ສູນການສຶກສານອກໂຮງຮຽນເມືອງຮ້ຽມ ສະຫຼຸບພາກຮຽນທີ I

  ເມື່ອບໍ່ດົນມານີ້ທີ່ສູນການສຶກສານອກໂຮງຮຽນເມືອງຮ້ຽມໄດ້ຈັດພິທີສະຫຼຸບພາກຮຽນທີ I ແລະເປີດພາກຮຽນ II ຂອງສົກຮຽນ 2019-2020 ຢ່າງເປັນທາງການໃຫ້ກຽດເປັນປະທານ ຂອງທ່ານ ນາງ ຊ່ຽນ ສີດາວົງສ໌ ຫົວໜ້າຫ້ອງການສຶກສາທິການ ແລະກີລາເມືອງຮ້ຽມ, ມີທ່ານ ວັນທຽນ ພັນດີທຳອໍານວຍການ ສນມ ຮ້ຽມ, ທ່ານ ໄມລຽນ ບົວລາສີ ຫົວໜ້າໜ່ວຍງານ ກສນ ເມືອງ ພ້ອມດ້ວຍຄູ-ອາຈານ ແລະນັກ ຮຽນພາຍໃນສູນເຂົ້າຮ່ວມ.

  ທ່ານ ວັນທຽນ ພັນດີທຳໄດ້ຂຶ້ນຜ່ານບົດສະຫຼຸບ ແລະລາຍງານຜົນສຳເລັດທີ່ຈັດຕັ້ງປະຕິບັດໄດ້ໃນ ໄລຍະພາກຮຽນທີ I ພ້ອມທັງຜ່ານທິດທາງແຜນການໃນພາກຮຽນ ທີ II ໂດຍມີຫຼາຍໜ້າວຽກທີ່ພົ້ນເດັ່ນສະແດງອອກວຽກງານວິຊາການຈາກຜົນການສອບເສັງມີນັກຮຽນດີ 17 ຄົນ,ຍິງ 1 ຄົນຈາກນັກຮຽນທັງໝົດ 27 ຄົນເທົ່າກັບ 62,96%, ມີນັກຮຽນເກັ່ງ 10 ຄົນຈາກນັກຮຽນທັງໝົດ 27 ຄົນເທົ່າກັບ 37,03%, ນັກຮຽນກາງ ແລະອ່ອນບໍ່ມີ, ຜົນການສອບເສັງໄດ້ 100% ສາມາດບັນລຸລື່ນຄາດ ໝາຍ 5%, ມີນັກຮຽນເກັ່ງໄດ້ຄະແນນ 7 ຂຶ້ນໄປທຸກໆວິຊາໃນແຕ່ລະເດືຶອນຈໍານວນ 2 ຄົນ (ເດັ່ນຮໍ່າຮຽນ) ແຕ່ກໍຍັງພົບຄວາມຫຍຸ້ງຍາກຫຼາຍບັນຫາທີ່ຍັງທ້າທາຍເນື່ອງຈາກເປັນສູນທີ່ຫາກໍເປີດປີ ທຳອິດຂອງເມືອງເປັນຕົ້ນແມ່ນບັນຫາດ້ານບຸກຄະລາກອນປະສົບການໃນການບໍລິຫານບໍ່ທັນຫຼາຍ, ດ້ານງົບປະມານ ແລະອຸປະກອນຮັບໃຊ້ພາຍໃນສູນບໍ່ທັນພຽງພໍ.

  ໃນໂອກາດດັ່ງກ່າວທ່ານ ນາງ ຊ່ຽນ ສີດາວົງສ໌ ໄດ້ມີຄວາມຄິດເຫັນໂອ້ລົມກ່າວຍ້ອງຍໍຊົມເຊີຍຜົນສໍາເລັດທີ່ຍາດມາໄດ້ພ້ອມທັງເນັ້ນໜັກບາງບັນຫາ   ໂດຍໄດ້ຍົກໃຫ້ເຫັນພາລະບົດບາດ ແລະຄວາມສຳຄັນຂອງວຽກງານການສຶກສາທັງພາຍໃນທຽບໃສ່ພາກພື້ນຊຶ່ງທຸກພາກສ່ວນຕ້ອງໃຫ້ຄວາມສຳຄັນກ່ອນໝູ່, ດ້ານການເມືອງແນວຄິດໃຫ້ທຸກຄົນມີແນວຄິດໜັກແໜ້ນເຂັ້ມແຂງ,ຕີຖອຍທຸກປະກົດການຫຍໍ້ທໍ້ທີ່ຈະເກີດຂຶ້ນ,ເພີ່ມທະວີຄວາມສາມັກຄີທັງພາຍໃນ ແລະຊຸມຊົນໃຫ້ກວ້າງຂວາງ ແລະກາຍເປັນທີ່ຍອມຮັບໃນທົ່ວສັງຄົມ,ເພີ່ມທະວີຄວາມຮັບຜິດຊອບໃນໜ້າທີ່ວຽກງານຂອງທຸກຄົນໃຫ້ສູງຂຶ້ນ,ຫ້າວຫັນ,ປະຕິບັດໂມງເວລາໃຫ້ເຂັ້ມງວດພ້ອມທັງສ້າງແຜນການ,ແຜນງານ,ແຜນວຽກແຕ່ລະອາທິດໃຫ້ລະອຽດຈະແຈ້ງ,ດຸໝັ່ນຊອກຮູ້ແລະພັດທະນາຕົນເອງຕະຫຼອດເວລາພ້ອມທັງຮູ້ຜັນຂະຫຍາຍ ແນວທາງ, ນິຕິກຳຂອງຂັ້ນເທິງໃຫ້ເກີດດອກອອກຜົນ,ໃຫ້ຖອດຖອນບົດຮຽນ ແລະຊອກສະແຫວງຫາແຫຼ່ງທຶນເພື່ອມາເຝິກອົບຮົມໃຫ້ພໍ່ແມ່ປະຊາຊົນໃນໄລຍະພັກແລ້ງຕາມສາຂາວິຊາທີ່ແທດເໝາະເປັນຕົ້ນແມ່ນປູກຝັງ,ລ້ຽງສັດ ແລະ ປຸງແຕ່ງເປັນຕົ້ນ.

แชร์