ມອບ-ຮັບໜ້າທີ່ເຈົ້າເມືອງຈັນທະບູລີ

 ພິທີມອບ-ຮັບໜ້າທີ່ເຈົ້າ ເມືອງຈັນທະບູລີ ນະຄອນຫຼວງວຽງຈັນ (ນວ) ຜູ້ເກົ່າ ແລະ ຜູ້ໃໝ່ຈັດຂຶ້ນໃນວັນທີ 17 ກຸມພາ 2020 ຢູ່ຫ້ອງວ່າການປົກຄອງເມືອງຈັນ ທະບູລີ ໂດຍມີທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ, ພ້ອມດ້ວຍບັນດາຮອງເຈົ້າເມືອງ, ຫ້ອງການ, ອໍານາດການປົກຄອງບ້ານ ແລະພາກສ່ວນກ່ຽວຂ້ອງເຂົ້າຮ່ວມ.

  ການມອບ-ຮັບໜ້າທີ່ເຈົ້າເມືອງຈັນທະບູລີ ຄັ້ງນີ້ແມ່ນປະຕິບັດຕາມຄຳສັ່ງຂອງເຈົ້າຄອງນະຄອນຫຼວງວຽງຈັນວ່າດ້ວຍການຍົກຍ້າຍພະນັກງານ ແລະຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ ວ່າດ້ວຍການແຕ່ງຕັ້ງເຈົ້າ ເມືອງຈັນທະບູລີ, ອີງຕາມມະຕິຕົກລົງຂອງກອງປະຊຸມຄະນະປະຈຳພັກນະຄອນຫຼວງວຽງຈັນ, ແຈ້ງການຂອງຄະນະປະຈຳສູນກາງພັກກ່ຽວກັບການຍົກຍ້າຍແລະແຕ່ງຕັ້ງພະນັກງານໄປຮັບໜ້າທີ່ໃໝ່, ໜັງສືສະເໜີຂອງຄະນະຈັດຕັ້ງນະຄອນຫຼວງວຽງຈັນ ແລະຄວາມຕ້ອງການຂອງໜ້າທີ່ວຽກງານໃນໄລຍະໃໝ່.

 ເຈົ້າຄອງນະຄອນຫຼວງວຽງຈັນ ໄດ້ຕົກລົງແຕ່ງຕັ້ງສະຫາຍ ບຸນໜາ ຜາທຸມມະວົງ ຫົວໜ້າພະແນກພາຍໃນນະຄອນຫຼວງວຽງຈັນເປັນເຈົ້າເມືອງຈັນທະບູລີ (ຜູ້ໃໝ່) ແລະແຕ່ງຕັ້ງສະຫາຍນາງ ບົວລອນ ວົງດາລາແສນ ເຈົ້າເມືອງຈັນທະບູລີ (ຜູ້ເກົ່າ) ເປັນປະທານສະຫະພັນແມ່ຍິງນວ.

______________

ຂຽນໂດຍ:  ແປ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 19/02/2020