ເມືອງສຳພັນ ປະກາດຈົບຊັ້ນມັດທະຍົມຕອນຕົ້ນບຳລຸງ

  ວັນທີ 13 ກຸມພາ ຜ່ານມາທີ່ສະໂມສອນໃຫຍ່ຂອງເມືອງສຳພັນ ແຂວງຜົ້ງສາລີ ໄດ້ຈັດໃຫ້ມີພິທີປະກາດຈົບຊັ້ນມັດທະຍົມສຶກສາຕອນຕົ້ນບຳລຸງທົ່ວເມືອງເປັນເມືອງທີ 7 ຂອງແຂວງ ໂດຍໃຫ້ກຽດເຂົ້າຮ່ວມຂອງທ່ານ ພຸດ ສີມມະລາວົງ ຮອງລັດຖະມົນຕີກະຊວງສືກສາທິການ ແລະກີລາ, ທ່ານ ທອງສີ ເສົາສຸລີພົມ ຮອງເຈົ້າແຂວງຜົ້ງສາລີ ຜູ້ຊີ້ນຳຂົງເຂດວັດທະນະທຳສັງຄົມຂັ້ນແຂວງ, ມີທ່ານ ສົມຈີດ ຫັບລະກອນ ເຈົ້າ ເມືອງສຳພັນ, ທ່ານ ພອນໄຊ ອ່ອນສາ ຫົວໜ້າພະແນກສຶກສາທິການ ແລະ ກີລາແຂວງ, ມີບັນດາທ່ານຮອງເຈົ້າເມືອງ, ຫົວໜ້າຫ້ອງການສຶກສາທີການ ແລະກີລາຈາກ 7 ເມືອງ, ບັນດາທ່ານກຳມະການປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການຕະຫຼອດຮອດຜູ້ບໍລິຫານການສຶກສາພ້ອມດ້ວຍຄູ-ອາຈານພາຍໃນເມືອງພ້ອມດ້ວຍແຂກຖືກເຊີນເຂົ້າຢ່າງຫຼວງຫຼາຍ.

  ທ່ານ ແອ ຍີນທະນົງ ຫົວໜ້າຫ້ອງການສຶກສາທີການ ແລະ ກີລາເມືອງກໍ່ໄດ້ຂຶ້ນຜ່ານບົດສະຫຼຸບລາຍງານການຈັດຕັ້ງປະຕິບັດການຮຽນ-ການສອນບຳລຸງຍົກລະດັບ ການສືກສາຈົບຊັ້ນມັດທະຍົມຕອນ ຕົ້ນ ແລະທິດທາງແຜນການຂອງວຽກງານການສືກສານອກໂຮງຮຽນຊຶ່ງທົ່ວເມືອງສໍາພັນມີ 10 ກຸ່ມບ້ານພັດທະນາ, ມີ 63 ບ້ານ, ມີ 4.366 ຫຼັງຄາ, ມີ 5.289 ຄອບຄົວ, ວຽກງານການສືກສານອກໂຮງຮຽນພາຍຫຼັງປະກາດຈົບຊັ້ນປະຖົມບຳລຸງປີ 2013 ເປັນຕົ້ນມາຊຶ່ງເປັນເມືອງທີ 7 ຂອງ  ແຂວງ, ໄດ້ສ້າງເງື່ອນໄຂໃຫ້ແກ່ ການສືບຕໍ່ບຳລຸງຍົກລະດັບຊັ້ນມັດ ທະຍົມສືກສາຕອນຕົ້ນ, ໄດ້ເລີ່ມຈັດຕັ້ງການຮຽນ-ການສອນມາແຕ່ສົກຮຽນ 2013-2014 ແລະ ຮອດສົກຮຽນ 2018-2019 ລວມໄລຍະ 6 ສົກຮຽນທີ່ຜ່ານ ມາການບຳລຸງຍົກລະດັບຊັ້ນມັດ ທະຍົມສືກສາຕອນຕົ້ນສຳລັບປະຊາຊົນເຫັນວ່າມີຫຼາຍດ້ານທີ່ພົ້ນເດັ່ນ ໂດຍສະເພາະລະດັບຄວາມ ຮູ້ຄວາມເຂົ້າໃຈ, ຄວາມຕື່ນຕົວ, ຄວາມເປັນເຈົ້າການ ແລະອື່ນໆ,ລວມມີກຸ່ມເປົ້າໝາຍເຂົ້າຮຽນທັງ ໝົດ 7.689 ຄົນ, ຍິງ 3.708 ຄົນ, ໃນນີ້ຈົບສາມັນ 5.694 ຄົນ, ຍິງ 2.799 ຄົນ, ຈົບຳລຸງ1.939ຄົນ, ຍິງ 870 ຄົນ ສະເລ່ຍບັນລຸໄດ້ 97,19% ແລະຍັງເຫຼືອກຸ່ມເປົ້າໝາຍ 56 ຄົນ, ຍິງ 39 ຄົນ ທີ່ຍັງ ບໍ່ຈົບຍ້ອນປະລະການຮຽນຕາມ ສະພາບແວດລ້ອມອື່ນໆເຊັ່ນ: ການສ້າງຄອບຄົວ, ການຍົກຍ້າຍໄປຕ່າງເມືອງ, ຕ່າງແຂວງ, ການໄປຊອກວຽກເຮັດງານທຳຢູ່ບ່ອນອື່ນ ແລະບັນຫາດ້ານສຸຂະພາບຈຳນວນໝຶ່ງ, ໃນພິທີຕ່າງໜ້າອົງການປົກຄອງບ້ານ, ຄູສອນບຳລຸງ ແລະນັກຮຽນບຳລຸງຂຶ້ນປະກອບຄຳເຫັນກ່ຽວກັບການຮຽນ-ການສອນບໍາລຸງຍົກລະດັບການສືກສານອກໂຮງຮຽນ.

