ທ່ຽວຊົມຕາດນົກເຄົ້າ ເມືອງລະມາມ

  ເມື່ອເວົ້າເຖິງແຫຼ່ງທ່ອງທ່ຽວແຂວງເຊກອງ ແລ້ວພາຍໃນແຂວງຍັງມີສະຖານທີ່ທ່ອງທ່ຽວທາງທໍາມະຊາດທີ່ມີຄວາມໂດດເດັ່ນເປັນຕົ້ນແມ່ນນໍ້າຕົກຕາດແຝກ, ຕາດປະອໍ, ຕາດຫົວຄົນ, ແກ້ງ, ຖໍ້າເດັ້ງພູນາງເລົາ ແລະອື່ນໆ.

 ຕາດນົກເຄົ້າເປັນອີກສະຖານທີ່ໜຶ່ງທີ່ມີຄວາມໂດດເດັ່ນ ແລະສວຍສົດງົດງາມທາງດ້ານທິວທັດທໍາມະຊາດປ່າໄມ້ອັນດົກໜາຂຽວງາມອຸ່ມທຸ່ມເຮັດໃຫ້ອາກາດເຂດນີ້ມີຄວາມສົດຊື່ນແຈ່ມໃສດີຈຶ່ງກາຍເປັນສະຖານທີ່ທ່ອງທ່ຽວໄດ້ຮັບຄວາມນິຍົມຊົມຊອບຈາກນັກທ່ອງທ່ຽວທັງພາຍໃນ ແລະ ຕ່າງປະເທດເປັນຈໍານວນບໍ່ໜ້ອຍຕັ້ງຢູ່ບ້ານໜອງບົງ ເມືອງລະມາມຫ່າງຈາກເທສະບານເມືອງ ແລະແຂວງ 14 ກິໂລແມັດ ແລະຫ່າງຈາກເສັ້ນທາງເລກທີ 16B ປະມານ 1,5-2 ກິໂລແມັດ, ໄດ້ເປີດບໍລິການນຳໃຊ້ໃນປີ 2008, ການເຂົ້າຫາແຫຼ່ງທ່ອງທ່ຽວແມ່ນດ້ວຍລົດ, ຕາດນົກເຄົ້າເກີດຂຶ້ນຕາມທຳມະຊາດມາແຕ່ໃດໆແລ້ວມີຫ້ວຍນໍ້າທີ່ໄສເຢັນໄຫຼຜ່ານຕາມສາຍພູຊຶ່ງມີຄວາມສູງປະມານ 10-15 ແມັດ, ກວ້າງປະມານ 15-20 ແມັດ.

  ໃນເມື່ອກ່ອນຊາວບ້ານໄດ້ພາກັນມາຫາກິນຕາມສະຖານທີ່ແຫ່ງນີ້ແລ້ວກໍ່ໄດ້ພົບເຫັນໝູ່ນົກເຄົ້າມາເຮັດຮັງໃສ່ຢູ່ຕົ້ນໄມ້ໃຫ່ຍເທິງຕາດຕົ້ນໜຶ່ງຢ່າງເປັນປົກກະຕິດັ່ງນັ້ນຊາວບ້ານຈິ່ງໄດ້ເອີ້ນຊື່ຕາດນີ້ວ່າ: “ຕາດນົກເຄົ້າ” ຈົນມາຮອດປະຈຸບັນນີ້.

___________

ໂດຍ: ວົງມະນີ

แชร์