ລະມາມ ລວມຍອດຜະລິດຕະພັນພາຍໃນເພີ່ມຂຶ້ນ 7,10%

  ກອງປະຊຸມໃຫຍ່ຜູ້ແທນອົງຄະນະພັກເມືອງລະມາມຄັ້ງທີ IX ໄດ້ໄຂຂຶ້ນໃນວັນທີ 12 ກຸມພາ ພາຍໃຕ້ການເປັນປະທານຂອງສະຫາຍ ຂັນຕີ ສີລະວົງສາ ກຳມະການພັກແຂວງ, ເລຂາຄະນະບໍລິຫານງານພັກເມືອງ-ເຈົ້າເມືອງລະມາມ, ເປັນກຽດເຂົ້າຮ່ວມຂອງສະຫາຍ ຄໍາເຜີຍ ບຸດດາວຽງ ກຳມະການສູນກາງພັກເລຂາຄະນະບໍລິ ຫານງານພັກແຂວງ-ເຈົ້າແຂວງເຊກອງ, ມີຜູ້ແທນສົມບູນ, ແຂກຖືກເຊີນຈາກບັນດາເມືອງຂອງ 3 ແຂວງ ອ້ອມຂ້າງຄື: ຈໍາປາສັກ, ສາລະວັນ ແລະອັດຕະປື, ພ້ອມດ້ວຍພະແນກການຂັ້ນແຂວງ, ຫ້ອງການອ້ອມຂ້າງເມືອງເຂົ້າຮ່ວມ.

  ສະຫາຍ ຂັນຕີ ສີລະວົງສາ ໄດ້ຕາງໜ້າໃຫ້ແກ່ອົງຄະນະພັກເມືອງຜ່ານບົດລາຍງານການເມືອງທັງສອງພາກຊຶ່ງໄດ້ຕີລາຄາຜົນສໍາເລັດໃນການຊີ້ນຳ-ນຳພາຂອງອົງ ຄະນະພັກເມືອງລະມາມຕະຫຼອດໄລຍະ 5 ປີ ຜ່ານມາເຫັນວ່າໄດ້ສຸມຈິດໃຈຜັນຂະຫຍາຍມະຕິຂອງອົງຄະນະພັກເມືອງຊຸດທີ VIII ຂອງຕົນຢ່າງຕັ້ງໜ້າໂດຍຍົກສູງຄວາມສາມາດນຳພາ, ປັບປຸງແບບແຜນວິທີເຮັດວຽກ, ຢຶດໝັ້ນແນວທາງປ່ຽນແປງຂອງພັກ,ປົກປັກຮັກສາສະຖຽນລະພາບທາງດ້ານການເມືອງ,ພັດທະນາເສດຖະກິດເຂັ້ມແຂງ, ສັງຄົມມີຄວາມສະຫງົບ, ຄຸ້ມຄອງລັດ-ຄຸ້ມຄອງສັງຄົມດ້ວຍລະບຽບກົດໝາຍຢ່າງໜັກແໜ້ນ ແລະຍຸຕິທຳ, ສິ່ງທີ່ພົ້ນເດັ່ນສາມາດແກ້ໄຂປະກົດການຫຍໍ້ທໍ້ທາງສັງຄົມໃຫ້ຫຼຸດໜ້ອຍຖອຍລົງໂດຍສະເພາະໄດ້ແກ້ໄຂຄະດີທີ່ເກີດຂຶ້ນທັງໝົດ 146 ລາຍ, ຢຶດໄມ້ປະເພດຕ່າງໆໄດ້ 144 ແມັດກ້ອນ, ທໍາລາຍອາວຸດລ່າເນື້ອ (ປືນແກັບ) 2.243 ກະບອກ, ອາວຸດເສິກ 5 ກະບອກ, ໝໍ້ຊ໋ອດ 30 ເຄື່ອງ, ຈັກສະຕິນ 62 ເຄື່ອງ, ປະກາດບ້ານປ້ອງກັນຄວາມສະຫງົບດີໄດ້ 5 ບ້ານ,ສາມາດເປັນຕົວແບບມີ 2 ບ້ານ ແລະອື່ນໆ. ເສດຖະກິດຂອງເມືອງຂະຫຍາຍຕົວຢ່າງຕໍ່ເນື່ອງ, ລວມຍອດຜະລິດຕະພັນພາຍໃນເພີ່ມຂຶ້ນ 7,10%, ຊຶ່ງສາມາດສ້າງມູນຄ່າໃນລາຄາປະຈຸບັນໄດ້ 629,37 ຕື້ກີບ, ທຽບໃສ່ປີ 2014 ເພີ່ມຂຶ້ນ 1,84 ເທົ່າ,ລາຍໄດ້ສະເລ່ຍ 16,31 ລ້ານກີບ ຫຼືເທົ່າກັບ 2.038 ໂດລາຕໍ່ຄົນຕໍ່ປີ,ຊີວິດການເປັນຢູ່ຂອງປະຊາຊົນນັບມື້ດີຂຶ້ນເປັນກ້າວໆ, ລະບົບຄົມມະນາຄົມ, ໂທລະຄົມມະນາຄົມ ແລະ ການນຳໃຊ້ໄຟຟ້າກໍ່ໄດ້ເຂົ້າເຖິງພໍ່ແມ່ປະຊາຊົນຢ່າງທົ່ວເຖິງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງຍົກລະດັບຢ່າງບໍ່ຢຸດຢັ້ງ, ມີຫຼາຍບ້ານໄດ້ຫຼຸດພົ້ນອອກຈາກຄວາມທຸກຍາກ ແລະໄດ້ກາຍເປັນບ້ານພັດທະນາ, ປະຈຸບັນບ້ານທຸກຍາກຍັງເຫຼືອ 4 ບ້ານ, ອັດຕາຄອບຄົວທຸກຍາກໄດ້ຫຼຸດລົງເທື່ອລະກ້າວ.

  ກອງປະຊຸມຄັ້ງນີ້ໄດ້ຮັບຮອງເອົາບັນດາເອກະສານທີ່ເປັນຍຸດທະສາດຂອງຄະນະບໍລິຫານງານພັກເມືອງສະໄໝທີ IX, ພ້ອມກັນນັ້ນກໍໄດ້ໃຊ້ສິດປະຊາທິປະໄຕຄັດເລືອກຄະນະບໍລິຫານງານພັກເມືອງຊຸດໃໝ່ເພື່ອສືບຕໍ່ຊີ້ນໍາ-ນໍາ ພາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກເມືອງ ໃນ 5 ປີ ຕໍ່ໜ້າໃຫ້ປະກົດຜົນເປັນຈິງ.

______________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์