ສັງທອງສຸມໃສ່ພັດທະນາ 3 ເຂດໃຫຍ່

  ເມືອງສັງທອງ ນະຄອນຫຼວງວຽງຈັນ ເປັນເມືອງວິລະຊົນມີທີ່ຕັ້ງຢູ່ຕອນເໜືອຫ່າງຈາກນະຄອນຫຼວງ 60 ກິໂລແມັດ ທີ່ຄູ່ຂະໜານລະຫວ່າງແມ່ນໍ້າຂອງກັບສາຍພູພະນັງບວກກັບເສັ້ນທາງເລກ 11 ແລະປະສານກັບສາຍນໍ້າຕອນ-ນໍ້າສັງ ແລະມີເນື້ອທີ່ທັງໝົດເກືອບ 76 ພັນເຮັກຕາ ຊຶ່ງພື້ນທີ່ເປັນເນີນພູສູງກວມ 40%, ເນື້ອທີ່ກະສິກໍາ 29 ພັນກວ່າເຮັກຕາ ທີ່ເໝາະແກ່ການຜະລິດກະສິກໍາ, ການທ່ອງທ່ຽວ-ການບໍລິຫານ...; ທົ່ວເມືອງມີ 35 ບ້ານ ມີພົນລະເມືອງ 32 ພັນກວ່າຄົນ ແລະມີຄາດໝາຍສູ້ຊົນໃນປີ 2020 ລວມຍອດຜະລິດຕະພັນໃຫ້ບັນລຸ574,08 ຕື້ກີບ, ສະເລ່ຍລາຍໄດ້ຕໍ່ຫົວຄົນ 16,58 ລ້ານກີບ ຫຼື 2.073 ໂດລາຕໍ່ຄົນ ຕໍ່ປີ ແລະ ໃນປີ 2019 ຜ່ານມາ ສາມາດ ເກັບລາຍຮັບໄດ້ 7,6 ຕື້ກີບ ຕາມແຜນ 7,5 ຕື້ກີບ.

  ໃນມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກເມືອງສັງທອງໄດ້ກໍານົດການພັດທະນາໂດຍສຸມໃສ່ 3 ເຂດ ໃຫຍ່ເປັນຫຼັກຊຶ່ງເຂດພັດທະນາທີ 1 ແມ່ນ ເຂດນໍ້າຕອນລຽບພູພະນັງກໍານົດເປັນເຂດຜະລິດກະສິກໍາຕິດພັນກັບການທ່ອງທ່ຽວປະຫວັດສາດຊຶ່ງໄດ້ຊຸກຍູ້ສົ່ງເສີມປະຊາຊົນຈັດຕັ້ງເປັນກຸ່ມຜະລິດເຂົ້າອິນຊີໃນ 8 ບ້ານ ມີ 282 ຄອບຄົວ ແລະມີເນື້ອ ທີ່ 378 ເຮັກຕາ; ປູກຜັກປອດສານພິດ ແລະປູກພືດລົ້ມລຸກ175 ເຮັກຕາ; ສົ່ງເສີມຫັດຖະກໍາຕໍ່າຫູກທໍໄໝນອກນີ້ຍັງມີແຫຼ່ງທ່ອງທ່ຽວປະຫວັດສາດຄື: ພັກສະເດັດ ສຸພານຸວົງ (ບ້ານທ່ານາຂາມ),ອະນຸສອນສະຖານວິລະຊົນສີທອງ (ບ້ານນາຫອຍປັງ), ກອງຮ້ອຍຟ້າງຸ່ມ (ບ້ານຫີນສິ່ວ) ພ້ອມທັງລະດົມປະຊາຊົນມີສ່ວນຮ່ວມສ້າງຝາຍນໍ້າລົ້ນເພື່ອນໍາໃຊ້ເຂົ້າໃນການຜະລິດກະສິກໍາ,ສ້າງວັງສະຫງວນຮັກສາແນວພັນປາຊຶ່ງສໍາຫຼວດສ້າງຝາຍ 13 ຈຸດແລະມອບໃຫ້ຂະແໜງກ່ຽວຂ້ອງອອກແບບສໍາເລັດແລ້ວຢູ່ບ້ານຫີນສິ່ວ, ບ້ານປາກແຖບ ແລະພວມດໍາເນີນຢູ່ບ້ານເພຍລາດ ແລະບ້ານຫ້ວຍຄໍາ.

