ວພສ ເປັນສະຖານການສຶກສາປອດຢາເສບຕິດ

   ວັນທີ 7 ກຸມພາ ຜ່ານມາທີ່ນະຄອນຫຼວງວຽງຈັນ ວິທະຍາໄລພາລະສຶກສາ (ວພສ)ປະກາດ ແລະຮັບຮອງວິທະຍາໄລເປັນສະຖານການສຶກສາປອດຢາເສບຕິດປະຈໍາສົກຮຽນ 2018-2019 ໂດຍເປັນກຽດເປີດແຖບປ້າຍຂອງທ່ານ ຄໍາສີ ຄໍາພັນທອງ ຮອງຫົວໜ້າກົມພາລະ ແລະສິລະປະສຶກສາ ແລະທ່ານ ອິນຕອງ ເລີດສິນໄຊ ຜູ້ອໍານວຍການວິທະຍາໄລພາລະສຶກສາ, ມີຄະນະອໍານວຍການ, ພະແນກ, ຫ້ອງການ, ໜ່ວຍງານ, ວິຊາການ, ຄູ-ອາຈານ  ແລະນັກສຶກສາເຂົ້າຮ່ວມ.

  ທ່ານ ນິລັນ ອິນຕາ ຮອງຫົວໜ້າຫ້ອງການກິດຈະການນັກສຶກສາວິທະຍາໄລພາລະສຶກສາໄດ້ໃຫ້ຮູ້ກ່ຽວກັບການຈັດຕັ້ງປະຕິບັດສ້າງວິທະຍາໄລປອດຢາເສບຕິດໄລຍະຜ່ານມາແມ່ນເລີ່ມແຕ່ສົກຮຽນ 2008-2009 ເປັນຕົ້ນມາ ວິທະຍາໄລໄດ້ເຫັນເຖິງຄວາມສໍາຄັນຂອງການຕ້ານ ແລະສະກັດກັ້ນສານເສບຕິດໃນສຖານທີ່ການສຶກສາບໍ່ວ່າໃນຮູບແບບໃດກໍ່ຕາມ, ໄດຍໄດ້ກໍານົດແຜນຍຸດທະສາດ, ກໍານົດນິຕິກໍາລະບຽບການຄຸ້ມຄອງຕ່າງໆ ຕໍ່ຜູ້ລະເມີດໂດຍສະເພາະແມ່ນໄດ້ຈັດຕັ້ງປະຕິບັດຄໍາຂວັນວິທະຍາ ໄລພາລະສຶກສາປອດສານເສບຕິດ, ມຶນເມົາ ແລະຢາສູບບໍ່ມີການຊື້-ຂາຍເຫຼົ້າເບຍ,ບໍ່ສູບ ແລະງານລ້ຽງພິທີຕ່າງໆບໍ່ມີເຫຼົ້າເບຍ, ໄດ້ແຕ່ງຕັ້ງຄະນະຮັບຜິດຊອບວຽກງານນີ້, ມີການປະຊຸມຮ່ວມກັບບັນດາບ້ານອ້ອມຂ້າງວິທະຍາໄລເພື່ອຖອດຖອນບົດຮຽນໃນການຄຸ້ມຄອງນັກສຶກສາທີ່ນອນຢູ່ຫ້ອງແຖວແລະຕິດປ້າຍຄໍາຂວັນຕ່າງໆເພື່ອປູກຈິດສໍານຶກໃຫ້ພະນັກງານ ແລະນັກສຶກສາເປັນຄະຕິເຕືອນໃຈ,ນອກຈາກນັ້ນ,ຍັງໄດ້ຈັດຕັ້ງເຜີຍແຜ່ຜົນຮ້າຍຂອງຢາເສບຕິດປະເພດຕ່າງໆ ພ້ອມກັນນັ້ນກໍ່ໄດ້ມີການຈັດການກວດສານເສບຕິດແຕ່ລະສົກຮຽນຕັ້ງແຕ່ກ່ອນຮັບນັກຮຽນ, ກວດໄລຍະຮຽນ ແລະກ່ອນຈະໄປຝຶກຫັດ ແລະເສັງຈົບ, ສຶກສາອົບຮົມໂດຍຕິດພັນກັບການນໍາພາທາງດ້ານແນວຄິດໃນເວລາເຄົາລົບທຸງເຊົ້າວັນຈັນ,ຊຶ່ງມັນໄດ້ສະແດງອອກໃນການຈັດກິດຈະກໍາຕ່າງໆພາຍໃນຂອບເຂດວິທະຍາໄລບໍ່ມີສິງຂອງມຶນເມົາ, ສໍາລັບການຈັດຕັ້ງປະຕິບັດວຽກງານວິຊາສະເພາະກໍ່ຄື ການຈັດຕັ້ງການຮຽນ-ການສອນທາງວິທະຍາໄລໄດ້ຈັດຕັ້ການກວດສານເສບຕິດທັງພະນັກງານ ແລະ ນັກສຶກສາທຸກຄົນກ່ອນ-ຫຼັງເຂົ້າຮຽນການຈັດຕັ້ງປະຕິບັດນັ້ນແມ່ນໄດ້ປະຕິບັດຕາມແຜນການ ແລະສຸ່ມກວດກຸ່ມເປົ້າໝາຍເປັນໄລຍະ.

