ສກອ ສະຫຼຸບຜົນງານ ພ້ອມວາງແຜນພັດທະນາການສຶກສາ

   ວັນທີ 14 ກຸມພາ ຜ່ານມາ ທີ່ໂຮງແຮມດອນຈັນພາເລດນະຄອນຫຼວງວຽງຈັນ ສະມາຄົມການສຶກສາພາກເອກະຊົນ (ສກອ) ໄດ້ຈັດກອງປະຊຸມສະຫຼຸບວຽກ ງານການເຄື່ອນໄຫວປະຈຳສົກປີ 2019 ແລະຜ່ານທິດທາງແຜນ ການປະຈໍາປີ 2020 ເພື່ອເປັນການຕີລາຄາຄືນກ່ຽວກັບວຽກ ງານຜ່ານມາ ແລະວາງແຜນຕໍ່ໜ້າ ພ້ອມທັງຍ້ອງຍໍບຸກຄົນດີເດັ່ນທີ່ມີ ຜົນງານໃນການປະກອບສ່ວນເຂົ້າ ໃນການພັດທະນາວຽກງານພາຍ ໃນໃຫ້ກ້າວໜ້າຂຶ້ນເລື້ອຍໆ, ໂດຍ ພາຍໃຕ້ການເປັນປະທານຂອງ ທ່ານ ບົວລານ ສີລິປັນຍາ ຮອງລັດຖະມົນຕີກະຊວງສຶກສາທິການ ແລະກີລາ, ມີທ່ານ ຄຳແສນ ສີສະວົງ ປະທານສະມາຄົມການສຶກສາພາກເອກະຊົນ ແລະທ່ານ ຄຳພອນ ໄຊສົມພູ ຫົວໜ້າຫ້ອງການສົ່ງເສີມ ການສຶກສາພາກເອກະຊົນກະຊວງ ສຶກສາທິການ ແລະກີລາ, ບັນດາ ຄະນະ ສກອ, ພະນັກງານ ແລະ ພາກສ່ວນກ່ຽວຂ້ອງເຂົ້າຮ່ວມ.

  ທ່ານ ຄຳແສນ ສີສະວົງ ກ່າວ ວ່າ:ສກອ ໄດ້ສ້າງຕັ້ງຂຶ້ນປີ 2001 ເປັນຕົ້ນມາມີພາລະບົດບາດໜ້າທີ່ເຄື່ອນໄຫວເປັນເສນາທິການໃຫ້ກະຊວງສຶກສາທິການ ແລະກີລາໃນການປະສານງານກ່ຽວກັບການສຶກສາເອກະຊົນ, ມີສໍານັກງານ ໃຫຍ່ຕັ້ງຢູ່ນະຄອນຫຼວງວຽງຈັນ, ມີຄະນະບໍລິຫານງານ ແລະຜູ້ຕາງ ໜ້າສະມາຄົມປະຈໍາຢູ່ແຕ່ລະແຂວງ ໃນຂອບເຂດທົ່ວປະເທດໃນສົກປີ 2018-2019 ຜ່ານມາ ໄດ້ເອົາໃຈໃສ່ປະຕິບັດຕາມ 5 ຫຼັກມູນຂອງ ການສຶກສາໄປຄຽງຄູ່ກັບ 3 ຂໍ້ແຂ່ງ ຂັນຂອງກະຊວງສຶກສາທິການ ແລະກີລາວາງອອກຄື:ການສອນ ດີຮຽນເກັ່ງ, ຕ້ານ ແລະສະກັດກັ້ນ ປະກົດການຫຍໍ້ທໍ້ພາຍໃນໂຮງຮຽນ ແລະການສ້າງໂຮງຮຽນໃຫ້ມີສະພາບແວດລ້ອມທີ່ດີ, ຊຶ່ງຜ່ານການ ຈັດຕັ້ງປະຕິບັດຂອງ ສກອ ຜ່ານມາເຫັນວ່າມີຜົນສຳເລັດອັນພົ້ນ ເດັ່ນຫຼາຍດ້ານເປັນຕົ້ນແມ່ນດ້ານແນວຄິດ-ການເມືອງໄດ້ມີການພົບ ປະແລກປ່ຽນຄຳຄິດເຫັນຮ່ວມກັນ ເພື່ອແກ້ໄຂບັນຫາຕ່າງໆ ທີ່ເກີດ ຂຶ້ນໃນສັງຄົມຢ່າງທັນກັບສະພາບ ການ, ໄດ້ມີການປະກອບສ່ວນ ໃນການຊ່ວຍເຫຼືອອຸປະກອນການ ຮຽນການສອນ ແລະເຄື່ອງກີລາ ຈຳນວນໜຶ່ງໃຫ້ແກ່ໂຮງຮຽນນໍ້າໂອເມືອງວຽງພູຄາ ແຂວງຫຼວງ ນໍ້າທາ  ແລະສຳເລັດການສ້າງຕັ້ງ ສະມາຄົມຂັ້ນແຂວງ, ຂັ້ນເມືອງ ແລະນະຄອນຫຼວງວຽງຈັນ ແລະ ມີຄະນະຮັບຜິດຊອບສກອຢູ່ທັງໝົດ 14 ແຂວງ ແລະ7 ເມືອງໃນນະ ຄອນຫຼວງວຽງຈັນ, ປະຈຸບັນທົ່ວ ປະເທດມີໂຮງຮຽນພາກເອກະຊົນ ທັງໝົດ 802 ແຫ່ງໃນນີ້, ເຂົ້າ ເປັນສະມາຊິກ ສກອ 437 ແຫ່ງ ແລະໃນສົກປີ 2018-2019 ຜ່ານ ມາສາມາດຂະຫຍາຍສະມາຊິກ ເພີ່ມຂຶ້ນໄດ້ 45 ແຫ່ງ.

