ຝຶກອົບຮົມວິຊາຊີບທະນາຍຄວາມຊຸດທີ 15 ທີ່ສະຫວັນນະເຂດ

   ສະພາທະນາຍຄວາມລາວໄດ້ຈັດຊຸດຝຶກອົບຮົມວິຊາຊີບທະນາຍຄວາມຊຸດທີ 15 ຂຶ້ນໃນລະຫວ່າງວັນທີ 10-28 ກຸມພາ 2020 ທີ່ສະຖາບັນຍຸຕິທຳພາກກາງ ແຂວງສະຫວັນນະເຂດພາຍໃຕ້ການສະໜັບສະໜູນໂດຍໂຄງການສະໜັບສະໜູນທາງດ້ານຍຸດທະສາດເພື່ອສ້າງຄວາມເຂັ້ມແຂງໃຫ້ແກ່ການປົກຄອງລັດດ້ວຍກົດໝາຍຢູ່ ສປປ ລາວ (3S-ROL) ເປັນກຽດເຂົ້າຮ່ວມໃນພິທີຂອງ ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ທ່ານ ບຸນສະຫວາດ ບຸບຜາ ຮອງລັດຖະມົນຕີກະຊວງຍຸຕິທຳ, ມີປະທານສະພາທະນາຍຄວາມລາວ, ແຂກຖືກເຊີນ, ພາກສ່ວນກ່ຽວຂ້ອງຂັ້ນຕ່າງໆ ແລະສຳມະນາກອນທີ່ມາຈາກ 5 ແຂວງ ແລະນະຄອນຫຼວງວຽງຈັນເຂົ້າຮ່ວມ.

    ທ່ານ ຄຳໃສ ສຸລິນທອນ ປະທານສະພາທະນາຍຄວາມລາວ ໄດ້ກ່າວວ່າ: ການອົບຮົມສ້າງທະນາຍໃໝ່ເປັນໜຶ່ງພາລະໜ້າທີ່ຍຸດທະສາດຂອງການຈັດຕັ້ງສະພາທະນາຍຄວາມລາວ ເພື່ອຂະຫຍາຍຈຳນວນສະມາຊິກໃຫ້ແກ່ ອົງການຈັດຕັ້ງທະນາຍຄວາມລາວໃຫ້ນັບມື້ນັບຫຼາຍຂຶ້ນ,ເປັນການຜັນຂະຫຍາຍແຜນການຍຸດທະສາດຍາວນານ ຂອງສະພາທະນາຍຄວາມລາວ ນີ້ເປັນພາລະກິດຫັນເອົາທະນາຍຄວາມໃຫ້ກະຈາຍລົງທ້ອງຖິ່ນຮາກຖານຕາມທິດສາມສ້າງຂອງພັກ ແລະລັດຖະບານລາວເຮົາ ເພື່ອຈະໄດ້ເປັນກຳລັງແຮງອັນໜຶ່ງຮ່ວມກັບອົງການຈັດຕັ້ງ ປະຕິບັດ ແລະປົກປ້ອງກົດໝາຍອື່ນໆຂອງລັດແຫ່ງ ສປປ ລາວ ສ້າງເງື່ອນໄຂໃຫ້ປະຊາຊົນເຂົ້າເຖິງຂະບວນການຍຸຕິທຳໃຫ້ກວ້າງຂວາງທົ່ວເຖິງໃນທົ່ວປະເທດ ແລະງ່າຍຂຶ້ນກວ່າເກົ່າ. ການຝຶກອົບຮົມຄັ້ງນີ້ ເປັນການຝຶກທີ່ໃຫຍ່ກວ່າທຸກຄັ້ງ ເພາະມີອາສາສະໝັກເຂົ້າຝຶກເປັນຈຳນວນຫຼາຍທີ່ມາຈາກ 5 ແຂວງຄື: ຫຼວງພະບາງ, ນະຄອນຫຼວງວຽງຈັນ, ຄຳມ່ວນ, ສະຫວັນນະເຂດ, ຈຳປາສັກ ແລະສາລະວັນ. ການສ້າງວິຊາຊີບທະນາຍຄວາມມັນໄດ້ກາຍເປັນພັນທະຂອງລັດ ແລະທົ່ວສັງຄົມຖ້າຂາດທະນາຍຄວາມ ຫຼື ມີທະນາຍຄວາມໜ້ອຍເກີນໄປ ຍຸດທະສາດການສ້າງລັດທີ່ປົກຄອງດ້ວຍກົດໝາຍກໍ່ຈະບໍ່ສົມບູນແບບມັນຈິ່ງຮຽກຮ້ອງໃຫ້ພວກເຮົາຕ້ອງໄດ້ເອົາໃຈໃສ່ທັງຂະຫຍາຍຈຳນວນ ແລະສຶກສາອົບຮົມໃຫ້ທະນາຍຄວາມມີຄວາມເຄົາລົບຈັນຍາບັນຂອງຕົນໃຫ້ເຂັ້ມງວດ ໃຫ້ກາຍເປັນທະນາຍຄວາມປະຕິວັດຂອງປະຊາຊົນ.

  ປະຈຸບັນ ພວກເຮົາໄດ້ສຳເລັດການປະກາດການຈັດຕັ້ງຫ້ອງການສະພາທະນາຍຄວາມຂັ້ນແຂວງແລ້ວ 10 ແຂວງ ແລະນະຄອນຫຼວງວຽງຈັນ ຊຶ່ງຍັງອີກ 8 ແຂວງ ທີ່ຍັງບໍ່ມີຄື: ຜົ້້ງສາລີ, ຫຼວງນ້ຳທາ, ຫົວພັນ, ໄຊສົມບູນ, ບໍ່ແກ້ວ, ບໍລິຄຳໄຊ, ເຊກອງ ແລະອັດຕະປື, ມີສະມາຊິກສະພາທະນະນາຍຄວາມທັງໝົດໃນທົ່ວປະເທດຈຳນວນ 250 ຄົນ.

แชร์