  ຈາກນັ້ນກໍ່ໄດ້ຜ່ານຂໍ້ຕົກລົງຂອງທ່ານລັດຖະມັນຕິກະຊວງສຶກສາທິການ ແລະ ກີລາສະບັບເລກທີ 165/ສສກ ວ່າດ້ວຍການປະກາດເມືອງສໍາພັນແຂວງຜົ້ງສາລີເປັນເມືອງຈົບຊັ້ນມັດທະຍົມຕອນຕົ້ນບຳລຸງ, ພ້ອມທັງມອບໃບຢັ້ງຢືນຈົບຊັ້ນມັດທະຍົມສືກສາຕອນຕົ້ນບຳລຸງທົ່ວເມືອງສຳພັນໂດຍການໃຫ້ກຽດຂຶ້ນມອບຂອງ ທ່ານ ພຸດ ສີມ ມະລາວົງ ຮອງລັດຖະມົນຕີກະຊວງສຶກສາທິການ ແລະກີລາ ແລະຮັບໂດຍມີທ່ານ ສົມຈີດ ຫັບລະກອນ ເຈົ້າເມືອງສໍາພັນ.

  ທ່ານ ພຸດ ສີມມະລາວົງ ກໍ່ໄດ້ມີຄຳເຫັນກ່ອນອື່ນທັງໄດ້ກ່າວສະ ແດງຄວາມຍ້ອງຍໍຊົມເຊີຍຕໍ່ຜົນ ງານ ແລະໄຊຊະນະທີ່ທັງອົງການ ປົກຄອງເມືອງກໍ່ຄືຜູ້ບໍລີຫານການ ສືກສາເມືອງຍາດມາໄດ້ຕະຫຼອດ ໄລຍະທີ່ຜ່ານມາ, ພ້ອມທັງຮຽກຮ້ອງ ໃຫ້ເອົາໃຈໃສ່ໃນການເຊຶ່ອມຊື່ມ ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ແຜນພັດທະນາເສດຖະກິດສັງຄົມ ໃນແຕ່ລະໄລຍະ ໂດຍສະເພາະແມ່ນ ມະຕິກອງປະຊຸມໃຫຍ່ຂອງພັກ, ແຂວງ ແລະເມືອງໃຫ້ຫັນແຖວຄູ-ອາຈານ ແລະນ້ອງນັກຮຽນຕະ ຫຼອດຮອດປະຊາຊົນບັນດາເຜົ່າ ຈົ່ງຮັບຮູ້ ແລະເຂົ້າໃຈເປັນເອກະພາບຢ່າງທົ່ວເຖິງ, ສືບຕໍ່ຈັດຕັ້ງປະຕິບັດແຜນຍຸດທະສາດການປະຕິຮູບລະບົບການສືກສາແຫ່ງຊາດ ຢ່າງມີຫຼັກການ ແລະ ໃຫ້ໄປຕາມ 3 ລັກສະນະທັງຮັບປະກັນໃຫ້ໄປຕາມ 5 ຫຼັກມູນຂອງການສືກສາ ແລະ ເອົາໃຈໃສ່ຍົກລະດັບຄຸນນະພາບການສືກສາໃຫ້ມີບາດກ້າວ, ຫັນປ່ຽນຢ່າງຕາງໜ້າເປັນຮູບປະທຳຫຼາຍຂຶ້ນ,ສືບຕໍ່ກໍ່ສ້າງແຜນຂະຫຍາຍການຮຽນການສອນໂດຍສຸມໃສ່ກຸ່ມເປົ້າໝາຍຊັ້ນມັດທະຍົມຕົ້ນຕອນບຳລຸງຢູ່ໃນບາງບ້ານທີ່ຍັງຕົກຄ້າງໃຫ້ສຳເລັດຕາມຄາດໝາຍທີ່ວາງໄວ້, ສືບຕໍ່ເອົາໃຈໃສ່ປັບປຸງກົງຈັກການຈັດຕັ້ງກໍ່ຄືລະບົບກົນໄກການຄຸ້ມຄອງການສືກສາໃນທົ່ວຂັ້ນທັງພາກລັດ ແລະເອກະຊົນໃຫ້ມີຄວາມໝັກແໜ້ນ ແລະ ເຂັ້ມແຂງ, ເອົາໃຈໃສ່ການແບ່ງຂັ້ນ ຄຸ້ມຄອງຕາມຂະແໜງການສາຍ ຕັ້ງສາຍຂວາງໃຫ້ລະອຽດຈະແຈ້ງ ເພື່ອມອບຄວາມຮັບຜີດຊອບໃຫ້ແຕ່ລະຂັ້ນຊີ້ນຳ ແລະຈັດຕັ້ງປະຕິບັດຕາມພາລະບົດບາດຂອບເຂດສີດ ແລະໜ້າທີດ້ວຍຄວາມຮັບຜີດຊອບສູງ, ຈົ່ງພ້ອມກັນສືບຕໍ່ການແຂ່ງຂັ້ນເປີດບັ້ນການຮຽນ-ການສອນຊັ້ນມັດທະຍົມຕອນປາຍໃຫ້ສຳເລັດຕາມການຄາດໝາຍຂອງເມືອງໃນປີ 2025–2030 ທີ່ວາງໄວ້. 

________________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์