ລາວລະດົມທຶນຊ່ວຍຜູ້ເຄາະຮ້າຍພະຍາດອັກເສບປອດຢູ່ຈີນ

  ວັນທີ 11 ກຸມພາ 2020 ທີ່ນະຄອນຫຼວງວຽງຈັນ ສະມາຄົມມິດຕະພາບລາວ-ຈີນ ແລະນະຄອນຫຼວງວຽງຈັນ ໄດ້ຮ່ວມກັນເປັນເຈົ້າພາບຈັດງານລະດົມທຶນເພື່ອຊ່ວຍເຫຼືອຜູ້ປະສົບໄພເຄາະຮ້າຍຈາກພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ຢູ່ນະຄອນອູຮັ່ນແຂວງຫູເປີ່ຍ ສປ ຈີນ ເປັນກຽດເຂົ້າຮ່ວມເປັນປະທານຂອງ ທ່ານ ສົມດີ ດວງດີ ຮອງນາຍົກລັດຖະມົນຕີລັດຖະມົນຕີກະຊວງການເງິນ, ທ່ານJiang Zaidong ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປ ຈີນ ປະຈຳລາວ, ບັນດາທ່ານລັດຖະມົນຕີກະຊວງກ່ຽວຂ້ອງ, ການນໍາພັກ-ລັດ ແລະນັກທຸລະກິດລາວ-ຈີນເຂົ້າຮ່ວມ.

  ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະບໍ່ແຮ່ປະທານສະມາຄົມມິດຕະພາບລາວ-ຈີນໄດ້ຕາງໜ້າສະແດງຄວາມເປັນຫ່ວງມາຍັງພັກ-ລັດຖະ ບານ ສປ ຈີນແລະຄອບຄົວຜູ້ປະພົບເຄາະຮ້າຍຈາກມະຫັນຕະໄພດັ່ງກ່າວກ່ອນໜ້ານີ້ສະມາຄົມມິດຕະພາບລາວ-ຈີນ ຂັ້ນສູນກາງກໍ່ໄດ້ລະດົມວັດຖຸສິ່ງຂອງທີ່ຈຳເປັນຈາກບັນດາບໍລິສັດ ແລະສະພາການຄ້າໃນລາວໄດ້ຈຳນວນໜຶ່ງໄດ້ຈັດສົ່ງໄປໃຫ້ ສປ ຈີນ ເປັນທີ່ຮຽບຮ້ອຍແລ້ວຊຶ່ງລວມທັງ ໝົດມີຄື: ຜ້າອັດປາກ-ດັງຈຳນວນ 76,2 ແສນກວ່າຜືນ, ອຸປະກອນການແພດປະເພດຖົງມື 1,6 ແສນຄູ່, ແວ່ນຕາ 1 ພັນອັນ, ໝວກ 25 ພັນໜ່ວຍເພື່ອເປັນການສະແດງນໍ້າໃຈມະນຸດສະທຳມູນເຊື້ອຮັກແພງສາ ມັກຄີຊ່ວຍເຫຼືອກັນ ແລະກັນຂອງສອງຊາດ ລາວ-ຈີນ ຈຶ່ງໄດ້ຈັດງານເພື່ອລະດົມທຶນຊ່ວຍເຫຼືອຜູ້ປະສົບໄພເຄາະຮ້າຍຈາກພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ຢູ່ເມືອງອູ່ຮັ່ນຂຶ້ນຕື່ມອີກໃນຄັ້ງນີ້ຜ່ານການລະດົມທັງໝົດໄດ້ເງິນ 840 ລ້ານກວ່າກີບ ສຳລັບເງິນທີ່ໄດ້ຈາກການລະດົມທຶນໃນຄັ້ງນີ້ຈະນຳໄປຊື້ອຸປະກອນທີ່ຈຳ ເປັນເພື່ອນຳໄປຊ່ວຍເຫຼືອ ສປ ຈີນ ທີ່ໄດ້ຮັບຜົນກະທົບຈາກເຊື້ອໄວຣັດດັ່ງກ່າວເພື່ອສະແດງເຖິງນຳໃຈ, ຄວາມເປັນຫ່ວງເປັນໃຍ ແລະແບ່ງເບົາຄວາມທຸກໂສກຂອງເພື່ອນມິດ.

 ໂອກາດນີ້ ທ່ານ ສົມດີ ດວງດີ ກໍ່ໄດ້ກ່າວເຊີນທຸກພາກສ່ວນຈົ່ງສະແດງຄວາມເຫັນໃຈປະກອບສ່ວນແບ່ງເບົາບັນເທົາທຸກໄປຊ່ວຍປະຊາຊົນຊາວອູ່ຮັ່ນຜູ້ທີ່ໄດ້ຮັບເຄາະຮ້າຍຈາກແຜ່ລະບາດພະຍາດໄວຣັດຄັ້ງນີ້ດ້ວຍສຳລັບບຸກຄົນໃດຫາກມີຄວາມຕ້ອງການຢາກຈະມີສ່ວນຮ່ວມໃນການຊ່ວຍເຫຼືອກໍ່ສາມາດໄປບໍລິຈາກໄດ້ທີ່ກະຊວງພະລັງງານ ແລະບໍ່ແຮ່ ແລະຫ້ອງວ່າການນະຄອນຫຼວງວຽງຈັນ ສ່ວນຕ່າງແຂວງແມ່ນໄປບໍລິຈາກໄດ້ທີ່ພະແນກຕ່າງປະເທດ ແລະພະແນກພະລັງງານ ແລະບໍ່ແຮ່ໃນແຕ່ລະແຂວງ.

__________

ຂຽນໂດຍ:  ແພງຕາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์