  ທ່ານ ຄໍາສີ ຄໍາພັນທອງ ໄດ້ກ່າວສະແດງຄວາມຍ້ອງຍໍຊົມເຊີຍພ້ອມທັງໃຫ້ທິດທາງເພື່ອໃຫ້ຮັກສາມູນເຊື້ອໃນການຮັກສາວິທະຍາໄລ ເປັນວິທະຍາໄລປອດຢາເສບຕິດ ໃຫ້ຕິດຕໍ່ກັນຫຼາຍໆສະໄໝແມ່ນໃຫ້ ສືບຕໍ່ສຶກສາອົບຮົມຄູ-ອາຈານ, ນັກສຶກສາໃຫ້ກໍາແໜ້ນບັນດານິຕິກໍາຕ່າງໆກ່ຽວກັບການຕ້ານ ແລະສະ ກັດກັັ້ນປາກົດການຫຍໍ້ທໍ້ ໂດຍສະເພາະແມ່ນບັນຫາສິ່ງເສບຕິດໃຫ້ມັນເລິກເຊິ່ງເຖິງຖອງ, ໃຫ້ຈັດຕັ້ງ ເຊື້ອມຊຶມນິຕິກໍາຕ່າງໆກ່ຽວກັບຢາເສບຕິດ ແລະມາດຖານສ້າງວິທະຍາໄລຄູປອດຢາເສບຕິດໃຫ້ແກ່ນັກສຶກສາຢ່າງເນືອງນິດລຽນຕິດ; ເອົາໃຈໃສ່ສ້າງຂະບວນການກີລາ-ສິລະວັນນະຄະດີ, ຈັດຕັ້ງກິດຈະກໍາຕ່າງໆໃຫ້ຕິດພັນການຈັດຈັ້ງປະຕິບັດໂຄງການດັ່ງກ່າວ; ຈັດຕັ້ງການແຂ່ງຂັນການປະຕິບັດມາດຖານສ້າງວິທະຍາໄລຄູປອດຢາເສບຕິດ, 3 ຂໍ້ແຂງຂັນຂອງກະຊວງສຶກສາທິການ ແລະ ກີລາວາງອອກ ແລະ ແຂ່ງຂັນກັນສ້າງຂະ ບວນການຮັກຊາດພັດທະນາ;ໃຫ້ຖືເປັນບັນຫາສໍາຄັນໃນການຮ່ວມມືກັບພາກສ່ວນຕ່າງໆ ປະຕິບັດໂຄງການຕ້ານຢາເສບຕິດພາຍໃນວິທະຍາໄລໃຫ້ເລິກເຊິ່ງ,ໜັກແໜ້ນ, ຫັນເອົາວຽກງານດັ່ງກ່າວນີ້ຕິດພັນກັບຂະບວນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນເອົາເຂົ້າເປັນມາດຖານໜຶ່ງອ້ອມກັບມາດຖານລວມເພື່ອເປັນການສໍາຫຼວດກວດກາພາຍໃນພັກກ່ຽວກັບບັນຫານີ້.

______________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์