ຫຼວງນໍ້າທາ ຈັດກອງປະຊຸມວິຊາການຄຸ້ມຄອງປ່າໄມ້

  ກອງປະຊຸມວິຊາການດ້ານການຄຸ້ມຄອງປ່າໄມ້ພາຍໃນພະແນກກະສິກໍາ ແລະປ່າໄມ້ແຂວງຫຼວງນໍ້າທາ ໄດ້ຈັດຂຶ້ນໃນວັນທີ 12 ກຸມພາ 2020 ໂດຍການເປັນປະທານທ່ານ ພິມແກ້ວ ທໍາລາສິນ ຫົວໜ້າພະແນກກະສິກໍາ ແລະປ່າໄມ້ແຂວງຫຼວງນໍ້າທາ,ມີຮອງຫົວໜ້າພະແນກ,ຫົວໜ້າຂະແໜງ-ຮອງຫົວໜ້າຂະແໜງ,ຫົວໜ້າຫ້ອງການກະສິກໍາ ແລະປ່າໄມ້ 5 ເມືອງເຂົ້າຮ່ວມ.

ທ່ານ ຄໍາເມິງ ແດງມະນີ ຫົວໜ້າຂະແໜງປ່າໄມ້ໄດ້ກ່າວວ່າ: ທົ່ວແຂວງມີເນື້ອທີ່ທັງໝົດ 939,100 ເຮັກຕາ,ເນື້ອທີ່ປ່າໄມ້ 653.499 ເຮັກຕາ ໃນນີ້ປ່າສະຫງວນແຫ່ງຊາດນໍ້າຫ້າ 222,400 ເຮັກຕາ,ປ່າສະຫງວນແຫ່ງຊາດນໍ້າກ່ານ 57.400 ເຮັກຕາ,ປ່າປ້ອງກັນແຫ່ງຊາດ 307.420 ເຮັກຕາ,ປ່າຜະລິດແຫ່ງຊາດ 44.7 99 ເຮັກຕາ, ປ່າສະຫງວນ ຂອງແຂວງ 6.750 ຮຕ, ປ່າສະ ຫງວນຂອງເມືອງ  14.730 ເຮັກ ຕາ, ເນື້ອທີ່ປ່າໄມ້ກວມ  69,5%, ຄວາມປົກຫຸ້ມ  60,8%, ການຈັດຕັ້ງປະຕິບັດວຽກງານຄຸ້ມຄອງປ່າໄມ້ໃນໄລຍະຜ່ານມາໄດ້ສ້າງແຜນຈັດສັນ ແລະຄຸ້ມຄອງປ່າຜະລິດ 2 ເຂດສໍາເລັດເຊີ່ງມີເນື້ອທີ່ 44.799 ເຮັກຕາຄື: ປ່າຜະ ລິດນໍ້າ ຟ້າເມືອງລອງມີເນື້ອທີ່ 20.150 ເຮັກຕາ ມີ 4 ເຂດຄຸ້ມຄອງ ແລະປ່າຜະລິດພູເລັດລ້ອງມູນ ເມືອງວຽງພູຄາ, ເມືອງນາແລມີເນື້ອທີ່ 24.649 ເຮັກຕາ, ມີ 3 ເຂດຄຸ້ມຄອງ, ບັນຫາ ແລະສິ່ງທ້າທາຍສາເຫດຫຼັກເຮັດໃຫ້ປ່າໄມ້ເຊື່ອມໂຊມຍ້ອນການຜະລິດກະສິກໍາ, ການຫັນປ່ຽນທີ່ດິນຂະຫຍາຍການປູກພືດເປັນສິນຄ້າ, ການຖາງປ່າເຮັດໄຮ່, ການລັກລອບຂຸດຄົ້ນໄມ້, ໄຟໄໝ້ລາມປ່າ, ການກໍ່ສ້າງໂຄງລ່າງພື້ນຖານ, ການສ້າງທາງ ແລະການສ້າງເຂື່ອນໄຟຟ້າເຫຼົ່ານີ້ເປັນຕົ້ນ.

