ມອບເຄື່ອງໃຫ້ກົມພົວພັນຄົນເຊື້ອຊາດລາວຢູ່ຕ່າງປະເທດ

  ເພື່ອເປັນການປະກອບສ່ວນຊຸກຍູ້ວຽກງານຂະບວນການກີລາຢູ່ກົມພົວພັນຄົນເຊື້ອຊາດລາວ, ກະຊວງການຕ່າງປະເທດໃຫ້ເປັນຂະບວນການຟົດຟື້ນ, ໃນວັນທີ 28 ມັງກອນຜ່ານມາ  ທ່ານ ສີສະຫວັນ ສຸກກະເສີມ ທີ່ປຶກສາມູນນິທິຊ່ວຍເຫຼືອຄົນທຸກຍາກແຫ່ງ ສປປ ລາວ ໃນນາມສ່ວນຕົວໄດ້ມອບເຄື່ອງກີລາຈຳນວນ 34 ຊຸດມູນຄ່າ 1,8 ລ້ານກີບ ໃຫ້ກຽດຮັບໂດຍ ທ່ານ ໄພລາມ ອຸດົມຄຳ ຫົວໜ້າກົມພົວພັນຄົນເຊື້ອຊາດລາວຢູ່ຕ່າງປະເທດພ້ອມທັງໄດ້ສະແດງ ຄວາມຂອບໃຈນຳ ທ່ານ ສີສະຫວັນ ສຸກກະເສີມ ທີ່ມີນ້ຳໃຈປະກອບສ່ວນເຄື່ອງຊຸກຍູ້ວຽກງານຂະບວນການກີລາໃຫ້ມີຄວາມເຂັ້ມແຂງ ແລະຫວັງຢ່າງຍິ່ງວ່າໃນຕໍ່ໜ້າຍັງຈະໄດ້ຮັບການຊ່ວຍເຫຼືອຕື່ມອີກ.

  ທ່ານ ສີສະຫວັນ ສຸກກະເສີມ ໄດ້ໃຫ້ຮູ້ວ່າ: ຂ້າພະເຈົ້າໄດ້ຖືສຳຄັນວຽກງານມູນນິທິ ແລະໃຫ້ການປະກອບສ່ວນຊຸກຍູ້ທາງດ້ານວັດຖຸປັດໄຈໃຫ້ພາກສ່ວນທີ່ມີຄວາມຂາດເຂີນດ້ານອຸປະກອນຮັບໃຊ້ໃຫ້ແກ່ວຽກງານເປັນຕົ້ນແມ່ນຄອມພິວເຕີ, ກ້ອງຖ່າຍຮູບ, ເຄື່ອງກີລາ ແລະ ອື່ນໆ ນອກນັ້ນຍັງໄດ້ລະດົມການຊ່ວຍ ເຫຼືອຈາກນັກລົງທຶນຕ່າງປະເທດມາໃຫ້ມູນນິທິຊ່ວຍເຫຼືອຄົນທຸກຍາກແຫ່ງສປປ ລາວ ເປັນຈຳນວນຫຼາຍສົມຄວນເພື່ອໄປມອບຕໍ່ໃຫ້ຜູ້ທຸກຍາກດ້ອຍໂອກາດໃນເຂດຊົນນະບົດເພື່ອຊ່ວຍເຮັດໃຫ້ຊີວິດການເປັນຢູ່ຂອງເຂົາເຈົ້າດີຂຶ້ນເລື້ອຍໆ.

แชร์