ການຄ້າເມືອງນອງສະຫຼຸບວຽກງານປະຈໍາປີ ພ້ອມທັງທໍາລາຍສິນຄ້າປອມ

  ວັນທີ 7 ກຸມພາຜ່ານມາ, ທີ່ຫ້ອງປະຊຸມຂອງຫ້ອງການອຸດສາຫະກໍາ ແລະການຄ້າເມືອງ ຈັດກອງປະຊຸມສະຫຼຸບວຽກງານປະຈໍາປີ 2019 ແລະວາງທິດທາງ ແຜນການ 2020 ພ້ອມທັງຈັດພິທີທໍາລາຍສິນຄ້າເຊື່ອມຄຸນ, ໝົດອາຍຸ, ສິນຄ້າເກືອດຫ້າມ, ສິນຄ້າລອກຮຽນແບບ ແລະສິນຄ້ານໍາເຂົ້າບໍ່ຖືກຕ້ອງຂຶ້ນ, ໂດຍພາຍໃຕ້ ການເຂົ້າຮ່ວມເປັນປະທານຂອງ ທ່ານ ລໍາແກ້ວ ແສງໜູທອງ ຮັກສາການເລຂາພັກເມືອງ ເຈົ້າ ເມືອງໆນອງ, ມີທ່ານ ວັນແສງ ແກ້ວບຸນພັນ ຮອງຫົວໜ້າພະແນກອຸດສາຫະກໍາ ແລະການຄ້າແຂວງ, ມີຫົວໜ້າຫ້ອງການ-ຄະນະຫ້ອງ ການອ້ອມຂ້າງເມືອງເຂົ້າຮ່ວມ.

  ທ່ານ ຄໍາບາງ ແກ້ວພຸດໂທ ຫົວໜ້າຫ້ອງການອຸດສາຫະກໍາ ແລະການຄ້າເມືອງໄດ້ລາຍງານບົດສະຫຼຸບປີ 2019 ແລະທິດທາງ ແຜນປີ2020 ໃຫ້ຮູ້ວ່າ: ຫ້ອງການ ອຸດສາຫະກໍາ ແລະການຄ້າເມືອງນອງແມ່ນພາກສ່ວນໜຶ່ງໃນໂຄງປະກອບກົງຈັກຂອງອົງການປົກຄອງເມືອງມີສາຍຕັ້ງຂຶ້ນກັບພະແນກອຸດສາຫະກໍາ ແລະການຄ້າ ແຂວງ ທັງເປັນເສນາທິການໃຫ້ແກ່ອໍານາດການປົກເມືອງໃນການຄຸ້ມຄອງບໍລິຫານລັດ ແລະພະແນກການທາງດ້ານວິຊາການ ຫ້ອງການມີໂຄງປະກອບຄົບຊຸດ ປະກອບມີ ຫົວໜ້າຫ້ອງການ 1 ທ່ານ,ຮອງ 2 ທ່ານ,ວິຊາການ 2 ທ່ານ, ອາສາສະໝັກ 6 ຍິງ 4 ທ່ານ ແລະແບ່ງອອກເປັນ 4 ໜ່ວຍງານ ຄື: ໜ່ວຍງານບໍລິຫານ, ຈັດຕັ້ງ ແລະສະຖິຕິແຜນການ, ມີໜ່ວຍ ງານອຸດສາຫະກໍາ-ຫັດຖະກໍາ ແລະ ນໍາເຂົ້າ-ສົ່ງອອກ, ໜ່ວຍງານການ ຄ້າພາຍໃນ ແລະທະບຽນວິຊາຫະກິດ ແລະໜ່ວຍງານວິສາຫະກິດ ຂະໜາດນ້ອຍ-ກາງ ແລະການຄ້າ.

   ແຕ່ວັນທີ 1 ມັງກອນຈົນເຖິງປະຈຸບັນການສົ່ງອອກທັງໝົດມີມູນຄ່າ 4,15 ຕື້ກີບ ໃນນີ້ແມ່ນສິນຄ້າທີ່ເປັນຜົນຜະລິດກະສິກໍາຂອງ ພໍ່ແມ່ປະຊາຊົນຊາວເມືອງນອງ ເປັນຕົ້ນແມ່ນ ກ້ວຍ, ສັດລ້ຽງ, ຢາງໂບ່ງ, ມັນຕົ້ນ, ເຄື່ອງປ່າຂອງດົງ ແລະອື່ນໆ, ສ່ວນການນໍາເຂົ້າມີມູນຄ່າ 2,66 ຕື້ກີບ ຊຶ່ງການນໍາເຂົ້າທີ່ຕົ້ນຕໍແມ່ນເຄື່ອງອຸປະໂພກ-ບໍລິໂພກ, ເຄື່ອງກໍ່ສ້າງ ເພື່ອມາສ້າງສາພັດທະນາພື້ນຖານໂຄງລ່າງທັງພາກລັດ ແລະເອກະຊົນ.

