເງິນສົດຈາກຕູ້ ATM ດ້ວຍ QR Code ຜ່ານແອັບ BCEL One ໂດຍບໍ່ຈຳເປັນຕ້ອງໃຊ້ບັດ ATM; ລືມບັດກໍຖອນເງິນໄດ້ພຽງໃຊ້ BCEL One ຂັ້ນຕອນງ່າຍໆພຽງ Login ເຂົ້າແອັບ BCEL One ເລືອກຟັງຊັນຖອນເງິນສົດຜ່ານຕູ້ ATM ເລືອກຈໍານວນເງິນ, ເລືອກບັນຊີ, ກົດປຸ່ມສະແກນ QR Code ແລະລໍຖ້າສະແກນ, ຈາກນັ້ນກົດປຸ່ມຖອນເງິນດ້ວຍ QR Code ທີ່ໜ້າ ຈໍຕູ້ ATM ເພື່ອໃຊ້ໂທລະສັບມາສະແກນ QR Code ພ້ອມທັງໃສ່ລະຫັດບັດ ATM ທີ່ໜ້າຈໍຕູ້ ແລ້ວເງິນກໍຈະອອກຈາກຕູ້ ATM ທັນທີ.

  BCEL i-Bank Version 4 ເພີ່ມຄວາມສາມາດໃຫ້ສະດວກສະບາຍຂຶ້ນໄດ້ປັບປຸງໃຫ້ນໍາໃຊ້ໃນຮູບແບບ Mobile Application ເທິງ Smartphone ທັງລະບົບ iOS ແລະ Android ສະດວກທັນໃຈຫຼາຍຟັງຊັ້ນໄດ້ອັບເດດໃໝ່ທີ່ຊ່ວຍໃຫ້ລູກຄ້າໂດຍສະເພາະນິຕິບຸກຄົນໃຊ້ງານໄດ້ງ່າຍຂຶ້ນທັງຮັບປະກັນຄວາມປອດໄພໂດຍລູກຄ້າສາມາດຢືນຢັນການເຮັດທຸລະກຳດ້ວຍການສະແກນໃບໜ້າ ແລະການແຈ້ງເຕືອນລາຍການລໍຖ້າອະນຸມັດຜ່ານ Application ທຸກຄັ້ງ, ພ້ອມມີລະບົບລາຍງານປະຫວັດການເຮັດທຸລະກຳໃນຮູບແບບເປັນປະຕິທິນທີ່ງ່າຍໃນການເບິ່ງຄືນພາບລວມຂອງການເຮັດທຸລະກຳໃນໄລຍະຜ່ານມາແລະໄດ້ປັບປຸງອີກຫຼາຍຟັງຊັນໃຫ້ທຸກການໃຊ້ງານເປັນເລື່ອງງ່າຍ “BCEL i-Bank ຜູ້ຊ່ວຍທີ່ຄຽງຄູ່ທຸກຄວາມສໍາເລັດ”.

  ການສະແກນໃບໜ້າ: Feature ໃໝ່ທີ່ຮັບປະກັນຄວາມປອດໄພໃນການນໍາໃຊ້ BCEL One ແລະ i-Bank  ເຊິ່ງເປັນທາງເລືອກໜຶ່ງຂອງການ Log in ໂດຍບໍ່ໃຊ້ ລາຍມືຫຼືລະຫັດ, ມີຄວາມສາມາດບັນທຶກຂໍ້ມູນໃບໜ້າເຈົ້າຂອງບັນຊີໃນຂະນະທີ່ເຄື່ອນໄຫວໄວ້ເຊັ່ນ: ຄໍາສັ່ງຫັນໜ້າໄປທາງຊ້າຍ, ຫັນໜ້າໄປທາງຂວາ, ຫຼັບຕາ, ອ້າປາກ... ເຊິ່ງເປັນການບັນທຶກວິດີໂອການເຄື່ອນໄຫວໃບໜ້າເຈົ້າຂອງບັນຊີທີ່ເປັນໄປຕາມເງື່ອນໄຂຂອງມາດຕະຖານສາກົນທີ່ນໍາໃຊ້ກັນ (Live face detection) ໃຫ້ຢັ້ງຢືນວ່າແມ່ນເຈົ້າຂອງບັນຊີເປັນຜູ້ໃຊ້ເອງແທ້ ແລະ ປ້ອງກັນການປອມແປງບຸກຄົນອື່ນມາລັກໃຊ້ ຫຼືລັກເອົາຮູບເຈົ້າຂອງບັນຊີມາໃຊ້,ເປັນທາງເລືອກໃໝ່ທີ່ງ່າຍ, ສະ ດວກຮັບປະກັນຄວາມປອດໄພ ແລະໄດ້ມາດຕະຖານສາກົນ.

  ໃນງານດັ່ງກ່າວ; ຍັງມີການຊັກຖາມຈາກສື່ມວນຊົນ ແລະພາກສ່ວນທີ່ເຂົ້າຮ່ວມງານທີ່ກ່ຽວຂ້ອງກັບຜະລິດຕະພັນໂດຍສະເພາະ 4 ຜະລິດຕະພັນຕອນຊຶ່ງໄດ້ມີການຕອບສຳພາດຈາກທ່ານຄະນະອໍານວຍການຢ່າງແຈ່ມແຈ້ງ ແລະຍັງມີກິດຈະກໍາການນໍາໃຊ້ຜະລິດຕະພັນດັ່ງກ່າວແລະແຈກເງິນຂອງຂັວນໃຫ້ແກ່ຜູ້ໂຊກດີນໍາອີກ.

_______________

ຂຽນໂດຍ: ຣັດສະໝີ ດວງສັດຈະ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์