7 ແຂວງພາກເໜືອຍົກລະດັບການເດີນສໍາຫຼວດເສດຖະກິດທົ່ວປະເທດ

   ຄະນະຊີ້ນໍາລະດັບຊາດການສໍາຫຼວດເສດຖະກິດທົ່ວປະເທດຂັ້ນແຂວງຄັ້ງທີ III ໄດ້ຈັດຊຸດອົບຮົມໃຫ້ນັກເດີນສໍາຫຼວດຂັ້ນແຂວງທົ່ວປະເທດໃນການສໍາຫຼວດເສດຖະ ກິດທົ່ວປະເທດຄັ້ງທີ III ທີ່ແຂວງໄຊຍະບູລີເປັນເຈົ້າພາບສໍາລັບພາກເໜືອມີ 7 ແຂວງຄື: ແຂວງຜົ້ງສາລີ, ແຂວງບໍ່ແກ້ວ, ຫຼວງນໍ້າທາ, ອຸດົມໄຊ, ຫົວພັນ, ນະຄອນ ຫຼວງພະບາງ ແລະ ໄຊຍະບູລີ. ໃຫ້ກຽດເຂົ້າຮ່ວມມີ ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ ທັງເປັນຫົວໜ້າຄະນະຊີ້ນໍາການສໍາຫຼວດເສດຖະກິດຂັ້ນແຂວງ, ທ່ານ ນາງ ເພັດສະໝອນ ສອນຮອງຫົວໜ້າສູນສະຖິຕິແຫ່ງຊາດກະຊວງແຜນການ ແລະການລົງທຶນຄະນະຊີ້ນໍາລະດັບຊາດການສໍາຫຼວດເສດຖະກິດທົ່ວປະເທດ, ມີຫົວໜ້າກົມ, ຮອງກົມສູນສະຖິຕິແຫ່ງຊາດ, ມີຫົວໜ້າ, ຮອງຫົວໜ້າພະແນກການອ້ອມຂ້າງແຂວງ, ມີນາຍບ້ານ, ຮອງນາຍບ້ານ, ບໍລິສັດ, ຫົວໜ່ວຍທຸລະກິດຫ້າງຮ້ານຕ່າງໆ, ນັກກວດກາຂັ້ນແຂວງ ແລະນັກເດີນສໍາຫຼວດທີ່ມາຈາກ 7 ແຂວງ.

  ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ ໃຫ້ຮູ້ວ່າ: ປະຈຸບັນພັກ-ລັດທົ່ວປວງຊົນລາວພວມສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງ ຊາດ 5 ປີ ຄັ້ງທີ 8 (2016-2020) ຊຶ່ງເປັນປີມ້ວນທ້າຍຂອງແຜນການ, ເວົ້າລວມສະເພາະ ແຂວງໄຊຍະບູລີ ກໍ່ຂຸ້ນຂ້ຽວຈັດ ຕັ້ງປະຕິບັດແຜນພັດທະນາເສດຖະກິດ-ສັງຄົມຂັ້ນເມືອງ, ຂັ້ນແຂວງໃຫ້ສໍາເລັດຕາມແຜນການທີ່ໄດ້ກໍານົດໄວ້ບັນດາຂໍ້ມູນຈາກການສໍາຫຼວດສະຖິຕິກະສິກໍາທົ່ວປະເທດ ແລະ ຂໍ້ມູນການສໍາຫຼວດເສດຖະ ກິດທົ່ວປະເທດຄັ້ງທີ III ນີ້ຈະເປັນຫຼັກຖານອັນສໍາຄັນຢັ້ງ ຢືນໃຫ້ເຫັນໄດ້ໝາກຜົນຂອງການ ປະຕິບັດແຜນພັດທະນາດັ່ງກ່າວ ແລະທັງເປັນຂໍ້ມູນທີ່ສ່ອງແສງຄວາມເປັນຈິງໃຫ້ແກ່ລັດຖະບານກໍ່ຄືການນໍາຂັ້ນແຂວງໄດ້ເຂົ້າໃຈ ສະພາບການຜະລິດຂອງຊາວກະສິກອນ ແລະຫົວໜ່ວຍພື້ນຖານເສດຖະກິດ, ທຸລະກິດການຄ້າ ແລະ ການບໍລິການ, ໂຄງປະກອບເສດຖະກິດ, ການນໍາໃຊ້ແຮງງານ, ນໍາໃຊ້ທີ່ດິນ ແລະ ຊັບພະຍາກອນອື່ນໆ ໃນການຜະລິດເພື່ອເປັນພື້ນຖານໃຫ້ແກ່ການວາງແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີຄັ້ງທີ 9 (2021-2025) ຕາມທິດການພັດທະນາແບບຍືນຍົງ ແລະ ສີຂຽວໃນປີ 2030 ແລະ ນໍາພາປະຊາຊົນບັນດາເຜົ່າຫຼຸດພົ້ນຈາກຄວາມທຸກຍາກ ແລະສະຖານະພາບຈາກປະເທດດ້ອຍພັດທະນາ.

