ພູຍ່າຫງອກ ແຫຼ່ງທ່ອງທ່ຽວທໍາມະຊາດທີ່ໜ້າສໍາຜັດ

  ພູຍ່າຫງອກ ຖືວ່າເປັນສະຖານທີ່ທ່ອງທ່ຽວທີ່ມີຊື່ສຽງ ແລະ ໄດ້ຮັບຄວາມນິຍົມຈາກນັກທ່ອງທ່ຽວພາຍໃນ ແລະຕ່າງປະເທດເປັນຈຳນວນຫຼວງຫຼາຍເຮັດໃຫ້ພູຍ່າ ຫງອກມີຊື່ສຽງໂດ່ງດັງ ແລະທ່ານ ໃດທີ່ໄດ້ໄປແຂວງໄຊຍະບູລີ ກໍຢ່າ ລືມໄປສຳພັດກັບທິວທັດທໍາມະຊາດອັນສວຍສົດງົດງາມຂອງພູດັ່ງກ່າວເຊື່ອວ່າທ່ານຈະປະທັບໃຈກັບບັນຍາກາດອັນສົດຊື່ນຈົນອົດບໍ່ໄດ້ ທີ່ຈະຖ່າຍຮູບງາມໆເພື່ອເກັບໄວ້ ເປັນທີ່ລະນຶກຢູ່ແຂວງໄຊຍະບູລີ ຍັງມີສະຖານທີ່ທ່ອງທ່ຽວອີກຫຼາຍ ແຫ່ງທີ່ສວຍງາມ ແລະໜ້າປະທັບໃຈ.

 ປະຫວັດຄວາມເປັນມາຂອງ ພູຍ່າຫງອກ ເມື່ອຄັ້ງເມືອງເປັງ ຈານນະຄອນລັດຕັ້ງຢູ່ເຂດປາກ ເຫືອງຕົກໃສ່ໜອງກະແສແສນຍ່ານ (ສາຍແມ່ນນໍ້າຂອງເປັນຫາດເປັນແກ້ງກະແສນໍ້າຂ້ຽວຂາດບິດບັ່ນຮັ່ນຮ້າຍນັບແສນຍ່ານ) ຍັງມີສອງຜົວເມຍຊື່ປູ່ລ້ານ ແລະຍ່າຫງອກເປັນຊົນຊາດຂອມໄດ້ຕັ້ງຖິ່ນຖານບ້ານຊ່ອງຢູ່ບໍລິເວນນີ້ເປັນຄັ້ງທຳອິດ, ເມື່ອເມືອງເປັງຈານນະຄອນລັດເຊື່ອມອຳນາດລົງ (ມີຮ່ອງຮອຍບູຮານສະຖານທີ່ດິນຈີ່ 4 ຫຼ່ຽມ, 3 ຫຼ່ຽມ ເຈີ້ຍສົ້ນຫຼົງເຫຼືອໄວ້ໃຫ້ເຫັນເປັນຈຸດເປັນບ່ອນ) ປູ່ລ້ານ ແລະຫຍ່າຫງອກ ມີບຸດຕີ ໜຶ່ງຄົນມີນາມວ່າ: ນາງເຈັດຜິວ ເພາະບຸກຄະລິກຮູບໂສມພະນົມພັນຂອງນາງຂາວງາມຜ່ອງໃສ, ມີໄມຕີຈິດຕໍ່ຊຸມຊົນຊາວບ້ານ, ຫຼັງຈາກນັ້ນນາງ

ເຈັດຜິວ ກໍ່ໄດ້ແຕ່ງ ງານກັບທ້າວ ແກ່ນ ຊຶ່ງເປັນບຸດ ຄົນທີ່ສາມຂອງປູ່ຮັ່ງ ແລະມີບຸດກັນສອງຄົນຊື່ວ່າ: ນາງ ແພງສີ ແລະທ້າວ ໂທດຳ,ມາເຖິງໄລຍະໜຶ່ງປູ່ລ້ານເຂົ້າໃຈດີຕໍ່ອາຍຸສັງຂານ ແລະ ເຫື່ອແຮງຂອງຕົນເອງຈິ່ງໄດ້ຕົກລົງອະພິເສກທ້າວແກ່ນຜູ້ເປັນລູກເຂີຍຂຶ້ນປົກຄອງເມືອງແທນຕົນນັບແຕ່ນັ້ນມາ, ພາຍຫຼັງປູ່ລ້ານ ແລະ ຫຍ່າຫງອກ ເຖິງແກ່ມໍລະນະກຳໄປແລ້ວທ້າວແກ່ນຜູ້ ເປັນລູກເຂີຍພ້ອມດ້ວຍໄພ່ຟ້າປະຊາກອນກໍ່ໄດ້ທຳພິທີແຫ່ສົບຂອງສອງເຖົ້າໄປໄວ້ຢູ່ເທິງພູສູງທາງທິດຕາເວັນອອກສຽງເໜືອຂອງ ເມືອງແກ່ນທ້າວ, ນັບແຕ່ນັ້ນມາຄົນຈິ່ງເອີ້ນພູທັງສອງໜ່ວຍນັ້ນວ່າ: ພູປູ່ລ້ານ ແລະພູຍ່າຫງອກ.

ພູຍ່າຫງອກຕັ້ງຢູ່ບ້ານໂຄກກະເບົາ ເມືອງແກ່ນທ້າວ ຊຶ່ງຫ່າງຈາກຕົວເມືອງແກ່ນທ້າວໄປທາງທິດໃຕ້ປະມານ 2 ກິໂລແມັດ,ເສັ້ນທາງລົດສາມາດເຂົ້າເຖິງພູຍ່າຫງອກໄດ້ທັງລະດູແລ້ງ ແລະລະດູຝົນ.

-------

ໂດຍ: ວົງມະນີ

• 19/02/2020