ປູກຜັກປອດສານພິດຂາຍເປັນສິນຄ້າ

  ສຳລັບຢູ່ປະເທດເຮົາການປູກຝັງ-ລ້ຽງສັດຂາຍເປັນສິນຄ້າແມ່ນທາງເລືອກໜຶ່ງທີ່ມີຄວາມເໝາະສົມກັບເງື່ອນໄຂ ແລະສິ່ງແວດລ້ອມຢູ່ປະເທດລາວໂດຍສະເພາະແມ່ນປະຊາຊົນທີ່ອາໄສຢູ່ເຂດຊານເມືອງ ແລະຊົນນະບົດສາມາດເລືອກເອົາການປູກເຂົ້າ ແລະປູກພືດຜັກປອດສານພິດຕ່າງໆເປັນສິນຄ້າເພາະຕະຫຼາດມີຄວາມຕ້ອງການສູງ ແລະໄດ້ຜົນກຳໄລດີສົມຄວນສາມາດສ້າງລາຍໄດ້ສຸດຈະລິດ ແລະຖືກຕ້ອງສອດຄ່ອງຕາມແນວທາງສົ່ງເສີມການປູກຝັງ-ລ້ຽງສັດຂາຍເປັນສິນຄ້າເພື່ອແກ້ໄຂຄວາມທຸກ ຍາກທີ່ພັກ-ລັດຖະບານວາງອອກ.

  ດັ່ງຄອບຄົວຂອງທ່ານ ຊ້ອຍ ຈອມເຫຼັກ ອາຍຸ 45 ປີປະຈຸບັນຢູ່ ບ້ານວຽງສາ ເມືອງໄຊ ແຂວງອຸດົມໄຊ ມີສະມາຊິກທັງໝົດ 5 ຄົນ ມີແຮງງານຕົ້ນຕໍ 2 ຄົນ ຊຶ່ງແມ່ນ ໜຶ່ງໃນຄອບຄົວທີ່ມີຄວາມຕື່ນຕົວ ໃນການທຳມາຫາກິນ ເພື່ອແກ້ໄຂຄວາມທຸກຍາກດ້ວຍການປູກພືດຜັກປອດສານພິດຂາຍເປັນສິນຄ້າທ່ານໄດ້ເລົ່າໃຫ້ຟັງວ່າ: ເມື່ອກ່ອນ ມີອາຊີບເຮັດໄຮ່ເຮັດນາລ້ຽງຄອບຄົວເທົ່ານັ້ນ, ສ່ວຍລາຍຮັບແມ່ນບໍ່ມີ ຈິ່ງເຮັດໃຫ້ສະພາບຄອບຄົວທຸກຍາກຂາດແຄນ, ມາຮອດປີ 2010 ຕົນກໍເລີ່ມມີແນວຄິດຢາກຫັນທິດມາເຮັດສວນປູກພືດແບບປະສົມປະສານເລີຍໄດ້ຢືມເງິນຈາກທະນາຄານນະໂຍບາຍຈຳນວນ 15 ລ້ານກີບ ເພື່ອມາລົງທຶນເຮັດສວນເຮືອນຮົ່ມໃນເນື້ອທີ່ 1.000 ຕາ ແມັດ ໂດຍໃຊ້ເປັນເນື້ອທີ່ໝູນວຽນ ແລະຕົນກໍປຸກເປັນເຮືອນຮົ່ມຈຳນວນ 5 ຫຼັງ ແລະຊື້ແນວພັກຜັກມາປູກມີຜັກຫອມປ້ອມ, ຜັກກາດ, ຜັກບົ້ງ, ຜັກບົ່ວ, ໝາກເລັ່ນ ແລະຜັກອື່ນໆອີກ.

  ສຳລັບການປູກຜັກປອດສານພິດນີ້ແມ່ນບໍ່ມີຄວາມຫຍຸ້ງຍາກເພາະມີພະນັກງານກະສິກຳແຂວງ ສົມທົບກັບເມືອງ ແລະວິຊາການໄດ້ ລົງມາສອນເຕັກນິກວິທີປູກ, ວິທີ ເຮັດຝຸ່ນບົ່ມ, ປຸງແຕ່ງຢາຂັບໄລ່ສັດຕູພືດ ແລະວິທີບົວລະບັດຮັກສາພືດຜັກຕ່າງໆ, ໃນການຂາຍແມ່ນໄດ້ນຳໄປຂາຍຢູ່ຕະຫຼາດ ແລະແມ່ຄ້າ ມາຮັບຊື້ຢູ່ສວນ ໂດຍຂາຍໃນລາຄາຜັກກາດກິໂລລະ 7.000 ກີບ, ຜັກຫອມປ້ອມກິໂລ 28 ພັນກີບ, ຜັກບົ່ວກິໂລລະ 15 ພັນກີບ ແລະ ໝາກເລ່ັນກິໂລ 5.000 ກີບ ເມື່ອ ຫັກຄ່າສິ້ນເປື້ອງອອກຈະເປັນເງິນ ກຳໄລໄດ້ 30 ລ້ານກວ່າກີບຕໍ່ປີ, ນອກຈາກປູກຜັກແລ້ວຍັງລ້ຽງໝູ, ລ້ຽງແບ້, ລ້ຽງເປັດ, ລ້ຽງໄກ່ ແລະ ເຮັດນາເປັນອາຊີບເສີມສາມາດຂາຍສ້າງລາຍຮັບຈຳນວນໜຶ່ງ ລວມລາຍຮັບທັງໝົດສະເລ່ຍ 40 ລ້ານກວ່າກີບ.

  ທ່ານ ຊ້ອຍ ຈອມເຫຼັກ ຍັງໄດ້ ກ່າວຕື່ມອີກວ່າ: ສຳລັບການປູກຜັກປອດສານພິດຂາຍແມ່ນມີລາຍຮັບດີ ແລະໃຊ້ຕົ້ນທຶນໜ້ອຍ ແລະ ພວມເປັນທີ່ຕ້ອງການຂອງທ້ອງຕະຫຼາດ ດັ່ງນັ້ນຄອບຄົວຈິ່ງຢຶດຖືເອົາອາຊີບປູກຜັກປອດສານພິດຂາຍ ເປັນສິນຄ້າເພື່ອເປັນການສ້າງລາຍ ຮັບເຂົ້າຄອບຄົວ,ນອກນັ້ນຕົນເອງຍັງຢາກຈະຝາກຄວາມຄິດເຖິງຊາວກະສິກຳ ແລະເຊີນຊວນພໍ່ແມ່ ພີ່ນ້ອງທີ່ມີຄວາມສົນໃຈ ແລະມັກອາຊີບການປູກຜັກປອດສານພິດໃຫ້ລອງຫັນມາປູກຂາຍເປັນສິນຄ້າຈະເຮັດໃຫ້ຊີວິດການເປັນຢູ່ຂອງຄອບຄົວມີການປ່ຽນແປງດີຂຶ້ນ.

------

ໂດຍ: ຄຳໃສ ພົມມະວັນ

แชร์