 ທິດທາງແຜນການໃນຕໍ່ໜ້າສືບຕໍ່ເຜີຍແຜ່ເຊື່ອມຊຶມລະບຽບກົດໜາຍໃຫ້ສັງຄົມຢ່າງທົ່ວເຖິງ, ປະກອບສ່ວນຍົກລະດັບຄວາມປົກຄຸມປ່າໄມ້ໃຫ້ໄດ້ 70% ດ້ວຍການເລັ່ງໃສ່ຟື້ນຟູປ່າໄມ້,ສ້າງແຜນຈັດສັນ ແລະຄຸ້ມຄອງປ່າໄມ້ຂອງບ້ານໃຫ້ໄດ້ 20 ບ້ານໃນອ້ອມເຂດປ່າຜະລິດ, ປະກອບສ່ວນພັດທະນາວຽກງານຫຼຸດຜ່ອນອາຍພິດເຮືອນແກ້ວຈາກການທໍາລາຍປ່າໄມ້ໂດຍການກຽມພ້ອມໃຫ້ແກ່ການຊື້ຂາຍກາກບ໋ອນປ່າໄມ້.ຈາກນັ້ນຜູ້ເຂົ້າຮ່ວມໄດ້ພ້ອມກັນປະກອບຄໍາຄິດຄໍາເຫັນໃນການຈັດຕັ້ງປະຕິບັດວຽກງານຜ່ານມາ ແລະວາງແຜນແກ້ໄຂຮ່ວມກັນ.

 ທັງນີ້ເພື່ອເຮັດໃຫ້ວຽກງານຄຸ້ມຄອງປົກປັກຮັກສາຊັບພະຍາກອນປ່າໄມ້ຊີວະນາໆພັນສັດນໍ້າ-ສັດປ່າ, ບັນຫາໄພຂົ່ມຂູ່ຕ່າງໆ ເພື່ອເຮັດໃຫ້ປ່າໄມ້ມີຄວາມອຸດົມສົມບຸນ, ມີຄວາມຍືນຍົງໄປຕາມຍຸດທະສາດຂອງລັດຖະບານໃຫ້ມີເນື້ອທີ່ປ່າໄມ້ປົກຄຸມ 70% ໃນປີ 2020, ແຂວງຫຼວງນໍ້າທາກໍ່ໄດ້ສຸມກໍາລັງແຮງທາງດ້ານບຸກຄະລາກອນ, ວັດ ຖຸອຸປະກອນ ແລະງົບປະມານຈາກພາກລັດ, ເອກະຊົນ, ບໍລິສັດ ແລະທຶນສະໜັບສະໜູນຈາກອົງການຈັດຕັ້ງສາກົນຕ່າງໆເຂົ້າໃນ ການຄຸ້ມຄອງປົກປັກຮັກສາປ່າໄມ້ໃຫ້ຍືນຍົງຕະຫຼອດໄປ ແລະຍັງໄດ້ ກໍານົດຂອບເຂດປັກຫຼັກໝາຍ, ຕິດປ້າຍ, ກວດກາລາດຕະເວນ, ການສໍາຫຼວດເກັບກໍາຂໍ້ມູນ ສັດນໍ້າ-ສັດປ່າ,ຕັ້ງແຄ້ມ, ລ່ອງເຮືອທ່ຽວ ຊົມນໍ້າຕົກຕາດ ແລະຖໍ້າຕ່າງໆແບບປະຊາຊົນມີສ່ວນຮ່ວມ,ຊຶ່ງເປັນການພັດທະນາເສດຖະກິດ-ສັງຄົມ ຂອງຊຸມຊົນນັບມື້ດີຂຶ້ນ,ພ້ອມນີ້ຍັງຖືເອົາວຽກງານໂຄສະນາເຜີຍ ແຜ່ປູກຈິດສໍານຶກເປັນສໍາຄັນໃຫ້ປະຊາຊົນທ້ອງຖິ່ນໄດ້ຮັບຮູ້ບັນດານິຕິກໍາຕ່າງໆ, ຄວາມສໍາຄັນຂອງປ່າໄມ້, ສັດນໍ້າ-ສັດປ່າ ໃຫ້ມີສ່ວນຮ່ວມໃນການປົກປັກຮັກສາຊັບພະ ຍາກອນອັນລໍ້າຄ່າຮ່ວມກັນ.

 _____________

ຂຽນໂດຍ: ມຸນຕີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์