2 ພາກສ່ວນຈັບມືພັດທະນາບຸກຄະລາກອນ

  ຄະນະວິທະຍາສາດປ່າໄມ້ມະຫາວິທະຍາໄລແຫ່ງຊາດ ແລະ ບໍລິສັດ ບົວລະພາກະສິກຳ–ປ່າໄມ້ ຈຳກັດ ໄດ້ຈັດພິທີເຊັນບົດບັນທຶກການຮ່ວມມືດ້ານວິຊາການເພື່ອເປັນການກໍ່ສ້າງບຸກຄະລາກອນໃຫ້ມີຄວາມຮູ້, ຄວາມສາມາດໃນການປະກອບອາຊີບຂຶ້ນໃນວັນທີ 14 ກຸມພາ 2020 ທີ່ຄະນະວິທະຍາສາດປ່າໄມ້ລະຫວ່າງ ທ່ານນາງ ລັດ ສະໝີ ບຸບຜາ ຄະນະບໍດີຄະນະວິທະ ຍາສາດປ່າໄມ້ ແລະທ່ານນາງ ສຸໄພວັນ ທ່ຽງຈັນໄຊ ຮອງອຳນວຍການບໍລິສັດ ບົວລະພາກະສິກຳ–ປ່າໄມ້ ຈຳກັດ ໂດຍມີ ທ່ານ ປອ ຮຸ່ງເພັດ ຈັນທະວົງ ຮອງອະທິການບໍດີມະຫາວິທະຍາໄລແຫ່ງຊາດ, ທ່ານ Jean–Bernard ເອກອັກຄະລັດຖະທູດອົດສະຕາລີ ປະຈຳ ສປປ ລາວ ພ້ອມດ້ວຍພາກ ສ່ວນທີ່ກ່ຽວຂ້ອງເຂົ້າຮ່ວມ.

 ທ່ານ ນາງ ສຸໄພວັນ ທ່ຽງຈັນໄຊ ກ່າວວ່າ: ການຮ່ວມມືກັນໃນຄັ້ງນີ້ຈະປາກົດຜົນເປັນຈິງຕ້ອງຢູ່ພາຍໃຕ້ການຂັບເຄື່ອນທາງດ້ານຜົນປະໂຫຍດເຊິ່ງກັນ ແລະ ກັນຂອງພາກອຸດສາຫະກຳທີ່ແນໃສ່ສ້າງບຸກຄະລາກອນ, ການຄົ້ນຄວ້າວິທະຍາສາດ ແລະການພັດທະນາລວມໄປເຖິງການສ້າງວຽກເຮັດງານທຳທີ່ກ່ຽວຂ້ອງກັບສູນຄົ້ນຄວ້າຜະ ລິດຕະພັນໄມ້ອັດຊຶ່ງໄດ້ຮັບການສ້າງຕັ້ງຂຶ້ນພາຍໃຕ້ການຊ່ວຍເຫຼືອຂອງລັດຖະບານປະເທດອົດສະຕາລີ.

  ສັນຍາສະບັບນີ້ມີໄລຍະເວລາຈັດຕັ້ງປະຕິບັດ 5 ປີ ຊຶ່ງທາງບໍລິສັດບົວລະພາຈະເຮັດໜ້າທີ່ໃຫ້ດີທີ່ສຸດໃນການສະໜັບສະໜູນຄະນະວິທະຍາສາດປ່າໄມ້ບໍ່ພຽງແຕ່ໄລຍະເລ່ີມຕົ້ນຂອງອຸດສະຫາກຳອັນໃໝ່ເທົ່ານັ້ນແຕ່ຍັງຈະສືບຕໍ່ໃຫ້ການສະໜັບສະໜັບສະໜູນຄະນະວິຊາພາຍຫຼັງທີ່ໂຮງງານໄມ້ອັດຂອງບໍລິສັດໄດ້ສືບຕໍ່ພັດທະນາຢ່າງເຕັມຮູບແບບໃນອະນາຄົດ.

----------

ທັງນີ້ທ່ານນາງ ສຸໄພວັນ ທ່ຽງຈັນໄຊ ເຊື່ອໝັ້ນວ່າ: ຄູ່ຮ່ວມມືພາກລັດ ແລະເອກະຊົນນັ້ນເປັນຮູບການທີ່ກຳລັງໄດ້ຮັບການປະຕິບັດທີ່ດີໃນປະຈຸບັນຢູ່ ສ ປປ ລາວ ທັງເປັນການປະກອບສ່ວນທີ່ສຳຄັນໃນການພັດທະນາອຸດສາຫະກຳໄມ້ລາວໃນອະນາຄົດຢ່າງມີປະສິດທິຜົນ.

________________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 19/02/2020