ເຜີຍແຜ່ປຶ້ມບົດປະເມີນສະພາບເສດຖະກິດມະຫາພາກຂອງລາວ ປີ 2019

 ວັນທີ 11 ກຸມພາ 2020 ທີ່ສະຖາບັນຄົ້ນຄວ້າເສດຖະກິດແຫ່ງຊາດ ນະຄອນຫຼວງວຽງຈັນ, ສະຖາບັນຄົ້ນຄວ້າເສດຖະກິດແຫ່ງຊາດຮ່ວມກັບສູນຄົ້ນຄວ້ານະໂຍບາຍເສດຖະກິດມະຫາພາກ ແລະ ປັບໂຄງສ້າງເສດຖະກິດໄດ້ຈັດກອງປະຊຸມເຜີຍແຜ່ປຶ້ມບົດປະເມີນສະພາບເສດຖະກິດມະຫາພາກຂອງ ສປປ ລາວ ປີ 2019 ພາຍໃຕ້ການເປັນປະທານຂອງທ່ານ ລີເບີ ລີບົວປາວ ຮັກສາການຫົວໜ້າສະຖາບັນຄົ້ນຄວ້າເສດຖະກິດແຫ່ງຊາດ, ມີບັນດາຫົວໜ້າກົມ, ຮອງກົມ ແລະພາກສ່ວນທີ່ກ່ຽວເຂົ້າ ຮ່ວມ.

 ທ່ານ ລີເບີ ລີບົວປາວ ກ່າວວ່າ: ການຈັດກອງປະຊຸມຄັ້ງນີ້ເພື່ອເຜີຍແຜ່ປຶ້ມບົດປະເມີນສະພາບເສດຖະກິດມະຫາພາກປະຈຳປີ 2019 ຂອງສະຖາບັນຄົ້ນຄວ້າເສດຖະ ກິດແຫ່ງຊາດ ແລະທ່າອ່ຽງປີ 2020 ຊຶ່ງໃນໄລຍະ 1 ປີຜ່ານມາການເຕີບໂຕເສດຖະກິດຂອງລາວ ປີ 2019 ໄດ້ຮັບຜົນກະທົບຢ່າງໜັກໜວງເປັນຕົ້ນຜົນກະທົບຈາກໄພທຳມະຊາດຕໍ່ຂະແໜງກະສິກຳ, ການຜະລິດໄຟຟ້າຈາກເຂື່ອນທີ່ມີບໍ່ເປັນໄປຕາມແຜນ, ການຜະລິດຂອງອຸດສາຫະກຳບໍ່ແຮ່ (ທອງ ແດງ) ຫຼຸດລົງ, ຂະແໜງກໍ່ສ້າງ ສະລໍຕົວຕາມທ່າອ່ຽງການລົງທຶນ ແລະຂະແໜງການທ່ອງທ່ຽວຂະຫຍາຍຕົວ 14% ຫຼື 4,79 ລ້ານ ເທື່ອຄົນ, ການລົງທຶນເອກະຊົນພາຍໃນ (ປ່ອຍສິນເຊື່ອ) ຍັງມີບັນຍາກາດຟົດຟື້ນຢູ່ຈາກ 5,8% ເປັນ 7,1%, ຂະແໜງການສົ່ງອອກສິນຄ້າໄປຕ່າງປະເທດກໍມີທ່າອ່ຽງຂະຫຍາຍຕົວດີປະມານ 11,08% ເຊັ່ນ: ນໍ້າຕານ,ເຈ້ຍ, ກະສິກຳ.

 ສະນັ້ນ, ເພື່ອຮັບປະກັນການຫັນປ່ຽນທີ່ໜັກແໜ້ນ, ຫຼຸດຜ່ອນຄວາມສ່ຽງຈາກພາຍນອກ ແລະເພີ່ມໂອກາດໃນການພັດທະນາຕາມທິດເຕີບໂຕໄວ, ມີສະຖຽນລະພາບ ແລະຍືນຍົງຕ້ອງໄດ້ເອົາໃຈໃສ່ຈັດຕັ້ງປະຕິບັດບາງປະເດັນທີ່ສຳຄັນຄື: ສືບຕໍ່ປະຕິບັດຄວາມພະຍາຍາມຂອງລັດຖະບານໃນການແກ້ໄຂບັນຫາເສດຖະກິດ ແລະຂໍ້ຫຍຸ້ງຍາກໃນການພັດທະນາ; ສຸມໃສ່ພິເສດບາງຂະແໜງການທີ່ມີທ່າແຮງ (ກະສິກຳ, ທ່ອງທ່ຽວ) ເພື່ອໃຫ້ໄດ້ປະໂຫຍດສູງສຸດຈາກການເຊື່ອມໂຍງ-ເຊື່ອມຈອດດກັບພາກພື້ນ ແລະສາກົນ;ພັດທະນາຊັບພະຍາກອນມະນຸດໃຫມີທັກສະ,ຄວາມຮູ້, ຄວາມສາມາດສູງສາມາດຮ່ວມຕ່ອງໂສ້ການຜະລິດທີ່ມີມູນຄ່າເພີ່ມສູງ, ທັງເປັນການເກັບກຽວຜົນປະໂຫຍດຈາກການປັນຜົນທາງປະຊາກອນ;ເພີ່ມຄວາມເອົາໃຈໃສ່ໃນການຮັບມືກັບການປ່ຽນແປງຂອງດິນຟ້າອາກາດແລະໄພພິບັດທາງທຳມະຊາດທີ່ນັບມື້ເກີດເພີ່ມຂຶ້ນ.

----------------

ໜັງສືພິມເສດຖະກິດ-ສັງຄົມ

 

แชร์