ລາວໂທລະຄົມສະຫຼບວຽກງານປະຈຳປີ

  ວັນທີ 11 ກຸມພາຜ່ານມາທີ່ສຳນັກງານໃຫຍ່ບໍລິສັດລາວໂທລະຄົມມະນາຄົມມະຫາຊົນໄດ້ຈັດກອງປະຊຸມສະຫຼຸບຜົນການເຄື່ອນໄຫວວຽກງານປະຈຳປີ 2019 ພາຍ ໃຕ້ການເປັນປະທານຂອງທ່ານ ສຸພົນ ຈັນທະວິີໄຊ ຜູ້ອຳນວຍການໃຫຍ່ບໍລິສັດລາວໂທລະຄົມມະນາຄົມມະຫາຊົນ, ໂດຍໃຫ້ກຽດເຂົ້າຮ່ວມມີທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີໂທລະຄົມມະນາຄົມ ແລະສື່ສານ,  ພ້ອມດ້ວຍແຂກຖືກເຊີນ ແລະພະນັກງານຂອງລາວໂທລະຄົມທົ່ວປະເທດເຂົ້າຮ່ວມ.

  ທ່ານ ສຸພົນ ຈັນທະວີໄຊ ກ່າວວ່າ: ໃນໜຶ່ງປີຜ່ານມາລາວໂທລະຄົມຍາດໄດ້ຜົນງານພົ້ນເດັ່ນຫຼາຍດ້ານເປັນຕົ້ນໄດ້ລົງທຶນຂະຫຍາຍຕາໜ່າງລະບົບໂທລະຄົມມະນາຄົມໃນມູນຄ່າທັງໝົດ 25,93 ລ້ານໂດລາ ປະຈຸບັນລາວໂທລະຄົມມີສະຖານີມືຖື 2G, 3G, 4G ແລະ 4,5G, ມີສະຖານີມືຖື 7.436 ສະຖານີໃນນີ້ GSM2G ຈຳ ນວນ 1.928 ສະຖານີ, 3G ມີ 2.843 ສະຖານີ, 4G ມີ2.045 ສະຖານີ ແລະ 4,5G ຈຳນວນ 620 ສະຖານີ, IP Core/IP RAN 1.343 ແລະ FTTH ຈຳນວນ 66.294 Ports ກວມ47% ຂອງຫຼັງຄາເຮືອນໃນເຂດເທສະບານ, ມີສັນຍານໂທລະສັບມືຖືຄວບຄຸມໄດ້ທົ່ວປະເທດກວມປະຊາກອນ 80% ໃນນັ້ນ 4G ກວມ 58%.

  ທັງໝົດເຫຼົານັ້ນໄດ້ກາຍເປັນປັດໄຈຫຼັກທີ່ເຮັດໃຫ້ລາວໂທລະຄົມສາມາດຂະຫຍາຍລູກຄ້າໃໝ່ ແລະຮັກສາຈຳນວນລູກຄ້າເກົ່າໄວ້ມາຮອດປະຈຸບັນມີລູກຄ້າໃຊ້ໂທລະສັບມືຖືໃນລະບົບ 1,4 ລ້ານ ໝາຍເລກ, ໂທລະສັບຕັ້ງໂຕະ 33 ພັນໝາຍເລກ, ໂທລະສັບວິນໂຟນ 304 ພັນໝາຍເລກ ແລະອິນເຕີເນັດ 1,3 ລ້ານ ລູກຄ້າໃນປີ 2019 ຜ່ານມາສາມາດສ້າງລາຍຮັບໄດ້ 1.702 ຕື້ກວ່າກີບ ໃນນັ້ນກຳໄລສຸດທິ 177,5 ຕື້ກີບ, ປະຕິບັດພັນທະໃຫ້ລັດຖະບານ 471,1 ຕື້ກີບ ຊຶ່ງກວມເອົາ 27,6% ຂອງລາຍຮັບທີ່ລາວໂທລະຄົມປະຕິບັດໄດ້ໃນປີ 2019 ນອກນັ້ນຍັງໄດ້ປັບປຸງລະບຽບ, ນະໂຍບາຍສະຫວັດດີການສັງຄົມຕ່າງໆ ເພື່ອຍົກສູງລະດັບຊີວິດການເປັນຢູ່ໃຫ້ພະນັກ ງານໃຫ້ດີຂຶ້ນເລື້ອຍໆ ໄປຄຽງຄູ່ກັບການດຳເນີນທຸລະກິດຍັງໄດ້ປະກອບສ່ວນຊ່ວຍເຫຼືອ ແລະໃຫ້ອຸປະຖຳຕໍ່ອົງການຈັດຕັ້ງພັກ-ລັດ ແລະສັງຄົມເປັນມູນຄ່າ 2,1 ຕື້ກີບ ໃນນັ້ນອັນພົ້ນເດັ່ນໄດ້ຊຸກຍູ້ງານສະເຫຼີມສະຫຼອງວັນສ້າງຕັ້ງກອງທັບຄົບຮອບ 70 ປີ ມີຄ່າ 700 ລ້ານກີບ.

  ສຳລັບແຜນການປີ 2020 ລາວໂທລະຄົມຈະສູ້ຊົນສ້າງຖານລູກຄ້າໃໝ່ໃຫ້ເພີ່ມ 97.934 ໝາຍເລກ ແລະສ້າງລາຍຮັບໃຫ້ໄດ້ທັງໝົດ 1.804 ຕື້ກວ່າກີບ ທຽບໃສ່ປີ 2019 ເພີ່ມຂຶ້ນ 6,3% ຄາດຄະເນກຳໄລສຸດທິໃຫ້ໄດ້ 371,3 ຕື້ກີບເພີ່ມຂຶ້ນ 33,5%, ຈະສາມາດປະຕິບັດພັນທະໃຫ້ລັດຖະບານ 507 ຕື້ກວ່າກີບ, ນອກນັ້ນຍັງຈະໄດ້ລົງທຶນທັງໝົດ 26,9 ລ້ານໂດລາເພື່ອສືບຕໍ່ປັບປຸງ ແລະຂະຫຍາຍເຄືອຂ່າຍການໃຫ້ບໍລິການດ້ານໂທລະຄົມ.

__________

ຂຽນໂດຍ: ວົງມະນີ    
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์