 ທ່ານ ນາງ ເພັດສະໝອນ ສອນໃຫ້ຮູ້ຕື່ມວ່າ: ການຝຶກອົບຮົມຄັ້ງນີ້ບັນດານັກສໍາຫຼວດຈະໄດ້ຮຽນຮູ້ບັນດານິຍາມວິທີຈົດກ່າຍ, ເກັບກໍາບັນທຶກຂໍ້ມູນດ້ວຍລະບົບ CAPI (ຄາປີ) ເຊັ່ນ: ຄວາມໝາຍຄວາມສໍາຄັນຂອງການສໍາຫຼວດ, ໜ້າທີ່ຂອງນັກເດີນສໍາຫຼວດ ແລະ ນັກກວດກາຮູບແບບ ແລະ ຂັ້ນຕອນການຝຶກອົບຮົມນັກເດີນສໍາຫຼວດ, ຄຸນລັກສະນະທີ່ຕັ້ງ ແລະ ຂໍ້ມູນພື້ນຖານຂອງຫົວໜ້າວິສາຫະກິດ, ກິດຈະກໍາຕົ້ນຕໍທີ່ເຄື່ອນໄຫວໃນປີ 2018 ແລະ ຮູບແບບວິສາຫະກິດ, ສະຖານະດ້ານການຈັດຕັ້ງ ແລະການຂຶ້ນບັນຊີຂອງຫົວໜ່ວຍວິສາຫະກິດ, ການນໍາໃຊ້ເຕັກໂນໂລຊີຂໍ້ມູນຂ່າວສານເຂົ້າໃນການເຄື່ອນໄຫວວິສາຫະກິດ,ຄຸນລັກສະນະທີ່ຕັ້ງ ແລະຂໍ້ມູນພື້ນຖານຂອງຫົວໜ່ວຍວິສາຫະກິດ, ແຮງ ງານຄ່າແຮງສະຫວັດດີການ ແລະ ປະກັນສັງຄົມ, ລາຍຮັບ-ລາຍຈ່າຍ ແລະອັດຕາສ່ວນລາຍຮັບຂອງ ແຕ່ລະກິດຈະກໍາຕໍ່ລາຍຮັບລວມປີ 2018 ແລະການສ້າງແຜນ, ການ ສ້າງແຜນດໍາເນີນງານກ່ຽວກັບການຝຶກອົບຮົມນັກເດີນສໍາຫຼວດ, ແຜນການທົດລອງເກັບກໍາຂໍ້ມູນ ພາກສະໜາມ, ການຈໍາແນກບັນຫາຕ່າງໆຕ້ອງປະຕິບັດຕາມນິຍາມ ແລະຫຼັກການທີ່ໄດ້ລະບຸໃນຄູ່ມືການສໍາຫຼວດເຄັ່ງຂັດ, ຕ້ອງເຮັດວຽກ ແລະປະສານສົມທົບກັບອໍານາດການປົກຄອງຂັ້ນບ້ານຢ່າງໃກ້ສິດໃນການວາງແຜນ ແລະນັດໝາຍກັບແຕ່ລະຫົວໜ່ວຍວິສາຫະກິດຫ້າງຮ້ານໃຫ້ໄດ້ຖືກຈົດນັບຢ່າງຄົບຖ້ວນ ແລະຖືກຕ້ອງ.

  ການສໍາຫຼວດໃນຄັ້ງນີ້ແມ່ນນໍາໃຊ້ແບບສອບຖາມດ້ວຍຫຼາຍຮູບແບບດ້ວຍລະບົບ CAPI ແລະການຕອບທາງອີເມວທີ່ມີຫຼາຍພາສາເພື່ອຄວາມສະດວກ ແລະເປັນເອກະພຳາບໃນຂອບເຂດທົ່ວປະເທດ, ຊຸດອົບຮົມຈະໄດ້ດໍາເນີນໄປເປັນເວລາ 6 ວັນ ຈຶ່ງສໍາເລັດ.

_________________

ຂຽນໂດຍ: ບຸນທີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์