BIC-BCEL ໂອນເງິນຂ້າມທະນາຄານປອດໄພ ແລະຮັບທັນທີ

 ພິທີເປີດຕົວການໃຫ້ບໍລິການໂອນເງິນຂ້າມທະນາຄານຜ່ານ Mobile Ap plication ລະຫວ່າງທະນາຄານບີໄອຊີຈຳກັດ (BIC) ແລະທະນາຄານການຄ້າຕ່າງປະ ເທດລາວມະຫາຊົນ (BCEL) ໄດ້ຈັດຂຶ້ນໃນວັນທີ 14 ກຸມພາ 2020 ທີ່ນະຄອນຫຼວງວຽງຈັນໂດຍການໃຫ້ກຽດເຂົ້າຮ່ວມຂອງ ທ່ານ ສອນໄຊສິດ ພະໄຊ ຜູ້ວ່າການທະນາຄານແຫ່ງ ສປປ ລາວ (ທຫລ) ແລະມີທ່ານ ລິມ ໄວຮຸ່ງ ຜູ້ອຳນວຍການ BIC, ທ່ານ ນັນທະລາດ ແກ້ວປະເສີດ ຮອງອຳນວຍການ BCEL, ມີຜູ້ບໍລິຫານລະ ດັບສູງຂອງ 2 ທະນາຄານ ແລະພາກສ່ວນກ່ຽວຂ້ອງເຂົ້າຮ່ວມ.

  ການຮ່ວມມືຄັ້ງນີ້ເຮັດໃຫ້ການບໍລິການໂອນເງິນລະຫວ່າງ 2 ທະນາຄານງ່າຍຂຶ້ນຊຶ່ງສຳເລັດແບບ Real Time ໂດຍບໍ່ຕ້ອງເຂົ້າມາທະນາຄານ, ໝາຍຄວາມວ່າ: ລູກຄ້າຂອງ BCEL ສາມາດນຳໃຊ້ແອັບ BCEL One ເພື່ອໂອນເງິນຫາບັນຊີຂອງ BIC ໄດ້ເລີຍ ແລະໃນຂະນະດຽວກັນລູກຄ້າຂອງ BIC ສາມາດນຳໃຊ້ແອັບ BIC Best ເພື່ອ ໂອນເງິນຫາ BCEL ໄດ້ແບບ Real Time ຕະຫຼອດ 24 ຊົ່ວໂມງ (24/7) ເໝືອນກັບການໂອນເງິນຫາບັນຊີພາຍໃນເຄືອຂ່າຍຂອງຕົນເອງສາມາດໂອນເງິນໄດ້ທັງເງິນກີບ, ບາດ ແລະໂດລາ (ສະຫະລັດ).

 ການໂອນເງິນຂ້າມທະນາຄານແບບໃໝ່ຈະປະຢັດເວລາ,ສະດວກ, ວ່ອງໄວທັງມີຄວາມຊັດເຈນກ່ວາເກົ່າ, ຫຼຸດຜ່ອນຂັ້ນຕອນໃນການໂອນເງິນຂ້າມທະນາຄານແບບໂດຍບໍ່ຕ້ອງເຂົ້າມາທະນາຄານ,ສິ່ງສຳຄັນສາມາດເຮັດໄດ້ທຸກທີ່ພຽງແຕ່ມີແອັບ BCEL One ຂອງ BCELແລະຜ່ານແອັບ BIC Best ຂອງ BIC ແລະການຮ່ວມມືຄັ້ງນີ້ເປັນຄວາມມຸ່ງໝັ້ນຂອງ BCEL ໃນການພັດທະນາຮູບແບບໃໝ່ຂອງການໃຫ້ບໍລິການໂອນເງິນຂ້າມທະນາຄານກັບທະນາຄານພາຍໃນປະເທດເພື່ອຕອບສະໜອງຄວາມຕ້ອງການ ແລະມອບປະສົບການທີ່ດີທາງການເງິນໃຫ້ກັບລູກຄ້າ; ພ້ອມນັ້ນ, ຍັງຊ່ວຍຂະຫຍາຍຊ່ອງທາງການເຂົ້າເຖິງການບໍລິການ ແລະ ອຳນວຍຄວາມສະ ດວກໃຫ້ແກ່ລູກຄ້າຂອງທັງ 2 ທະນາຄານໃນຕໍ່ໜ້ານີ້, 2 ທະນາຄານ ຈະສືບຕໍ່ຮ່ວມພັດທະນາໃຫ້ສາມາດໂອນເງິນຂ້າມທະນາຄານລະຫວ່າງ BCEL ແລະ BIC ຜ່ານ BCELi-Bank ເພື່ອຕອບສະໜອງຄວາມຕ້ອງການຂອງລູກຄ້າ ແລະເຮັດໃຫ້ການໂອນເງິນຂ້າມທະນາຄານເປັນເລື່ອງງ່າຍໆ.

