ການເຮັດເຟືອງໝັກ ເພື່ອເພີ່ມທາດອາຫານໃຫ້ສັດ

   ເຟືອງ ເປັນສິ່ງເສດເຫຼືອຈາກການປູກເຂົ້າທີ່ນິຍົມນໍາເປັນອາຫານຫຍາບໃນການລ້ຽງງົວ, ຄວາຍຊຶ່ງຫາໄດ້ງ່າຍ ແລະ ສາມາດເກັບສະສົມໄວ້ໄດ້ຕະຫຼອດລະດູແລ້ງ, ເຟືອງມີເຍື້ອໄຍສູງແຕ່ມີໂປຣຕີນຕໍ່າ 1-2% ຊຶ່ງບໍ່ພຽງພໍຕໍ່ຄວາມຕ້ອງການທາດອາຫານຂອງສັດ, ດັ່ງນັ້ນເພື່ອເພີ່ມຄຸນຄ່າທາງອາຫານຂອງເຟືອງຄໍລໍາກະສິກໍາວັນນີ້ ຈະນໍາສະເໜີກ່ຽວກັບການເຮັດເຟືອງໝັກ.

  ອີງຕາມຂໍ້ມູນຈາກສູນຄວບຄຸມມາດຕະຖານການລ້ຽງສັດ, ກົມລ້ຽງສັດ ແລະການປະມົງໃຫ້ຮູ້ວ່າ: ການເຮັດເຟືອງໝັກເປັນອີກທາງເລືອກໜຶ່ງຂອງຊາວກະສິກອນທີ່ມີເນື້ອທີ່ໃນການປູກຫຍ້າໜ້ອຍເນື່ອງຈາກວ່າເຟືອງແຫ້ງຈະຖືກໝັກດ້ວຍແກັສແອມໂມເນຍທີ່ໄດ້ຈາກການສະລາຍຕົວຂອງປຸ໋ຍຢູເຣຍຊຶ່ງຈະໃຊ້ເວລາປະມານ 21 ວັນ ຢູ່ໃນອ່າງຫຼືສິ່ງບັນຈຸທີ່ບໍ່ມີອາກາດເຂົ້າໄປ ແລະ ປ້ອງກັນບໍ່ໃຫ້ແກັສແອມໂມເນຍລະເຫີຍອອກ, ເຟືອງທີ່ຜ່ານຂະບວນການໝັກແລ້ວຈະມີລະດັບໂປຣຕີນເພີ່ມຂຶ້ນມາເປັນ 6-8% ຊຶ່ງພຽງພໍກັບຄວາມຕ້ອງການທາດອາຫານຂອງສັດ.

  ສໍາລັບອັດຕາສ່ວນປະສົມໃນການເຮັດເຟືອງໝັກປະກອບມີປຸ໋ຍຢູເຣຍ 5 ກິໂລກຣາມ ຕໍ່ນໍ້າ 100 ລິດ ແລະເຟືອງ 100 ກິໂລກຣາມ, ຈາກນັ້ນນໍາເອົາເຟືອງໃສ່ຖັງ ຫຼືຖົງແລ້ວຢຽບໃຫ້ແໜ້ນ, ລະລາຍປຸ໋ຍຢູເຣຍດ້ວຍນໍ້າໃນອັດຕາທີ່ກໍານົດໄວ້, ຫົດດ້ວຍນໍ້າຢູເຣຍທີ່ກຽມໄວ້ຫຼັງຈາກນັ້ນປິດຝາຖັງ ຫຼືມັດຖົງໃຫ້ແໜ້ນແລ້ວປ່ອຍໃຫ້ເຟືອງເກີດຂະບວນການໝັກຢ່າງໜ້ອຍ 21 ວັນຈຶ່ງສາມາດນໍາໄປໃຫ້ສັດກິນໄດ້.

   ສິ່ງທີ່ຄວນໃຈໃສ່ໃນການເຮັດເຟືອງໝັກ, ເມື່ອເປີດຖັງໝັກເຟືອງແລ້ວຕ້ອງປົກໃຫ້ແຈບດີບໍ່ໃຫ້ມີຮູຮົ່ວຫຼືບໍ່ໃຫ້ອາກາດເຂົ້າໄປໄດ້ເພາະຈະເຮັດໃຫ້ລົດຊາດຂອງເຟືອງມີ ການປ່ຽນແປງຊຶ່ງຈະເຮັດໃຫ້ສັດກິນໄດ້ໜ້ອຍລົງ ແລະຖ້າເປັນເຊື້ອລາສີດໍາແມ່ນບໍ່ຄວນໃຫ້ສັດກິນເພາະຈະເກີດການສະສົມເຊື້ອພະຍາດໃນໂຕສັດ ແລະອາດຈະສົ່ງຜົນກະທົບເຖິງຜູ້ທີ່ກິນຊີ້ນສັດດັ່ງກ່າວນໍາອີກ, ໃນການເຮັດເຟືອງໝັກບໍ່ຄວນປຸ໋ຍຢູເຣຍເກີນ 5% ເພາະຈະເປັນການສິ້ນເປືອງ ແລະຈະເກີດອັນຕະລາຍຕໍ່ສັດຖ້າເກີນ 7% ຂຶ້ນໄປ, ຖ້າສັດທີ່ບໍ່ເຄີຍກິນເຟືອງໝັກ ແມ່ນຄວນປະສົມກັບອາຫານເກົ່າກ່ອນແລ້ວຄ່ອຍໆເພີ່ມສັດສ່ວນຂຶ້ນແຕ່ບໍ່ເກີນ 50% ຂອງອາຫານທີ່ສັດກິນທັງໝົດ ຫຼື ອາດ ຈະໃຊ້ກາກນໍ້າຕານຫົດໃສ່ເພື່ອໃຫ້ມີກິ່ນຫອມເຮັດໃຫ້ສັດມີຄວາມຢາກກິນໂດຍທົ່ວໄປແລ້ວສັດຈະໃຊ້້ເວລາໃນການທີ່ຈະຄຸ້ນເຄີຍກັບເຟືອງໝັກປະມານ 2 ອາທິດ.

_____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์