  ເຂດພັດທະນາ ທີ 2 ເຂດທາງເລກ 11 ລຽບຕາມແມ່ນໍ້າຂອງກໍານົດເປັນເຂດຜະລິດກະສິກໍາ, ອຸດສາຫະກໍາ ແລະການບໍລິການເປັນຕົ້ນການຄ້າຂາຍ ແລະບໍລິການຕ່າງໆຕິດພັນກັບການສົ່ງເສີມການປູກເຂົ້າ, ປູກພືດລົ້ມລຸກເຊັ່ນ: ໝາກເຜັດ, ໝາກເຂືອ, ໝາກແຕງ, ໝາກຖົ່ວ, ໝາກສາລີ ເນື້ອທີ່ 291 ເຮັກຕາ ແລະຍັງກໍານົດ ເປັນເຂດຂຸດຄົ້ນແຮ່ທາດ, ໂຮງຈັກ-ໂຮງງານເຊັ່ນ: ຂຸດຄົ້ນແຮ່ຄໍາ-ຖ່ານຫີນ 5 ບໍລິສັດໃນເນື້ອທີ່ 1,4 ພັນເຮັກຕາ ແລະຂຸດຄົ້ນຫິນກໍ່ສ້າງມີ 17 ບໍລິສັດ ເນື້ອທີ່ 277,7ເຮັກຕາ.

  ເຂດພັດທະນາທີ 3 ເຂດລຽບຕາມສາຍນໍ້າສັງກໍານົດເປັນເຂດຜະລິດກະສິກໍາ ແລະການທ່ອງທ່ຽວທໍາມະຊາດໃນນີ້ເຂດດັ່ງກ່າວໄດ້ສົ່ງເສີມການປູກເຂົ້າ, ປູກພືດອຸດສາຫະກໍາ, ພືດຜັກໃນນີ້ມີໝາກເດືອຍ, ໝາກສາລີແຂງໃນເນື້ອທີ່ 555 ເຮັກຕາ; ປູກໝາກໄມ້ໃຫ້ໝາກມີ້ໝາກລໍາໄຍ, ໝາກມ່ວງ, ໝາກຂາມໃນເນື້ອທີ່ 100 ເຮັກຕາ; ປູກໄມ້ອຸດສາຫະກໍາມີຢາງພາລາ, ໄມ້ສັກ ແລະອື່ນໆ ໃນເນື້ອທີ່ 852 ຮຕ ແລະຍັງສົ່ງເສີມລ້ຽງສັດເປັນຟາມເປັນຕົ້ນປາດຖະໜາຟາມ, ທະວີໂຊກຟາມ, ຟາມລ້ຽງໝູຟູຫຼົງ ແລະຊຸກຍູ້ສົ່ງເສີມການສ້າງຕັ້ງກຸ່ມຜະລິດຫັດຖະກໍາໄມ້ປ່ອງ (ບ້ານນາປໍ). ນອກຈາກນີ້, ຍັງມີແຫຼ່ງທ່ອງທ່ຽວທໍາມະຊາດຄື: ດອນເຈົ້າ, ດົງປ່າແຕ້, ດົງປ່າແຄນ ແລະທ່ອງທ່ຽວສາຍນໍ້າສັງຊຶ່ງຜ່ານການຈັດຕັ້ງປະຕິບັດເຫັນວ່າ: ຊີວິດການເປັນຢູ່ຂອງປະຊາຊົນນັບມື້ດີຂຶ້ນເທື່ອລະກ້າວ.

___________

ຂຽນໂດຍ: ຣັດສະໝີ ດວງສັດຈະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์