  ນອກນັ້ນ ທ່ານ ພົມພະຈັນ ວົງມາລີ ຫົວໜ້າໜ່ວຍງານການຄ້າພາຍໃນເມືອງ ໄດ້ຂຶ້ນຜ່ານບົດລາຍງານກວດກາສິນຄ້າ ແລະປົກປ້ອງຜູ້ຊົມໃຊ້ໃນທົ່ວເມືອງ ໂດຍປະຕິບັດຕາມສິດ ແລະພາລະບົດບາດວຽກງານກວດກາການຄ້າຄື: ກວດກາປົກກະຕິປະຕິບັດຕາມການແຕ່ງຕັ້ງຂອງຫົວໜ້າຫ້ອງການອຸດສາຫະກໍາ ແລະການຄ້າເມືອງແມ່ນຈະລົງກວດກາໃນທຸກໆ 3 ເດືອນ ແລະປະຕິບັດຕາມຕາມຂໍ້ຕົກລົງຂອງທ່ານເຈົ້າເມືອງ-ເມືອງນອງ ໂດຍຮ່ວມກັບພາກສ່ວນທີ່ກ່ຽວ ຂ້ອງຂັ້ນເມືອງມີ: ຫ້ອງການອຸດ ສາຫະກໍາ ແລະການຄ້າເມືອງ (ໜ່ວຍງານການຄ້າພາຍໃນ), ຫ້ອງວ່າການປົກຄອງເມືອງ (ໜ່ວຍງານເຕັກໂນໂລຊີ-ຊິງຊັ່ງ ຝອງ), ອົງການກວດກາລັດເມືອງ, ຫ້ອງການສາທາລະນະສຸກເມືອງ (ໜ່ວຍງານອາຫານ ແລະຢາ), ຫ້ອງການ ປກສ ກຸ່ມບ້ານແຕ່ລະບ້ານ, ນາຍບ້ານແຕ່ລະບ້ານ ຊຶ່ງ ໄດ້ພ້ອມກັນລົງໄປກວດກາສິນຄ້າປະຈໍາປີ 2019 ສາມາດກວດພົບເຫັນສິນຄ້າທີ່ນໍາເຂົ້າບໍ່ຖືກຕ້ອງຕາມລະບຽບກົດໝາຍ, ສິນຄ້າເກືອດຫ້າມ, ສິນຄ້າເຊື່ອມຄຸນໝົດອາຍຸ ແລະສິນຄ້າປອມແປງລອກຮຽນແບບລວມມີ 3 ປະເພດສິນ ຄ້າຄື:ປະເພດສິນຄ້າຫ້າມຈໍາໜ່າຍ ແລະເກືອດຫ້າມມີ 9 ລາຍການມີ ຫົວສະແລ໋ງຈັກສະຕິນ, ເຄື່ອງປະກອບຂອງຈັກລວມ, ໝື້ປືນແກັບ ແລະອື່ນໆ, ປະເພດສິນຄ້ານໍາເຂົ້າບໍ່ຖືກຕ້ອງ, ເຊື່ອມຄຸນ ແລະໝົດອາຍຸມີ 54 ລາຍການ ມີຄີມອາບ ນໍ້າ, ນໍ້າຢາປັບຜ້ານຸ້ມ, ເຂົ້າໂດໂຊະ ແລະປະເພດສິນຄ້າລອກຮຽນແບບປອມແປງມີແປ້ງນົວປອມ ລວມ ທັງໝົດມີຢູ່ 57 ລາຍການ ເປັນມູນຄ່າທັງໝົດ 13,58 ລ້ານກີບ, ຂອບເຂດໃນເມືອງ 26 ຮ້ານ, ຮ້ານຄົນ ລາວມີ 11 ຮ້ານ, ຮ້ານ ຄົນຕ່າງປະເທດ 15 ຮ້ານ, ຮ້ານ ນອກ ເມືອງມີ 35 ຮ້ານ, ຮ້ານຄົນ ລາວ 10 ຮ້ານຄົນຕ່າງປະເທດ 25 ຮ້ານ, ລວມທັງໝົດໃນເມືອງ ແລະເຂດນອກມີ 61 ຮ້ານ.

  ໃນຕອນທ້າຍຂອງພິທີຍັງໄດ້ຮັບຟັງຄໍາໂອ້ລົມຂອງທ່ານເຈົ້າ ເມືອງ-ເມືອງນອງ ໂດຍທ່ານໄດ້ເນັ້ນໜັກ ແລະຮຽກຮ້ອງໃຫ້ບັນດາພະນັກງານທຸກຄົນໃຫ້ເອົາໃຈໃສ່ສ້າງພັກພະນັກງານໃນຂົງເຂດວຽກງານວິຊາສະເພາະໃຫ້ໄດ້ດີ, ສ້າງພະນັກງານໃຫ້ມີຄວາມຮູ້ຄວາມສາມາດ, ໃນນີ້ຕ້ອງຕິດພັນກັບການສ້າງພະນັກງານໃຫ້ມີຄຸນສົມບັດ, ໃຫ້ມີຄຸນທາດທີ່ໜັກແໜ້ນ ໃນການປະຕິບັດໜ້າທີ່ວຽກງານໃຫ້ໄດ້, ຊຸກຍູ້ສົ່ງເສີມວິສາຫະກິດຂະໜາດນ້ອຍຂອງພໍ່ແມ່ປະຊາຊົນ.

  ໃນເວລາຕໍ່ມາ ທ່ານປະທານ ພ້ອມດ້ວຍແຂກທີ່ເຂົ້າຮ່ວມກອງປະຊຸມໄດ້ພ້ອມກັນໄປທໍາລາຍສິນຄ້າເກືອດຫ້າມ, ເຊື່ອຄຸນໝົດອາຍຸການນໍາໃຊ້, ສິນຄ້າປອມແປງລອກຮຽນແບບ ແລະສິນຄ້ານໍາເຂົ້າບ່ໍຖືກຕ້ອງຢູ່ສະຖານທີ່ຈູດຂີ້ເຫຍື້ອຂອງເມືອງ ບ້ານຫີນສະຫວ່າງ ເມືອງນອງ ແຂວງສະຫວັນນະເຂດ.

---

ໂດຍ: ອຸ່ນເຮືອນ ໂພທິລັກ

แชร์