ເຈດີບີ ມອບ 50 ລາ້ນກີບ ຊ່ວຍເມືອງອູຮັ້ນຕ້ານພະຍາດອັກເສບປອດໂຄໂລນາ

 ໃນວັນທີ 7 ກຸມພາ 2020 ທີ່ໂຮງແຮມແລນມາກ ນະຄອນຫຼວງວຽງຈັນ ທະນາຄານຮ່ວມພັດທະນາໄດ້ມອບເງິນຈໍານວນ 50 ລ້ານກີບ ເພື່ອເປັນການປະກອບສ່ວນຊ່ວຍເຫຼືອຊາວເມືອງອູຮັ້ນຕໍ່ຕ້ານພະຍາດອັກເສບປອດສາຍພັນໃໝ່ໂຄໂລນາຊຶ່ງການຄັ້ງນີ້ແມ່ນເນື່ອງໃນໂອກາດສະເຫຼີມສະຫຼອງຄົບຮອບ 30 ປີ ວັນສ້າງຕັ້ງທະນາຄານຮ່ວມພັດທະນາ, ມອບໂດຍທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາ ແລະເປັນກຽດຕາງໜ້າຮັບໂດຍ ທ່ານ ສົມດີ ດວງດີ ຮອງນາ ຍົກລັດຖະມົນຕີ, ລັດຖະມົນຕີກະຊວງການເງິນ.

  ເງິນທີ່ມອບຈະໄດ້ສົ່ງໄປປະກອບສ່ວນຊ່ວຍເຫຼືອປະຊາຊົນທີ່ເມືອງອູຮັ້ນ ສປ ຈີນ ທີ່ມີການລະບາດຂອງພະຍາດອັກເສບປອດສາຍພັນໃໝ່ໂຄໂລນາ, ກອງທຶນຮ່ວມໃຈຂອງທະນາຄານຮ່ວມພັດທະນາໄດ້ສ້າງຕັ້ງຂື້ນໂດຍທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາເພື່ອຊ່ວຍເຫຼືອສັງຄົມກໍຄືນໍາໄປຊ່ວຍ ເຫຼືອການປຸກສ້າງໂຮງຮຽນໃນເຂດຊົນນະບົດຫ່າງໄກສອກຫຼີກທີ່ມີຄວາມທຸກຍາກຂາດເຂີນອາຄານຮຽນ, ອຸປະກອນການສຶກສາ, ໄພພິບັດ, ໂລກລະບາດ ແລະ ເຫດການອື່ນໆ.

  ທະນາຄານຮ່ວມພັດທະນາໄດ້ຊ່ວຍເຫຼືອວຽກງານການພັດທະນາຊັບພະຍາກອນມະນຸດ ແລະການຊ່ວຍເຫຼືອດ້ານມະນຸດສະທໍາເປັນວຽກງານທີ່ສໍາຄັນເພື່ອເປັນການປະກອບສ່ວນທີ່ສໍາຄັນໃນການສ້າງສາພັດທະນາປະເທດຊາດໃຫ້ມີຄວາມຮຸ່ງເຮືອງສີວິໄລ.

  ທະນາຄານຮ່ວມພັດທະນາເປັນທະນາຄານບໍລິການດ້ວຍມາດຕະຖານສາກົນ ISO 9001:2015 ບໍລິການທາງ ດ້ານການເງິນແບບຄົບວົງຈອນໃຫ້ແກ່ປະຊາຊົນໃນທົ່ວປະເທດໄດ້ມີຄວາມສະດວກສະບາຍໃນການເຂົ້າຫາແຫຼ່ງທຶນທີ່ໝັ້ນຄົງ ແລະ ການບໍລິການທີ່ມີຄວາມໝັ້ນຄົງ, ໂປ່ງໃສ, ທະນາຄານຮ່ວມພັດທະນາມີແຫຼ່ງທຶນພຽງພໍທີ່ຈະຕອບສະໜອງໃຫ້ແກ່ລູກຄ້າເພື່ອສະໜັບສະໜູນທຸລະກິດລູກຄ້າຂອງຕົນໃຫ້ມີຄວາມເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ, ສົມກັບຄຳຂວັນທີ່ວ່າ “ເຕີບ ໃຫຍ່ໄປພ້ອມກັນ.”

_________________

ຂຽນໂດຍ: ຄໍາຕົ້ນ ວໍລະຈັກ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์