ມອບລາງວັນນັກທຸລະກິດຊັ້ນນໍາດີເດັ່ນ 2019

 ໃນວັນທີ 14 ກຸມພາຜ່ານມາທີ່ຫໍປະຊຸມແຫ່ງຊາດໄດ້ມີງານມອບລາງວັນນັທຸລະກິດຊັ້ນນຳດີເດັ່ນ 2019 ໂດຍເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະ ມົນຕີ, ລັດຖະມົນຕີກະຊວງການເງິນ, ທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກຳແຫ່ງຊາດລາວ, ມີບັນດາລັດຖະມົນຕີ, ຮອງລັດຖະມົນຕີ, ນັກທຸລະກິດທົ່ວປະເທດ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະອຸດສາຫະກຳແຫ່ງຊາດກ່າວວ່າ: ສະພາການຄ້າ ແລະອຸດສາຫະກຳແຫ່ງຊາດ (ສຄອຊ) ຮ່ວມກັບໜັງສືພິມວຽງຈັນທາມໄດ້ຈັດການມອບລາງວັນໃຫ້ນັກທຸລະກິດຊັ້ນນຳດີເດັ່ນໂດຍການຍ້ອງຍໍໃນຄັ້ງນີ້ໄດ້ຮັບການສະໜັບໜູນຈາກທຸລະກິດ 64 ບໍລິສັດໃນນີ້ຂຶ້ນຮັບ ໂລລາງວັນ 55 ບໍລິສັດ ຊຶ່ງຊັ້ນນຳດີເດັ່ນໃນນີ້ລວມທັງບໍລິສັດຕ່າງປະເທດທີ່ມີຜົນສຳເລັດໃນລາວໃຫ້ການສະໜັບສະໜູນ ສຄອຊ ພວກເຮົາເຊັ່ນຂົງເຂດບໍ່ແຮ່, ທະນາຄານ, ບໍລິສັດກໍ່ສ້າງ ແລະອື່ນໆ, ຜູ້ທີ່ໄດ້ຮັບລາງວັນລວມທັງຜູ້ທີ່ຕອບສະໜອງນະໂຍບາຍຂອງພັກໃນການຊ່ວຍ ເຫຼືອເຂດຫ່າງໄກສອກຫຼີກ,ສ້າງໂຮງຮຽນໃຫ້ຫຼາຍແຂວງດ້ວຍທຶນຂອງຕົນເອງ ແລະເພື່ອນຝູງ.

 ໂອກາດນີ້ບັນດານັກທຸລະກິດໄດ້ປະກອບຄຳຄິດຄຳເຫັນ ແລະສະເໜີຫຼາຍບັນຫາໃຫ້ລັດຊ່ວຍເບິ່ງ ແລະແກ້ໄຂໃນຕໍ່ໜ້າ, ພ້ອມນີ້ທ່ານ ສົມດີ ດວງດີ ຮອງນາຍົກລັດຖະ ມົນຕີກໍ່ໄດ້ໂອ້ລົມກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ ສຄອຊ ແລະບັນດານັກທຸລະກິດທີ່ສາມາດຍາດໄດ້ຜົນງານດີເດັ່ນຕະຫຼອດໄລຍະຜ່ານມາທັງນີ້ຍັງໄດ້ຊີ້ນຳຫຼາຍບັນຫາຕໍ່ ສຄອຊ ແລະນັກທຸລະກິດເພື່ອເປັນທິດທາງໃນການດຳເນີນທຸລະກິດ ແລະປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດ.

_______________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 17/02/2020