ເຊິນຈືເຕີ ຮັບລາງວັນນັກທຸລະກິດຊັ້ນນຳດີເດັ່ນ 2019

  ບໍລິສັດເຊິນຈືເຕີພັດທະນາ ແລະບໍລິການຈຳກັດເປັນອີກບໍລິສັດໜຶ່ງທີ່ດຳເນີນທຸລະກິດເຂົ້າໃສ່ຫຼາຍຂະແໜງການທີ່ສຳຄັນເປັນຕົ້ນສ້າງຕະຫຼາດ, ສວນຢາງພາລາ, ຄິວລົດ, ໂຮງແຮມ, ໂຮງຮຽນ ແລະ ອື່ນໆ ໂດຍຕະຫຼອດການດຳເນີນທຸລະກິດໄລຍະຜ່ານມາບໍລິສັດໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຂອງປະເທດກໍຄືແຂວງຫຼວງນໍ້າທາສິ່ງດັ່ງກ່າວໄດ້ເຮັດໃຫ້ບໍລິສັດໄດ້ຮັບຫຼາຍໆລາງວັນ ແລະໃບຍ້ອງຍໍຈາກລັດຖະບານ, ຫຼ້າສຸດເມື່ອວັນທີ 14 ກຸມພາຜ່ານມາບໍລິສັດກໍໄດ້ຖືກຄັດເລືອກໃຫ້ຮັບລາງວັນນັກທຸລະກິດຊັ້ນນຳດີເດັ່ນ 2019.

  ທ່ານ ຄຳເຫຼັກ ເຊິນຈືເຕີ ໃຫ້ສຳພາດວ່າ: ການທີ່ໄດ້ຖືກຄັດເລືອກໃຫ້ຮັບລາງວັນນັກທຸລະກິດຊັ້ນນຳດີເດັ່ນ 2019 ຂ້າພະເຈົ້າຮູ້ສຶກພາກພູມໃຈແລະເປັນກຽດຢ່າງຍິ່ງທີ່ການນຳພັກ-ລັດ, ອົງການຈັດຕັ້ງຕ່າງໆໄດ້ເຫັນເຖິງຄວາມສຳຄັນ ແລະ ໄດ້ຍ້ອງຍໍຊົມເຊີຍຕໍ່ການດຳເນີນທຸລະກິດ ແລະ ການເຄື່ອນໄຫວຊ່ວຍເຫຼືອສັງຄົມຂອງບໍລິສັດຊຶ່ງໄດ້ເປັນແຮງບັນດານໃຈໃຫ້ຂ້າພະເຈົ້າ ແລະພະນັກງານໃນບໍລິສັດມີກຳລັງໃຈສູ້ຊົນພັດທະນາຕົນເອງ ແລະອົງກອນໃຫ້ມີຜົນສຳເລັດຍິ່ງໃຫຍ່ກວ່າເກົ່າ.

  ທ່ານ ຄຳເຫຼັກ ເຊິນຈືເຕີ ກ່າວຕື່ມວ່າ: ນັບແຕ່ປີ 1983 ແມ່ນໄດ້ເລີ່ມເຮັດທຸລະກິດຄ້າຂາຍ, ຈາກນັ້ນໃນປີ 1991 ກໍໄດ້ຍ້າຍຖິ່ນຖານຈາກບ້ານເກີດແຂວງຜົ້ງສາລີມາຢູ່ແຂວງຫຼວງນໍ້າທາ ແລະ ໄດ້ສືບຕໍ່ເຮັດທຸລະກິດຄ້າຂາຍຈົນຮອດປີ 2004 ຕົກມາຮອດປີ 2005 ຈຶ່ງໄດ້ສ້າງຕັ້ງບໍລິສັດເຊິນຈືເຕີພັດທະນາ ແລະ ບໍລິການຈຳກັດດຳເນີນທຸລະກິດຢູ່ສອງແຂວງຄື: ແຂວງຫຼວງນໍ້າທາ ແລະ ແຂວງບໍ່ແກ້ວ, ປະຈຸບັນທຸລະກິດຂອງບໍລິສັດປະກອບມີຕະຫຼາດອຸດສາຫະກຳ-ກະສິກຳເມືອງສິງ, ຕະຫຼາດກາງຄືນ, ສວນຢາງພາລາ, ສະຖານີລົດໂດຍສານພາຍໃນ ແລະຕ່າງປະເທດ, ໂຮງແຮມ, ເຮືອນພັກ ແລະຮ້ານອາຫານ, ໂຮງຮຽນອະນຸບານ, ປະຖົມ ແລະມັດທະຍົມເຊິນຈືເຕີ.

  ຄຽງຄູ່ກັບການດຳເນີນທຸລະກິດດັ່ງກ່າວ ທາງບໍລິສັດຍັງໄດ້ປະກອບສ່ວນສ້າງວຽກເຮັດງານທຳໃຫ້ແກ່ປະຊາຊົນໃກ້ຄຽງ ແລະພັດທະນາການສຶກສາພ້ອມທັງປະກອບສ່ວນຊ່ວຍເຫຼືອສັງຄົມໃນຫຼາຍດ້ານສິ່ງສຳຄັນແມ່ນປະກອບສ່ວນໃນວຽກງານເຄື່ອນໄຫວກໍ່ສ້າງຮາກຖານການເມືອງ-ພັດທະນາຊົນນະບົດ ແລະລົບລ້າງຄວາມທຸກຍາກໃນປີ 2006-2010.

____________

ຂຽນໂດຍ: ສ.ອາສາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์