ປີແລ້ວພາສີດ່ານສາກົນວັງເຕົ່າເກັບລາຍຮັບໄດ້ 639 ຕື້ກວ່າກີບ

  ເປັນການຈັດຕັ້ງປະຕິບັດທີ່ມີຄວາມເຂັ້ມແຂງ ແລະມີຄຸນນະພາບສູງພໍສົມຄວນສໍາລັບການປະກອບສ່ວນສູ້ຊົນການຈັດເກັບລາຍຮັບເຂົ້າງົບປະມານລັດໃຫ້ໄປໃນທິດທາງທີ່ກ້າວໜ້າຊຶ່ງໃນ ສົກປີ 2019 ຜ່ານມາ ພາສີດ່ານສາກົນວັງເຕົ່າສາມາດເກັບລາຍຮັບໄດ້ 639 ຕື້ກວ່າກີບ ທຽບໃສປີຜ່ານແມ່ນມີທ່າອຽງເພີ່ມຂຶ້ນຢ່າງໜ້າພໍໃຈ.

  ທ່ານ ວິເລືອງ ວໍລະບຸດ ຫົວໜ້າພາສີດ່ານສາກົນວັງເຕົ່າ ເມືອງໂພນທອງ ແຂວງຈໍາປາສັກ ໄດ້ເປີດເຜີຍຕໍ່ນັກຂ່າວ ໜັງສືພິມເສດຖະກິດ-ສັງຄົມປະຈໍາ ແຂວງເມື່ອບໍ່ດົນມານີ້ໃຫ້ຮູ້ວ່າ: ຜ່ານການ ຈັດຕັ້ງປະຕິບັດການຈັດເກັບລາຍຮັບປີ 2019 ຜ່ານມາດ່ານພາສີສາກົນວັງ ເຕົ່າໄດ້ເອົາໃຈໃສ່ໃນການປະຕິບັດໜ້າທີ່ວິຊາສະເພາະຕາມສິດ ແລະໜ້າທີ່ຂອບເຂດຄວາມຮັບຜິດຊອບຂອງຕົນຢ່າງຕັ້ງໜ້າບວກກັບ ການຊີ້ນໍາ-ນໍາພາຂອງຄະນະພັກ, ຄະນະນໍາຈາກກົມພາສີ ແລະຄະນະນໍາຂອງກອງຄຸ້ມຄອງພາສີ VII ໄດ້ລົງໃກ້ ຊິດຕິດແທດ, ຕິດຕາມກວດກາ ແລະຊີ້ນໍາໃນການຈັດຕັ້ງປະຕິບັດວຽກງານ ວິຊາສະເພາະຢ່າງເປັນປົກຄະຕິ ແລະ ຕໍ່ເນື່ອງ, ມີຄວາມຕື່ນຕົວສູງ ແລະມີ ຄວາມຫ້າວຫັນບຸກບືນ ແລະເປັນເຈົ້າ ການໃນການປະຕິບັດໜ້າທີ່ຢ່າງມີ ຄວາມຮັບຜິດຊອບສູງ, ນອກຈາກນີ້ຍັງ ໄດ້ປັບປຸງກົນໄກການຄຸ້ມຄອງ ປົວແປງ ແບບແຜນວິທີນໍາພາ ແລະວິທີເຮັດວຽກ, ໂດຍມີການແບ່ງງານ, ແບ່ງຂັ້ນການຄຸ້ມ ຄອງໃນຄະນະດ່ານໃຫ້ມີຄວາມຮັບຜິດ ຊອບຕາມແຕ່ລະໜ່ວຍງານຕາມພາລະບົດບາດຢ່າງຂາດໂຕປະກອບກັບຄວາມຕື່ນຕົວສະໝັກໃຈ ແລະເປັນເຈົ້າການຂອງຜູ້ປະກອບການໃນການມີສ່ວນຮ່ວມໃນການປະກອບສ່ວນມອບພັນທະເຂົ້າງົບປະມານຢ່າງຈິງໃຈ.

  ສໍາລັບໃນສົກປີ 2019 ດ່ານພາສິສາກົນວັງເຕົ່າ ເມືອງໂພນທອງ ແຂວງຈໍາປາສັກ ໄດ້ຮັບໂຕເລກແຜນການຕາມການມອບໝາຍຈໍານວນ 659 ຕື້ 700 ລ້ານກີບ, ຜ່ານການຈັດຕັ້ງປະຕິບັດຕົວຈີງໃນໜຶ່ງປີຜ່ານມາພວກເຮົາສາມາດປະຕິບັດໄດ້ຈໍານວນ 639 ຕື້ 557 ລ້ານກີບ, ເທົ່າກັບກວ່າ 97%%, ບໍ່ໄດ້ຕາມແຜນການທີ່ວາງໄວ້, ແຕ່ຖ້າທຽບໃສ່ໃນໄລຍະດຽວກັນຂອງປີຜ່ານມາແມ່ນເຫັນວ່າມີການເພີ່ມຂຶ້ນ, ຊຶ່ງລາຍຮັບຕົ້ນຕໍແມ່ນໄດ້ມາຈາກສິນຄ້າປະເພດນໍ້າມັນເຊື້ອໄຟກວມເອົາຈໍານວນກວ່າ 65% ຂອງສິນຄ້ານໍາເຂົ້າທັງໝົດ, ຮອງລົງມາແມ່ນສິນຄ້າປະເພດຍານພາຫະນະ ແລະສິນຄ້າອື່ນໆ.

  ທ່ານ ວິເລືອງ ວໍລະບຸດ ໃຫ້ຮູ້ຕື່ມວ່າ: ສາເຫດທີ່ພາໃຫ້ການຈັດເກັບລາຍຮັບບໍ່ໄດ້ຕາມແຜນການຍ້ອນສະພາບລວມຂອງເສດຖະກິດໂລກມີການຜັນຜວນສົ່ງຜົນກະທົບຕໍ່ປະເທດເຮົາໂດຍກົງເຮັດໃຫ້ເງິນແຂງຄ່າສູງຂຶ້ນ, ຍ້ອນເກີດບັນຫາອຸທົກກະໄພອັນຮ້າຍແຮງໃນບັນດາແຂວງພາກໃຕ້ລາວ, ໂດຍສະເພາະແຂວງຈໍາປາສັກໄດ້ເຮັດໃຫ້ບັນ ດາໂຄງການຕ່າງໆ ຢຸດສະງັກເປັນບາງຊ້ວງສົ່ງຜົນກະທົບຕໍ່ການຈະລາຈອນສິນຄ້ານໍາເຂົ້າ ແລະສົ່ງອອກ.

_______________

ຂຽນໂດຍ: ໂພທິຣາຊ      
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์