  ສ່ວນທິດທາງແຜນການໃນຕໍ່ ໜ້າແມ່ນຈະສືບຕໍ່ແກ້ໄຂການສ້າງຄວາມເຂັ້ມແຂງໃຫ້ແກ່ຜູ້ບໍລິຫານແລະຄູ-ອາຈານໃຫ້ສອດຄ່ອງກັບຄວາມຮຽກຮ້ອງຕ້ອງການຂອງບັນດາໂຮງຮຽນແລະສະພາບການ ຕົວຈິງ, ສືບຕໍ່ແລກປ່ຽນບົດຮຽນ ສ້າງຄວາມເຂັ້ມແຂງໃຫ້ແກ່ວິທະຍາໄລເພື່ອຮ່ວມມືສ້າງເປັນມະຫາ ວິທະຍາໄລ ແລະສືບຕໍ່ຈັດສໍາມະນາສຶກສາອົບຮົມວິຊາຄູຂອງສະຖາບັນການສຶກສາຕ່າງໆພາກເອກະຊົນເພື່ອເລັ່ງໃສ່ການປັບປຸງຄຸນນະພາບການຮຽນການສອນໃຫ້ໄດ້ມາດຕະຖານສາມາດເຊື່ອມ ໂຍງກັບພາກພື້ນ ແລະສາກົນຫຼາຍ ຂຶ້ນ.

   ໂອກາດດັ່ງກ່າວ, ທ່ານ ບົວລານ ສິລິປັນຍາ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ທາງສະມາຄົມການສຶກສາພາກເອກະຊົນຍາດມາໄດ້ໃນໄລຍະຜ່ານມາພ້ອມທັງມີຄຳເຫັນໃຫ້ສືຕໍ່ເອົາໃຈໃສ່ທາງດ້ານການເມືອງ-ແນວ ຄິດ ໂດຍໃຫ້ແຕ່ລະສະຖາບັນການສຶກສານັບຕັ້ງແຕ່ລ້ຽງເດັກຈົນຮອດມະຫາວິທະຍາໄລໃຫ້ສືບຕໍ່ຜັນຂະຫຍາຍ 3 ລັກສະນະ ແລະ 5 ຫຼັກມູນພື້ນຖານຂອງການສຶກສາໄປ ຄຽງຄູ່ກັບ 3 ຂໍ້ແຂ່ງຂັນຂອງກະຊວງສຶກສາທິການ ແລະກີລາວາງອອກນອກນັ້ນ,ທາງດ້ານວິຊາສະເພາະກໍ່ໃຫ້ເອົາໃຈໃສ່ກ່ຽວກັບວຽກ ງານການສຶກສາກ່ອນໄວຮຽນ, ຊຶ່ງທາງພາກລັດຍັງສືບຕໍ່ສົ່ງເສີມໃຫ້ທຸກພາກສ່ວນຂອງສັງຄົມໄດ້ລົງທຶນໃສ່ການພັດທະນາແນ ໃສ່ບັນລຸເປົ້າໝາຍສະຫັດສະວັດດ້ານການພັດທະນາ; ໃຫ້ແຕ່ລະສະຖານສ້າງນັກຮຽນເກັ່ງຊັ້ນປະຖົມ ແລະ  ມັດທະຍົມຕົ້ນ-ປາຍໃຫ້ເພີ່ມຂຶ້ນໃນລະດັບເມືອງ, ແຂວງ ແລະລະດັບຊາດໃຫ້ໄດ້ທັງປະລິມານ ແລະ ຄຸນນະພາບພ້ອມນັ້ນ, ກໍໃຫ້ເອົາໃຈໃສ່ວຽກງານທາງດ້ານສາຍອາຊີວະສຶກສາ ແລະການສຶກສາຊັ້ນສູງໃຫ້ປະສົບຜົນສຳເລັດຕາມແຜນການທີ່ວາງໄວ້.

---

ໂດຍ:  ບຸນນິກ

แชร์