ທ່ານ ສຸລິສັກ ທຳນຸວົງ ຫົວໜ້າກົມຄຸ້ມຄອງລະບົບຊໍາລະສະສາງ ທຫລ ກ່າວວ່າ: ເປັນ 2 ທະນາຄານທີ່ສໍາເລັດໃນການພັດທະນາລະບົບໂອນເງິນຂ້າມທະນາຄານຜ່ານມືຖື (Mobile App) ຊຶ່ງປະຈຸບັນ ທຫລ ເປັນຜູ້ຄວບຄຸມລະບົບການຊຳລະທີ່ສຳຄັນແລະບໍລິສັດ LAP Net ເປັນຜູ້ຄວບຄຸມລະບົບການຊຳລະທຸລະກຳຍ່ອຍເປັນ 2 ພື້ນຖານໂຄງລ່າງດ້ານການຊຳລະທີ່ຈຳເປັນບັນດາຜູ້ໃຫ້ບໍລິການຊຳລະທີ່ເລີ່ມມີຄວາມຫຼາກຫຼາຍທັງເປັນທະນາຄານທຸລະກິດ-ສະຖາບັນການເງິນ ແລະ ນິຕິບຸກຄົນ; ທຫລ ໄດ້ອະນຸຍາດໃຫ້ດຳເນີນການບົນເງື່ອນໄຂທີ່ເມື່ອໃດທີ່ບໍລິສັດ LAPNet ເປັນຜູ້ຄວບຄຸມລະບົບການຊຳລະທຸລະກຳຍ່ອຍມີຄວາມພ້ອມແລ້ວ, 2 ທະນາຄານນີ້ຕ້ອງເຂົ້າຮ່ວມລະບົບສ່ວນກາງເພື່ອຮ່ວມກັນພັດທະນາພື້ນຖານໂຄງລ່າງນີ້ໃຫ້ມີຄວາມເຂັ້ມແຂງຮອບດ້ານເພື່ອເຊື່ອມໃຊ້ຮ່ວມກັນໄດ້ພາຍໃນປະເທດ, ພາກພື້ນ ແລະສາກົນ.

  ທ່ານ ສອນໄຊ ສິດພະໄຊ ຜູ້ວ່າການ ທຫລ ໄດ້ເນັ້ນວ່າ: ໃນຜ່ານມາມີຫຼາຍປະເທດໄດ້ເຮັດກ່ອນແລ້ວແຕ່ກໍ່ເປັນເລື່ອງດີທີ່ພວກເຮົາໄດ້ມີການລິເລີ່ມເປັນຄັ້ງປະຫວັດ ສາດໃນວົງການໆເງິນຕາຂອງປະເທດເຮົາທີ່ສາມາດດຳເນີນງານໄດ້, ຄວນມີສະຕິ, ມີການປ້ອງກັນຄວາມສ່ຽງ, ເຖິງວ່າ BCELຈະມີຕົ້ນທຶນຫຼາຍກວ່າ BIC10 ກວ່າເທົ່າຕົວແຕ່ກໍ່ສາມາດຮ່ວມມືກັນໄດ້ຍ້ອນວິໃສທັດ, ຜູ້ບໍລິຫານມີຄວາມຮູ້ຄວາມສາມາດເພື່ອຕອບສະໜອງຄວາມຕ້ອງການຂອງສັງຄົມກໍ່ຄືລູກຄ້າ ແລະ ເປັນຄວາມພາກ ພູມໃຈຂອງພວກເຮົາທີ່ທັງ 2 ທະນາຄານ ທີ່ໄດ້ມີການໂອນເງິນຂ້າມທະນາຄານ ແລະຕ້ອງໄດ້ທຸ້ມເທໃຫ້ຫຼາຍທີ່ສຸດ,ມີການຖອດຖອນ-ປັບປຸງຕົນເອງ, ມີຄວາມເສຍສະ ຫຼະສູງຕໍ່ໂຄງການ, ຕ້ອງຄວບຄຸມຄວາມສ່ຽງໃຫ້ດີ,ປ້ອງກັນບໍ່ໃຫ້ເກີດມີຄວາມຜິດພາດ ແລະຫຼີກລ່ຽງການນຳເງິນທີ່ບໍ່ຖືກຕ້ອງເຂົ້າໃນການໂອນ ແລະກໍຕ້ອງໂອນໃນມູນຄ່າທີ່ເໝາະ; ບໍ່ໃຫ້ຄົນບໍ່ດີສວຍໃຊ້ ແລະຂໍຝາກທະນາຄານ-ສະຖາບັນການເງິນ…ຕ້ອງ ໃຫ້ສັງຄົມເຊື່ອໝັ້ນ ແລະມີຄວາມເຊື່ອຖືສູງ.

_______________

ຂຽນໂດຍ: ຣັດສະໝີ ດວງສັດຈະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์