ທ່າແຕງ ກຽມສ້າງແຜນຊອກສາເຫດ ການຕັດໄມ້ທຳລາຍປ່າ

  ກອງປະຊຸມປຶກສາຫາລືເພື່ອກະກຽມສ້າງແຜນດຳເນີນງານຂອງການຕັດໄມ້ທຳລາຍປ່າ ແລະເຮັດໃຫ້ປ່າໄມ້ເຊື່ອມໂຊມພາຍໃຕ້ຫົວຂໍ້ການຫຼຸດຜ່ອນການປ່ອຍອາຍພິດເຮືອນແກ້ວຈາກການທຳລາຍປ່າໄມ້ ແລະການເຮັດໃຫ້ປ່າໄມ້ເຊື່ອມໂຊມຈັດຂຶ້ນໃນວັນທີ 14 ກຸມພາ 2020 ທີ່ເມືອງທ່າແຕງ ແຂວງເຊກອງ ພາຍໃຕ້ການເປັນປະທານຂອງທ່ານ ສົມເພັດ ເອີດລັດດາ ເຈົ້າເມືອງໆທ່າແຕງ, ໂດຍມີພາກສ່ວນກ່ຽວຂ້ອງຂັ້ນສູນກາງ, ແຂວງ ແລະກຸ່ມເປົ້າໝາຍທົ່ວເມືອງເຂົ້າຮ່ວມ.

  ທ່ານ ສາຍຄຳ ບຸດທະວົງ ຮອງພາກວິຊາຄຸ້ມຄອງແຫຼ່ງນໍ້າ ແລະ ທີ່ດິນຄະນະວິທະຍາສາດປ່າໄມ້ມະຫາວິທະຍາໄລແຫ່ງຊາດລາວ, ຜູ້ຊ່ວຍເກັບກຳຂໍ້ມູນໂຄງການອະນຸ ລັກຊີວະນາໆພັນຕາມແລວເຊື່ອມຕໍ່ກ່າວວ່າ: ມີຫຼາຍສາເຫດຫຼັກທີ່ເຮັດໃຫ້ມີການຕັດໄມ້ທຳລາຍປ່າ ແລະເຮັດໃຫ້ປ່າໄມ້ເຊື່ອມໂຊມເປັນຕົ້ນ: ການຫັນປ່ຽນເນື້ອທີ່ດິນປ່າ ໄມ້ເປັນເນື້ອດິນທີ່ປູກໄມ້ອຸດສາຫະກຳ ແລະປູກພືດເປັນສິນຄ້າ, ການເກັບເຄື່ອງປ່າຂອງດົງແບບບໍ່ມີແຜນການ, ການຂຸດຄົ້ນໄມ້ແບບຜິດກົດໝາຍ, ການຂະຫຍາຍພື້ນ ຖານໂຄງລ່າງ ຫຼືການສ້າງເສັ້ນທາງ, ຂຸດຄົ້ນແຮ່ທາດ, ການພັດທະນາເຂື່ອນພະລັງງານໄຟຟ້າ, ການຂະຫຍາຍຕົວເມືອງ, ຍົກຍ້າຍ ຫຼືຈັດສັນບ້ານໃໝ່, ການຖາງປ່າເຮັດໄຮ່ແບບເລື່ອນລອຍ, ແບບໝູນວຽນ, ໄຟໄໝ້ລາມປ່າຈາກການເຮັດໄຮ່ ແລະການລ່າສັດ...ເຫຼົ່ານີ້ເປັນຕົ້ນ.

  ກອງປະຊຸມປຶກສາຫາລືຄັ້ງນີ້ໂດຍລວມເພື່ອປະເມີນສາເຫດຂອງການທໍາລາຍປ່າໄມ້ ແລະການເຮັດໃຫ້ປ່າໄມ້ເຊື່ອມໂຊມທີ່ມີຜົນກະທົບຕໍ່ພື້ນທີ່ເປົ້າໝາຍໂດຍສະເພາະ 5 ບ້ານຂອງເມືອງທ່າແຕງຄື: ບ້ານກົງຕາຢຸນ, ບ້ານຫ້ວຍດຳໃໝ່, ບ້ານໜອງກັນ, ບ້ານດອນຊາ ແລະບ້ານທົ່ງຫວາຍ.

_____________

ຂຽນໂດຍ: ສະຫຍາມ ຈັນທະສອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์