ບໍລິຄຳໄຊເລັ່ງສ້າງທາງເທສະບານປາກຊັນໃຫ້ສຳເລັດ 2 ເສັ້ນໃນປີນີ້

   ທ່ານ ໄກ່ທອງ ອານຸສິນ ຫົວໜ້າພະແນກໂຍທາທິການ ແລະຂົນສົ່ງແຂວງໄດ້ຊີ້ແຈງຕໍ່ກອງປະຊຸມສະໄໝສາມັນເທື່ອທີ 6 ສະພາປະຊາຊົນແຂວງຊຸດທີ I ໃນວັນທີ 30 ມັງກອນຜ່ານມານີ້ວ່າ: ໂຄງການກໍ່ສ້າງເສັ້ນທາງເທສະບານປາກຊັນ I (ເຂດຕົວເມືອງປາກຊັນເກົ່າ) ເປັນໂຄງການກໍ່ສ້າງບູລິມາສິດທີ່ສຳຄັນ ທີ່ສຸດຂອງແຂວງເພື່ອສ້າງເຂດຕົວເມືອງປາກຊັນກໍຄືເທສະບານຂອງແຂວງໃຫ້ເປັນເມືອງສີຂຽວ, ສວຍງາມ ແລະໜ້າຢູ່.

  ສຳລັບໂຄງການກໍ່ສ້າງເສັ້ນທາງເທສະບານປາກຊັນ I ມີທັງໝົດ 4 ເສັ້ນຄື: ເສັ້ນທາງແຄມນ້ຳຊັນ, ເສັ້ນກາງ, ເສັ້ນແຄມທົ່ງ ແລະທາງຊອຍເຊື່ອມ 3 ເສັ້ນ ໄລຍະເຊັນສັນຍາກໍ່ສ້າງເບື້ອງຕົ້ນຈະສ້າງເປັນເສັ້ນທາງປູເບຕົງເສີມເຫຼັກ,ລວມຄວາມຍາວທັງໝົດ 10 ກວ່າກິໂລແມັດ,ມູນຄ່າການກໍ່ສ້າງ 129 ຕື້ກີບ ໂດຍແມ່ນກຸ່ມບໍລິສັດຈະເລີນຊັບຄົບວົງຈອນເປັນຜູ້ຮັບເໜົາກໍ່ສ້າງແຕ່ເພື່ອຕອບສະໜອງນະໂຍບາຍຂອງລັດຖະບານກ່ຽວກັບການປະຢັດ ແລະ ເພື່ອເຮັດໃຫ້ໂຄງການດັ່ງກ່າວສຳ ເລັດຕາມແຜນທີ່ກຳນົດໄວ້ທາງພະແນກ ຍທຂ ກໍຄືແຂວງບໍລິຄຳໄຊໄດ້ປັບແບບການກໍ່ສ້າງມາເປັນທາງປູຢາງອາສ໌ຟານ (ຢາງຂົ້ວໃສ່ຫີນ), ປັບມູນຄ່າການກໍ່ສ້າງໃຫ້ຫຼຸດລົງເຫຼືອ 94,9 ຕື້ກີບ. ປະຈຸບັນການຈັດຕັ້ງປະຕິບັດແມ່ນພວມເລັ່ງໃສ່ການກໍ່ສ້າງຂອບທາງ, ທໍ່ລະບາຍນ້ຳສອງຝາກທາງ ແລະປັບໜ້າທາງ, ມາຮອດປະຈຸບັນຕາມການປະເມີນເຫັນວ່າສຳເລັດແລ້ວປະມານ 20%.

 ສຳລັບແຜນໃນຕໍ່ໜ້າທ່ານຫົວໜ້າພະແນກ ຍທຂ ຍັງໃຫ້ຮູ້ຕື່ມອີກວ່າ: ຈະເລັ່ງໃສ່ການເຮັດຝາອັດທໍ່ນ້ຳຄືນໃໝ່ເພາະມັນຍັງຕໍ່າກວ່າແບບ ແລະສຸມໃສ່ການປູຢາງອາສ໌ຟານ, ຄາດວ່າໃນປີ 2019 ຈະໃຫ້ສຳເລັດທາງ 2 ເສັ້ນກ່ອນຄື: ທາງເສັ້ນກາງ ແລະເສັ້ນແຄມທົ່ງ, ລວມຄວາມຍາວ 5 ກິໂລແມັດ ແລະ ອີກ 2 ເສັ້ນຄື: ເສັ້ນແຄມນ້ຳຊັນ ແລະ ທາງຊອຍເຊື່ອມ 3 ເສັ້ນທາງຫຼັກຈະສຳເລັດ ໃນປີ 2020 ຕາມແຜນທີ່ໄດ້ກຳນົດໄວ້.

แชร์