ສໍາເລັດກອງປະຊຸມໃຫຍ່ຜູ້ແທນອົງຄະນະພັກເມືອງທົ່ງມີໄຊ

 ກອງປະຊຸມໃຫຍ່ ຄັ້ງທີ IV ຂອງອົງຄະນະພັກເມືອງທົ່ງມີໄຊ, ແຂວງໄຊຍະບູລີ ໄດ້ດຳເນີນໃນວັນທີ 10-11 ກຸມພາ 2020 ທີ່ຫ້ອງປະຊຸມໃຫຍ່ຂອງເມືອງດັ່ງກ່າວ, ໂດຍການເປັນປະທານຂອງສະຫາຍ ສົມພອນ ໄຊດວງຕາ ກໍາມະການພັກແຂວງ, ເລຂາພັກເມືອງ, ເຈົ້າ ເມືອງທົ່ງມີໄຊ, ເປັນກຽດເຂົ້າຮ່ວມມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າ ແຂວງໄຊຍະບູລີ, ມີຄະນະປະຈຳພັກແຂວງ, ປະທານສະພາປະຊາຊົນແຂວງ, ກໍາມະການພັກ ແຂວງ, ຄະນະປະຈຳພັກເມືອງ, ກຳມະການພັກ ເມືອງ, ມີເລຂາຄະນະພັກຮາກຖານ, ເລຂາໜ່ວຍ ພັກ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງ ອ້ອມຂ້າງເຂົ້າຮ່ວມ 100 ກວ່າສະຫາຍ.

  ກອງປະຊຸມຜູ້ແທນທີ່ເຂົ້າຮ່ວມແມ່ນໄດ້ພ້ອມກັນຄົ້ນຄວ້າຕີລາຄາຄືນການຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກກໍ່ຄືການຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຍ່ຂອງອົງຄະນະພັກເມືອງຄັ້ງທີ III, ເສີມຂະຫຍາຍດ້ານຕັ້ງໜ້າ, ຊອກຫາວິທີແກ້ໄຂຂໍ້ຂາດຕົກບົກຜ່ອງ ແລະ ບົດຮຽນທີ່ຖອດຖອນໄດ້ເພື່ອພ້ອມກັນປັບປຸງ ແກ້ໄຂ ແລະກຳນົດທິດທາງ 5 ປີຕໍ່ໜ້າ, ແນໃສ່ພັດທະນາເມືອງທົ່ງມີໄຊ ໃຫ້ໄປຕາມ 4 ເນື້ອ ໃນ 4 ຄາດໝາຍ, ໂດຍສຸມໃສ່ວຽກງານປ້ອງ ກັນຊາດ-ປ້ອງກັນຄວາມສະຫງົບ, ວຽກງານ ເສດຖະກິດ, ວຽກງານວັດທະນະທໍາ-ສັງຄົມ ແລະການບໍລິການ-ທ່ອງທ່ຽວ, ສູ້ຊົນເຮັດໃຫ້ ເສດຖະກິດຂະຫຍາຍຕົວຕໍ່ເນື່ອງໃນລະດັບບໍ່ ຫຼຸດ 8,5% ຕໍ່ປີ, ຮອດປີ 2024 ລວມຍອດມູນ ຄ່າຜົນຜະລິດພາຍໃນໃຫ້ໄດ້ 255 ຕື້ກີບ, ສະເລ່ຍໃສ່ຫົວຄົນໜຶ່ງໃຫ້ໄດ້ 25 ລ້ານກີບ ຫຼື ເທົ່າກັບ 3.125 ໂດລາສະຫະລັດ, ພ້ອມນີ້ກອງປະຊຸມຍັງໄດ້ເປັນເອກະສັນກັນຮັບຮອງເອົາຮ່າງລາຍງານການເມືອງ, ແຜນພັດທະນາເສດຖະ ກິດ-ສັງຄົມ ແລະບົດສຳຫຼວດການນຳພາລວມຂອງຄະນະພັກຊຸດເກົ່າ ແລະໄດ້ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກ ເມືອງຊຸດໃໝ່, ຊຶ່ງມີຜູ້ຮັບສະໝັກທັງໝົດ 25 ສະຫາຍ, ຍິງ 4 ສະຫາຍ, ເລືອກເອົາ 21, ກອງປະຊຸມຄັ້ງປະຖົມມະລຶກໄດ້ຕົກລົງເລືອກເອົາ ສະຫາຍ ສົມພອນ ໄຊດວງຕາ ເປັນເລຂາຄະນະບໍລິຫານງານພັກເມືອງ, ສະຫາຍ ອາລຸນສັກ ລິນທະວົງ ເປັນຮອງເລຂາ, ສະຫາຍ ນາງ ບົວສອນ ອິນທະວົງ ເປັນຮອງເລຂາທັງເປັນປະທານຄະນະກວດກາພັກເມືອງ,ເລືອກເອົ ສະຫາຍ ທອງຫຼຽນ ອິນທະວົງ ແລະ ສະຫາຍ ແກ່ນ ອິນກອນ ເປັນຮອງປະທານ.

  ກອງປະຊຸມໄດ້ຮັບຟັງການໂອ້ລົມຂອງສະຫາຍເລຂາພັກແຂວງ, ຊຶ່ງສະຫາຍໄດ້ເນັ້ນໜັກໃຫ້ຄະນະບໍລິຫານງານພັກເມືອງຊຸດໃໝ່ຕ້ອງໄດ້ຄົ້ນຄວ້າ, ເຊື່ອມຊຶມກໍາແໜ້ນ ແລະຮູ້ຜັນຂະຫຍາຍແນວທາງນະໂຍບາຍ, ມະຕິ, ຄໍາສັ່ງ, ນິຕິກໍາຕ່າງໆຂອງຂັ້ນເທິງກໍ່ຄືມະຕິກອງປະຊຸມໃຫຍ່ ຄັ້ງທີ IV ໃຫ້ກາຍເປັນອັນລະອຽດ ແລະ ສອດຄ່ອງກັບສະພາບຄວາມເປັນຈິງ ແລະນໍາ ພາຈັດຕັ້ງປະຕິບັດໃຫ້ມີຜົນສໍາເລັດ, ເພີ່ມທະວີ ໃນສຶກສາອົບຮົມໃຫ້ຖັນແຖວພະນັກງານ-ສະມາຊິກພັກ ແລະປະຊາຊົນບັນດາເຜົ່າໃຫ້ມີຄວາມໜັກແໜ້ນທາງດ້ານການເມືອງ, ມີຄວາມເຊື່ອໝັ້ນຕໍ່ການນໍາພາຂອງພັກ, ເສີມຂະຫຍາຍຄວາມ ສາມັກຄີເປັນປຶກແຜ່ນຂອງປະຊາຊົນ, ຊັ້ນຄົນ ບັນດາເຜົ່າ, ເຊີດຊູຈິດໃຈຮັກຊາດຮັກບ້ານເກີດ ເມືອງນອນໃຫ້ສູງຂຶ້ນພ້ອມທັງເສີມຂະຫຍາຍຈິດໃຈເປັນເຈົ້າຕົນເອງ ເພິ່ງຕົນເອງສ້າງຄວາມຮັ່ງມີເຂັ້ມແຂງດ້ວຍຕົນເອງໃຫ້ເປັນຮູບປະທໍາ ຫຼາຍຂຶ້ນ.

แชร์