ເຈດີບີ ມອບເງິນ 1 ພັນລ້ານກີບ ໃຫ້ກອງທຶນຮ່ວມໃຈ

ເມື່ອວັນທີ 7 ກຸມພາຜ່ານມາທີ່ໂຮງແຮມແລນມາກ ນະຄອນຫຼວງວຽງຈັນ ທະນາຄານຮ່ວມພັດທະນາໄດ້ມອບເງີນຈໍານວນ 1 ພັນລ້ານກີບໃຫ້ກອງທຶນຮ່ວມໃຈ,ເນື່ອງໃນໂອກາດວັນສະເຫຼີມສະຫຼອງຄົບຮອບ 30 ປີວັນສ້າງຕັ້ງທະນາຄານຮ່ວມພັດທະນາ, ມອບໂດຍທ່ານ ວິໄລ ສີພະພອນ ຜູ້ອໍານວຍການໃຫຍ່ທະນາຄານຮ່ວມພັດທະ ນາ ແລະເປັນກຽດຮັບໂດຍ ທ່ານ ເອກະພັນ ພະພິທັກ ປະທານກອງທຶນຮ່ວມໃຈທັງເປັນປະທານສະພາບໍລິຫານທະນາຄານຮ່ວມພັດທະນາ.

  ເງິນທີ່ມອບໃນຄັ້ງນີ້ແມ່ນເປັນການສົມທົບທຶນໃຫ້ກອງທຶນຮ່ວມໃຈ ແລະເພື່ອເປັນການປະກອບສ່ວນຊ່ວຍເຫຼືອສັງຄົມກໍ່ຄືນໍາໄປຊ່ວຍເຫຼືອການປຸກສ້າງໂຮງຮຽນໃນເຂດຊົນນະບົດຫ່າງໄກສອກຫຼິກທີ່ມີຄວາມທຸກຍາກຂາດເຂີນອາຄານຮຽນ, ອຸປະກອນການສຶກສາ, ໄພພິບັດ, ໂລກລະບາດ ແລະເຫດການອື່ນໆ.

  ທະນາຄານຮ່ວມພັດທະນາໄດ້ຊວ່ຍເຫຼືອວຽກງານການພັດທະນາຊັບພະຍາກອນມະນຸດເປັນວຽກງານທີ່ສໍາຄັນເພື່ອເປັນການປະກອບສ່ວນດ້ານການສຶກສາໃຫ້ແກ່ລູກຫຼານຊຶ່ງເປັນອະນາຄົດຂອງຊາດຮຸ່ນສືບທອດໃຫ້ມີບ່ອນສຶກສາຮໍ່າຮຽນທີ່ດີ ແລະ ການເປັນສ່ວນປະກອບທີ່ສໍາຄັນໃນການສ້າງສາພັດທະນາປະເທດຊາດໃຫ້ມີຄວາມຮຸ່ງເຮືອງສີວິໄລ.

  ທະນາຄານຮ່ວມພັດທະນາເປັນທະນາຄານບໍລິການດ້ວຍມາດຕະຖານສາກົນ ISO 9001:2015 ບໍລິການທາງດ້ານການເງິນແບບຄົບວົງຈອນໃຫ້ແກ່ປະຊາຊົນໃນທົ່ວປະເທດໄດ້ມີຄວາມສະດວກສະບາຍໃນການເຂົ້າຫາແຫຼ່ງທຶນທີ່ໝັ້ນຄົງ ແລະການບໍລິການທີ່ມີຄວາມໝັ້ນຄົງ, ໂປ່ງໃສ,ທະນາຄານຮ່ວມພັດທະນາມີແຫຼ່ງທຶນພຽງພໍທີ່ຈະຕອບສະໜອງໃຫ້ແກ່ລູກຄ້າເພື່ອສະໜັບສະໜູນທຸລະກິດລູກຄ້າຂອງຕົນໃຫ້ມີຄວາມເຕີບໃຫ່ຍຂະຫຍາຍຕົວຂຶ້ນໄປເລື້ອຍໆ, ສົມກັບຄຳຂວັນທີ່ວ່າ “ເຕີບໃຫ່ຍໄປພ້ອມກັນ”.

_____________

ຂຽນໂດຍ: ຄໍາຕົ້ນ ວໍລະຈັກ    
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์