ອັດຕາການຊົມໃຊ້ໄຟຟ້າຢູ່ເຊກອງເພີ່ມຂື້ນ

   ໃນປີ  2019 ຜ່ານມາພະແນກພະລັງງານ-ບໍ່ແຮ່ ແຂວງເຊກອງ ໄດ້ເອົາໃຈໃສ່ໃນການກໍ່ສ້າງ ແລະຂະຫຍາຍຕາຂ່າຍໄຟຟ້າ ຢູ່ 3 ເມືອງຂອງແຂວງຄື: ເມືອງລະມາມ, ດາກຈຶງ ແລະເມືອງກະລຶມ ເພື່ອເຮັດໃຫ້ພື້ນຖານໂຄງລ່າງ ແລະອັດຕາການຊົມໃຊ້ໄຟຟ້າມີທ່າອ່ຽງເພີ່ມຂຶ້ນ.

  ທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງລາຍງານໃຫ້ຮູ້ວ່າ: ມາຮອດປະຈຸບັນມີບ້ານທີ່ໄດ້ຊົມໃຊ້ໄຟຟ້າໃນລະບົບຖາວອນ ແລະນອກລະບົບທັງໝົດ 146 ບ້ານ, ເທົ່າກັບ 100% ຂອງແຜນປີ ແລະເທົ່າກັບ 74,11%ຂອງຈໍານວນບ້ານທົ່ວແຂວງ, ທຽບໃສ່ປີ 2018 ເພີ່ມ ຂຶ້ນ 8 ບ້ານ ຫຼືເທົ່າກັບ 5,79%, ມີຫຼັງຄາເຮືອນທີ່ໄດ້ຊົມໃຊ້ໄຟຟ້າລະບົບຖາວອນ ແລະນອກລະບົບທັງໝົດ 16.066 ຫຼັງຄາເຮືອນ,ເທົ່າກັບ95,35% ຂອງແຜນປີ,ທຽບໃສ່ຫຼັງຄາເຮືອນທົ່ວແຂວງເທົ່າກັບ 80,94 %, ທຽບໃສ່ປີ 2018 ເພີ່ມຂຶ້ນ 201 ຫຼັງຄາເຮືອນ; ຊຶ່ງໃນນີ້ບ້ານທີ່ຊົມໃຊ້ໄຟຟ້ານອກລະບົບທັງໝົດມີ 5 ບ້ານ, 62 ຫຼັງຄາເຮືອນ, ຫຼຸດລົງ 55 ຫຼັງຄາເຮືອນຈາກທັງໝົດ 117 ຫຼັງຄາເຮືອນ.

  ສໍາລັບແຜນການປີ 2020 ຈະສືບຕໍ່ຊຸກຍູ້ບັນດາບໍລິສັດທີ່ໄດ້ເຊັນ MOU, PDA&CA ກ່ຽວກັບການພັດທະນາພະລັງງານໄຟຟ້ານໍ້າຕົກໃຫ້ປະຕິບັດຕາມບົດບັນທຶກສັນຍາດັ່ງກ່າວຢ່າງເຂັ້ມງວດ; ເອົາໃຈໃສ່ຄຸ້ມຄອງການກໍ່ສ້າງສາຍສົ່ງ, ສະຖານີ 230,500 KVA, ເຂື່ອນໄຟຟ້າຫ້ວຍລຳພັນຕອນລຸ່ມ, ເຂື່ອນໄຟຟ້ານໍ້າບີ 1, 2, 3 ແລະ ເຂື່ອນດາກອີມູນໃຫ້ສຳເລັດຕາມແຜນການຮັບປະກັນທາງດ້ານປະລິມານ ແລະ ຄຸນນະພາບ; ສືບຕໍ່ຂະຫຍາຍຕາຂ່າຍໄຟຟ້າໄປສູ່ຊົນນະບົດໃຫ້ສຳເລັດຕາມແຜນ ການໂດຍສະເພາະເຂດຊົນນະບົດຫ່າງໄກສອກຫຼີກໃຫ້ໄດ້ມີໄຟຟ້າໃຊ້ຖາວອນໃຫ້ຫຼາຍຂຶ້ນ.

______________

ຂຽນໂດຍ: ພຸດທະສອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์