ສະພາແຫ່ງຊາດ ສະຫຸຼບເຄື່ອນໄຫວວຽກງານປີ 2019

  ສະພາແຫ່ງຊາດໄດ້ຈັດກອງປະຊຸມສະຫຼຸບການເຄື່ອນໄຫວວຽກງານ ແລະຂະບວນການແຂ່ງຂັນ “ຮັກຊາດ ແລະພັດທະນາ” ປະຈຳ ປີ 2019 ພ້ອມວາງທິດທາງແຜນການປະຈຳປີ 2020 ຂຶ້ນໃນວັນ ທີ 11 ກຸມພາ ທີ່ນະຄອນຫຼວງວຽງຈັນ ໂດຍມີທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດພ້ອມດ້ວຍສະມາຊິກພັກ, ພະນັກງານ-ລັດຖະກອນພາຍໃນສະພາແຫ່ງຊາດເຂົ້າຮ່ວມຢ່າງພ້ອມພຽງ.

 ທ່ານ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດລາຍງານໃຫ້ຮູ້ວ່າ: ໃນໄລຍະຜ່ານມາຄະນະປະຈຳສະພາແຫ່ງຊາດໄດ້ພິຈາລະນາບັນຫາສຳຄັນຕ່າງໆທັງໝົດ 114 ເລື່ອງ ແລະຮັບຮອງເປັນມະຕິຂອງຄະນະປະຈຳສະພາແຫ່ງຊາດຈຳນວນ 50 ສະບັບໃນນີ້ມະຕິວຽກງານລັດຖະບານ 6 ສະບັບ, ມະຕິວຽກງານອົງ ການໄອຍະການປະຊາຊົນສູງສຸດ ແລະສານປະຊາຊົນສູງສຸດ 33 ສະບັບ, ມະຕິວຽກງານອົງການກວດສອບ ແຫ່ງລັດ 4 ສະບັບ ແລະມະຕິວຽກງານສະພາແຫ່ງຊາດ 7 ສະບັບ, ໄດ້ຕິດຕາມກວດກາການຈັດຕັ້ງ ປະຕິບັດກົດໝາຍ ແລະນິຕິກຳໃຕ້ ກົດໝາຍທີ່ຕິດພັນກັບການຈັດ ເກັບລາຍຮັບ, ການຈັດຕັ້ງປະຕິ ບັດກົດໝາຍ ແລະນິຕິກຳໃຕ້ກົດ ໝາຍທີ່ຕິດພັນກັບການສ້າງວິຊາຊີບ, ການພັດທະນາສີມືແຮງງານ ທີ່ມີຄຸນນະພາບ, ການສ້າງວຽກ ເຮັດງານທຳຂອງປະຊາຊົນ ແລະ ການຕິດຕາມກວດ

ກາການຕົກລົງ ຂອງຄະນະປະຈຳສະພາແຫ່ງຊາດ ກ່ຽວກັບການຈັດຕັ້ງປະຕິບັດນິຕິກຳທີ່ພົວພັນກັບການເຊົ່າ, ສຳປະທານທີ່ດິນ, ຜ່ານການຕິດຕາມ ກວດກາເຫັນວ່າລັດຖະບານ ກໍຄື ຂະແໜງການທີ່ກ່ຽວຂ້ອງເອົາ ໃຈໃສ່ສ້າງ, ປັບປຸງ ແລະຈັດຕັ້ງ ປະຕິບັດກົດໝາຍ, ນິຕິກຳໃຕ້ກົດ ໝາຍເຂົ້າໃນການປະຕິບັດໜ້າທີ່ວຽກງານດັ່ງກ່າວນັບມື້ນັບດີຂຶ້ນ, ປະກອບສ່ວນໃນການປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດລວມ ທັງການພັດທະນາສີມືແຮງງານ, ການສ້າງອາຊີບທີ່ສາມາດສ້າງລາຍຮັບໃຫ້ແກ່ປະຊາຊົນ, ຫຼຸດພົ້ນອອກຈາກຄວາມທຸກຍາກ, ໄດ້ກວດກາ, ຄົ້ນຄວ້າ ແລະພິຈາລະນາຄຳຮ້ອງຂໍຄວາມເປັນທຳຂອງປະຊາຊົນ 824 ເລື່ອງ ແລະແກ້ໄຂສຳເລັດ 329 ເລື່ອງ ເທົ່າກັບ 47,57% ຂອງຄຳຮ້ອງທັງໝົດ; ຕ້ອນຮັບ ແລະໃຫ້ຄຳປຶກສາແກ່ປະຊາຊົນກ່ຽວກັບຄຳຮ້ອງຂໍຄວາມເປັນທຳ 220 ເທື່ອ.

 ສຳລັບທິດທາງແຜນການເຄື່ອນໄຫວວຽກງານປະຈຳປີ 2020 ສະພາແຫ່ງຊາດຈະສືບຕໍ່ປັບປຸງກົງຈັກການຈັດຕັ້ງພາຍໃນສະພາແຫ່ງຊາດໃຫ້ມີຄວາມເຂັ້ມແຂງ,ໜັກແໜ້ນ, ສາມາດປະຕິບັດ ໜ້າທີ່ເປັນເສນາທິການທີ່ດີໃຫ້ກົງ ຈັກສະພາແຫ່ງຊາດ ແລະກົງຈັກທີ່ຄະນະປະຈຳສະພາແຫ່ງຊາດ, ເອົາໃຈໃສ່ປັບປຸງລະບອບການເຮັດວຽກພາຍໃນສະພາແຫ່ງຊາດ, ສືບຕໍ່ເອົາໃຈໃສ່ຍົກສູງຂີດຄວາມສາມາດໃຫ້ແກ່ພະນັກງານ-ລັດຖະກອນເປັນປົກກະຕິ, ເອົາໃຈໃສ່ຈັດຕັ້ງປະຕິບັດການປະເມີນຜົນການປະຕິ ບັດໜ້າທີ່ວຽກງານຂອງພະນັກງານ-ລັດຖະກອນປະຈຳປີ 2020 ຊຶ່ງເປັນປີແຫ່ງການມ້ວນທ້າຍຂອງສະພາແຫ່ງຊາດຊຸດນີ້ໃຫ້ສຳເລັດທັນຕາມເວລາທີ່ກໍານົດໃນແຜນ ການ ແລະນິຕິກຳກ່ຽວຂ້ອງ ແລະຮັບປະກັນຄຸນນະພາບ.

____________

ໜັງສືພິມເສດຖະກິດ-ສັງຄົມ

แชร์